ដោយ ជា ពេជ្រដាឡែន 

 

មន្ត្រីរដ្ឋ Sao Paulo បានពិន័យលោក ជែ បុលសូណារ៉ូ ប្រធានាធិបតីប្រេស៊ីល, លោក Eduardo កូនប្រុសរបស់លោក បុលសូណារ៉ូ  និងជាសមាជិកព្រឹទ្ធសភា និងលោក Tarcisio Gomes រដ្ឋមន្រ្តីហេដ្ឋារចនាសម្ព័ន្ធ ព្រោះមិនបានពាក់ម៉ាស រក្សាគម្លាតសុវត្ថិភាព អំឡុងពេលជួបជុំគ្នាជាមួយ និងអ្នកគាំទ្ររាប់ពាន់នាក់ក្នុងរដ្ឋមួយនេះ។ នេះមិនមែនលើកជាលើកទីមួយឡើយដែលប្រធានាធិបតីស្ដាំនិយមរូបនេះ ត្រូវពិន័យចំពោះការបំពានវិធានសុខាភិបាលរបស់រដ្ឋសហព័ន្ធ។

 

លោក បុលសូណារ៉ូ ជារឿយៗ បានរៀបការប្រមូលផ្ដុំអ្នកគាំទ្រជាច្រើននាក់ តាមរដ្ឋប្រេស៊ីលនីមួយៗ សំដៅទាក់ទាញប្រជាប្រិយភាពដោយសម្រាប់ការបោះឆ្នោតនៅឆ្នាំក្រោយ។ កាលពីខែឧសភាកន្លង ទៅ លោក ត្រូវបានពិន័យម្តងហើយ ដោយសារមិនពាក់ម៉ាសនៅពេលជួបជុំគ្នាជាមួយ អ្នកគាំទ្រនៅរដ្ឋ Maranhao ។ 

 

អភិបាលរដ្ឋ Sao Paulo លោក Joao Doria ដែលជាគូប្រជែងផ្នែកនយោបាយរបស់ប្រធានាធិបតីប្រេស៊ីលផងនោះ បានព្រមានដាក់ពិន័យលោក បុលសូណារ៉ូ ប្រសិនបើលោកមិនគោរពច្បាប់របស់រដ្ឋ។ 

ប៉ុន្តែលោក បុលសូណារ៉ូ ដែលតែងរិះគន់វិធានការសុខាភិបាលក្នុងប្រទេស ហាក់មិនខ្វាយខ្វល់ឡើយ។ 

 

មិនត្រឹមរដ្ឋ Sao Paulo ឡើយ លោក បុលសូណារ៉ូ ក៏មានជំហរមិនត្រូវគ្នាជាមួយ អភិបាលរដ្ឋផ្សេងៗ ទាក់ទងវិធានការទប់ស្កាត់ជំងឺកូវីដ-១៩ផងដែរ។ មេដឹកនាំប្រទេសអាមេរិកខាងត្បូងមួយនេះ មិន គាំទ្រឡើយចំពោះវិធានការនៅផ្ទះ និងការពាក់ម៉ាស ដោយលោកអះអាងថា មិនមានប្រសិទ្ធភាព និងប៉ះពាល់សេដ្ឋកិច្ចខ្លាំង។ លោកក៏បានប្រាប់ទៅក្រុមអ្នកគាំទ្រថា លោកនឹងស្នើឲ្យមានវិធានការមិនពាក់ ម៉ាសចំពោះអ្នកបានចាក់វ៉ាក់សាំងរួច ដែលនេះផ្ទុយពីអ្នកជំនាញ និងមន្ត្រីសុខាភិបាល ប្រេស៊ីលដែលនៅតែស្នើឱ្យបន្ត ការពាក់ម៉ាសរហូតទាល់តែប្រជាជនភាគច្រើន បានចាក់វ៉ាក់សាំង រួចរាល់។

 

រហូតមកដល់បច្ចុប្បន្ន ប្រជាជនប្រេស៊ីលចំនួនតិចជាង១២ភាគរយនៃប្រជាជនសរុបប៉ុណ្ណោះ ត្រូវ បានចាក់វ៉ាក់សាំងការពារជំងឺកូវីដ-១៩។ ប្រេស៊ីល មានអ្នកឆ្លងសរុបជាង១៧លាននាក់ និងមានចំនួនអ្នកស្លាប់ប្រមាណ៤៨ម៉ឺននាក់ដែលចំនួននេះស្ថិតនៅលំដាប់ទី២បន្ទាប់ពីអាមេរិក៕