បើតាមប្រសាសន៍ សម្តេច ហ៊ុន សែន វ៉ាក់សាំងបង្ការជំងឺកូវីដ-១៩ ចំនួន៥លានដូសនោះ នឹងមកដល់កម្ពុជា នៅត្រឹមថ្ងៃទី១០ ខែកក្កដា។ ប្រមុខរដ្ឋមន្ត្រីរដ្ឋាភិបាល បានបន្តរៀបរាប់ថា  វ៉ាក់សាំងបង្ការជំងឺកូវីដ-១៩ របស់ក្រុមហ៊ុនស៊ីណូហ្វាម ចំនួន១លានដុល្លារ នឹងមកដល់កម្ពុជា នាថ្ងៃទី៦កក្កដា។

 

ចំពោះវ៉ាក់សាំងកូវីដ-១៩ ចំនួន៤លានដូសទៀត នឹងមកដល់កម្ពុជា នាថ្ងៃទី១០កក្កដាឆ្នាំ២០២១។  សម្តេច ហ៊ុន សែន បានបញ្ជាក់ថា ក្នុងចំណោមវ៉ាក់សាំងបង្ការជំងឺកូវីដ-១៩ ទាំង៤លានដូស គឺមាន៣លានដូស ជាវ៉ាក់សាំងរបស់ក្រុមហ៊ុនស៊ីណូវ៉ាក់ និងមាន១លានដូស ជាវ៉ាក់សាំងរបស់ក្រុមហ៊ុន ស៊ីណូហ្វាម។

 

គិតត្រឹមថ្ងៃទី១កក្កដា ឆ្នាំ២០២១ កម្ពុជា មានវ៉ាក់សាំងបង្ការជំងឺកូវីដ-១៩ សម្រាប់ចាក់ប្រជាពលរដ្ឋ ចំនួន ១១,០២៤,០០០ដូស។ ក្នុងនោះ មានវ៉ាក់សាំងកូវីដ-១៩របស់ស៊ីណូវ៉ាក់ ៧,៥លានដូស, ស៊ីណូហ្វាម៣,២លានដូស និង វ៉ាក់សាំងកូវីដ-១៩ ប្រភេទ Covishield( Astra Zineca) ចំនួន៣២៤,០០០ដូស។

 

ជាមួយគ្នានេះ កម្ពុជាក៏បានសម្រេចផែការចាក់វ៉ាក់បង្ការកូវីដ-១៩ដល់ពលរដ្ឋ បាន៤,២០២,៧៥១នាក់ ផងដែរ។ ចំនួននេះ គឺស្មើនឹងជាង៤២ភាគរយ នៃផែនការរបស់រដ្ឋាភិបាល ដែលនឹងចាក់សាំងបង្ការកូវីដ-១៩ដល់ពលរដ្ឋ១០លាននាក់ ដោយគ្រោងសម្រេច១០០ភាគរយ នៅក្នុងវិច្ឆិកា ឆ្នាំ២០២១៕