ដោយ៖ខន ចំប៉ា និង​ អ៊ូ សុខមាន

 

បណ្តាខេត្ត នៅតែបន្តរកឃើញអ្នកផ្ទុកវិជ្ជមានកូវីដ-១៩ នៅថ្ងៃទី២៦ ឧសភា។ តាមរបាយការណ៍ ករណីកើតលើពលរដ្ឋខ្មែរ ដែលទើបត្រឡប់ពីប្រទេសថៃ មានចំនួនច្រើនដ៏គួរឲ្យកត់សម្គាល់។

រដ្ឋបាលខេត្តកោះកុង បានប្រកាសរកឃើញអ្នកឆ្លងកូវីដ-១៩ ចំនួន៧នាក់បន្ថែតទៀត លើពលរដ្ឋ៥នាក់រស់នៅភូមិផ្លោង ឃុំបឹងព្រាវ ស្រុកស្រែអំបិល និង២នាក់ទៀតរស់នៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង។  

នៅថ្ងៃទី២៦ ឧសភា ខេត្តពោធិ៍សាត់ ក៏បានរកឃើញមនុស្ស៥នាក់បន្ថែមវិជ្ជមានកូវីដ-១៩ ក្នុងនោះ៣នាក់ ជាអ្នកដំណើរពីរាជធានីភ្នំពេញ និង២នាក់ជាអ្នកដំណើរពីប្រទេសថៃ។ សរុបករណីឆ្លងក្នុងខេត្តពោធិ៍សាត់ ត្រឹមថ្ងៃទី២៦ឧសភា មានចំនួន៩៧នាក់ ក្នុងនោះជាសះស្បើយ ១៧នាក់ ស្លាប់១នាក់ និង ៧៩នាក់ទៀតកំពុងសម្រាកព្យាបាល។

 

ខេត្តបាត់ដំបង បានរកឃើញអ្នកវិជ្ជមានកូវីដ-១៩ ចំនួន១០នាក់បន្ថែមទៀត ដោយ៦នាក់ជាពលរដ្ឋដែលទើបធ្វើដំណើរពីប្រទេសថៃ ម្នាក់ជាបុគ្គលិកកាស៊ីណូ នៅប៉ោយប៉ែត ខណៈ៣នាកទៀតឆ្លងក្នុងមូលដ្ឋាន។ តាមរដ្ឋបាលខេត្តបាត់ដំបង ក្នុងចំណោមអ្នកឆ្លងថ្មីទាំង១០នាក់នេះ មាន៤នាក់ នៅស្រុកសង្កែ, ២នាក់នៅស្រុកមោងឫស្សី, ស្រុកថ្មគោល និងសង្កាត់អូរចា មានម្នាក់រៀងខ្លួន និង២នាក់ទៀតជាអ្នកនៅស្រុកមង្គលបុរី និងក្រុងសិរីសោភ័ណ ខេត្តបន្ទាយមានជ័យ។

 

នៅថ្ងៃទី២៦ ឧសភានេះ ក៏មានអ្នកជំងឺចំនួន ៨នាក់បានជាសះស្បើយផងដែរ ខណៈស្ត្រីវ័យ ៧០ឆ្នាំម្នាក់បានស្លាប់បាត់បង់ជីវិតដោយសារកូវីដ-១៩ ។ នេះគឺជាករណីទី២ ដែលមានអ្នកជំងឺកូវីដ-១៩ បានស្លាប់។ 

 

: 

 

គិតត្រឹមថ្ងៃនេះ ខេត្តបាត់ដំបង មានករណីកូវីដ-១៩ សរុប១៧៨នាក់ ក្នុងនោះ៦៨នាក់ បានជាសះស្បើយ។ អ្នកជំងឺកូវីដ-១៩ ចំនួន២នាក់ ត្រូវបានបញ្ជូនទៅព្យាបាលនៅខេត្តបន្ទាយមានជ័យ  និង១០៧នាក់កំពុងសម្រាកព្យាបាលក្នុងខេត្តបាត់ដំបង។

 

៣នាក់ដែលទើបរកឃើញ ជាពលករទើបមកពីប្រទេសថៃ ដែល២នាក់ជាអ្នកស្រុកបរវេល ខេត្តបាត់ដំបង និងម្នាក់ទៀតរស់នៅស្រុកថ្មគោល ខេត្តបាត់ដំបង។ តាមសេចក្តីប្រកាសព័ត៌មានរបស់រដ្ឋបាលខេត្ត ត្រឹមថ្ងៃទី២៦ឧសភា ខេត្តឧត្តរមានជ័យ មានអ្នកវិជ្ជមានជំងឺកូវីដ-១៩ សរុប៣៦នាក់ ក្នុងនោះ ៣៤នាក់ ករណីនាំចូលពីក្រៅប្រទេស។ អ្នកសះស្បើយ មាន៧នាក់ ខណៈអ្នកជំងឺ២៩នាក់កំពុងសម្រាកព្យាបាល។

រដ្ឋបាលខេត្តកំពង់ស្ពឺ បន្តរកឃើញមនុស្ស២៥នាក់ទៀត ឆ្លងកូវីដ-១៩ ដោយក្នុងនោះ មានកុមារ ៣នាក់។ ក្នុងចំណោមករណីឆ្លងថ្មីនៃជំងឺកូវីដ-១៩ នៅខេត្តកំពង់ស្ពឺប្រចាំថ្ងៃទី២៦ឧសភា ឆ្នាំ២០២១ មាននៅស្រុកភ្នំស្រួច ១០នាក់, ស្រុកឧដុង្គ៤នាក់, ស្រុកថ្ពងមាន៤នាក់, ស្រុកសំរោងទងមាន៥នាក់ ខណៈអ្នកជំងឺកូវីដ-១៩ ចំនួន២នាក់ទៀត នៅស្រុកគងពិសី។ ក្នុងថ្ងៃជាមួយគ្នានេះ រដ្ឋបាលខេត្តកំពង់ស្ពឺ ក៏ប្រកាសនូវដំណឹងល្អដែលមានមនុស្ស២២នាក់ទៀត បានជាសះស្បើយពីជំងឺកូវីដ-១៩ ផងដែរ។ ចំនួននេះ បានធ្វើឱ្យខេត្តកំពង់ស្ពឺ មានអ្នកជាសះស្បើយពីជំងឺកូវីដ-១៩ សរុប១៥៣នាក់។

 

ចំនួនអ្នកឆ្លងកូវីដ-១៩ ដែលរដ្ឋបាលខេត្តព្រៃវែងរកឃើញនៅក្នុងថ្ងៃទី២៦ឧសភា ឆ្នាំ២០២១ គឺដូចនឹងអ្នកឆ្លងរបស់ខេត្តកំពង់ស្ពឺ ផងដែរ។ ក្នុងចំណោមអ្នកឆ្លងថ្មីនៃជំងឺកូវីដ-១៩ចំនួន២៥នាក់របស់ខេត្តព្រៃវែងនេះ មាន១៥នាក់មានអាសយដ្ឋាន នៅស្រុកពាមជរ, មាន៥នាក់នៅស្រុកមេសាង, មាន៣នាក់នៅស្រុកព្រះស្តេច និង២នាក់ទៀត នៅស្រុកពារាំង។ គិតត្រឹមថ្ងៃទី២៦ឧសភា រដ្ឋបាលខេត្តព្រៃវែង រកឃើញរកអ្នកកូវីដ-១៩ សរុប៣៣០នាក់ ដោយក្នុងជាសះស្បើយ ១៥២នាក់។ អ្នកជំងឺកូវីដ-១៩ ចំនួន១៧៤នាក់ កំពុងសម្រាកព្យាបាល ខណៈ៤នាក់ទៀត បានបាត់បង់ជីវិតដោយសារតែជំងឺនេះ។

 

រដ្ឋបាលខេត្តកំពត បានរកឃើញមនុស្ស៧នាក់ទៀត វិជ្ជមានកូវីដ-១៩ នៅថ្ងៃទី២៦ឧសភា ដែលមានអាយុ៨ខែដល់៧០ឆ្នាំ។ ក្នុងចំណោមអ្នកទាំងជំងឺកូវីដ-១៩ ទាំង៧នាក់នោះ មាន៤នាក់ជាអ្នកស្រុកអង្គរជ័យ និង៣នាក់ទៀត ជាអ្នកស្រុកទឹកឈូ។ រដ្ឋបាលខេត្តនេះបានបញ្ជាក់ថា ចំពោះជំងឺកូវីដ-១៩ ចំនួន៤នាក់ ដែលលមានអាសយដ្ឋាននៅអង្គរជ័យនោះ មាន៣នាក់ គឺបានធ្វើដំណើរមកពីភ្នំពេញ ចន្លោះពីថ្ងៃទី២០ដល់២៣ឧសភា ឆ្នាំ២០២១។

 

រដ្ឋបាលខេត្តសៀមរាប បន្តឃើញពលរដ្ឋខ្លួនចំនួន៥នាក់ទៀត ឆ្លងកូវីដ-១៩ ដែលសុទ្ធសឹងជាអ្នកធ្វើដំណើរត្រលប់មកពីភ្នំពេញវិញ។ ក្នុងចំណោមអ្នកជំងឺកូវីដ-១៩ទាំង៥នាក់នោះ មាន៤នាក់រស់នៅក្នុងស្រុកជីក្រែង ខណៈម្នាក់ទៀត ស្ថិតនៅក្នុងសង្កាត់ស្លក្រោម ក្រុងសៀមរាប។ រដ្ឋបាលខេត្តសៀមរាប បានបញ្ជាក់ថា ការរកឃើញវិជ្ជមានកូវីដ-១៩ លើមនុស្សទាំង៥នាក់នេះ គឺស្ថិតនៅក្នុងអំឡុងពេលធ្វើចត្តាឡីស័ក។ សម្រាប់មនុស្ស៤នាក់ដែលសះស្បើយពីកូវីដ-១៩ នៅក្នុងថ្ងៃទី២៦ឧសភាដែរនោះ រដ្ឋបាលខេត្តសៀមរាប បានបញ្ជាក់ថា គឺមាន៣នាក់ ជាពលរដ្ឋរស់នៅក្រុងសៀមរាប ខណៈម្នាក់ទៀត មានអាសយដ្ឋាននៅឃុំរើល ស្រុកពួក។ មកទល់ពេលនេះ ខេត្តសៀមរាប មានវិជ្ជមានកូវីដ-១៩ ចំនួន១០៣នាក់ ដោយក្នុងនោះ មាន៥៦នាក់ បានជាសះស្បើយ, ស្លាប់២នាក់ និងកំពុងសម្រាកព្យាបាល ៤៥នាក់។

 

គិតត្រឹមថ្ងៃទី២៦ឧសភា កម្ពុជាមានករណីសរុបចំនួន ២៧ ៦៣៨នាក់ សះស្បើយសរុប ២០ ៣៩៨នាក់ និងស្លាប់១៩៤នាក់៕