គ្រាន់តែឈានចូលខែកក្កដាភ្លាម អ្នកគោរពស្រឡាញ់លោកបណ្ឌិត កែម ឡី និងអ្នកកែមឡីនិយម ចាប់ផ្តើមនាំគ្នារម្លឹកដល់រមណភាពរបស់លោក ដែលនឹងមកដល់នៅថ្ងៃទី១០ ខែកក្កដា ឆ្នាំ២០២១។
អ្នកប្រើប្រាស់បណ្តាញសង្គម បាននាំគ្នាប្តូររូប (Profile) របស់ពួកគេ ដោយជំនួសមកវិញនូវរូបរបស់លោកបណ្ឌិត កែម ឡី។ អ្នកខ្លះ មិនដូរដាក់រូបរបស់លោកបណ្ឌិត កែម ឡី ឡើយ តែពួកគេ បានសរសេរថា «កែម ឡី និយាយការពិត» នៅក្នុងរូបរបស់ពួកគេ។
បន្ថែមពីនេះ អ្នកខ្លះទៀត បានបង្ហោះ និងចែករំលែកឡើងវិញនូវវីដេអូទាក់ទងនឹងលោកបណ្ឌិត កែម ឡី រួមទាំងប្រសាសន៍ខ្លីៗរបស់លោកផងដែរ ដែលលោក ធ្លាប់បាននិយាយកាលនៅមានជីវិត។ «ខ្ញុំ នឹងនិយាយអ្វី ដែលអ្នកដទៃ មិនហ៊ានិយាយ» «បើអ្នក មិនធ្វើអ្វីសោះ ក៏គង់តែទទួលរងគ្រោះដែរ គ្រាន់តែមិនទាន់ដល់វេនអ្នកប៉ុណ្ណោះ» «ជូនទឹកភ្នែករបស់អ្នក រួចបន្តដំណើរទៅមុខទៀត» ទាំងនេះ សុទ្ធតែជាប្រសាសន៍របស់លោកបណ្ឌិត កែម ឡី ហើយនៅមានប្រសាសន៍របស់លោកជាច្រើនទៀត ដែលត្រូវបានចែករំលែកលើបណ្តាញសង្គម។
មិនមែនតែប្រជាពលរដ្ឋទេ ដែលចាប់ផ្តើមរម្លឹកពីមរណភាពរបស់លោកបណ្ឌិត កែម ឡី ក្នុងលក្ខណៈជាបុគ្គលរបស់ពួកគេ ក្រុមអង្គការសង្គមស៊ីវិលនិងគណបក្សនយោបាយមួយចំនួន ក៏ចាប់ផ្តើមរម្លឹកដែរ។ មជ្ឈមណ្ឌលសិទ្ធិមនុស្សកម្ពុជា (CCHR) ជាស្ថាប័នក្រៅរដ្ឋាភិបាលដ៏ធំមួយ ដែលធ្វើការផ្នែកសិទ្ធិមនុស្សនៅកម្ពុជា បានបង្កើតយុទ្ធនាការជំរុញឲ្យមានការប្តូរដាក់រូបរបស់លោកបណ្ឌិត កែម ឡី លើបណ្តាញសង្គម រយៈពេល១ខែពេញនៃខែកក្កដា ឆ្នាំ២០២១នេះ។
មជ្ឈមណ្ឌលសិទ្ធិមនុស្សកម្ពុជា ប្រកាសក្នុងសេចក្តីថ្លែងការណ៍ថា នឹងចាក់បញ្ចាំងវីដេអូស្តីពីខ្សែជីវិតរបស់លោកបណ្ឌិត កែម ឡី លើទំព័រហ្វេសប៊ុករបស់ខ្លួន នៅថ្ងៃទី៨ ខែកក្កដា។ ក្រៅពីនេះ មជ្ឈមណ្ឌលសិទ្ធិមនុស្សកម្ពុជា នៅមានកម្មវិធីមួយចំនួនទៀត ដែលនឹងត្រូវរៀបចំឡើងតាមបណ្តាញសង្គម ដោយអនុញ្ញាតឲ្យអ្នកដែលគោរពស្រឡាញ់លោកបណ្ឌិត កែម ឡី ចូលរួមបញ្ចេញមតិយោបល់ និងបង្ហាញពីក្តីនឹករលឹកដល់លោកបណ្ឌិត កែម ឡី។
គណបក្សប្រជាធិបតេយ្យមូលដ្ឋាន ដែលគេដឹងថា ជាគណបក្សរបស់ក្រុមបញ្ញវន្ត ក៏បានចេញសេចក្តីថ្លែងការណ៍មួយដែរ ជុំវិញការរម្លឹកខួប៥ឆ្នាំនៃមរណភាពរបស់លោកបណ្ឌិត កែម ឡី។ តាមរយៈសេចក្តីថ្លែងការណ៍របស់ខ្លួន គណបក្សប្រជាធិបតេយ្យមូលដ្ឋាន ប្រកាសថា នឹងរៀបចំពិធីបង្សុកូលជូនវិញ្ញាណក្ខន្ធលោកបណ្ឌិត កែម ឡី និងរៀបចំពិធីចែកអំណោយដល់ក្រុមគ្រួសារ ដែលមានជីវភាពលំបាកខ្លាំង។
សូមរម្លឹកថា នៅព្រឹកថ្ងៃទី១០ ខែកក្កដា ឆ្នាំ២០១៦ លោកបណ្ឌិត កែម ឡី ដែលជាសិក្សាស្រាវជ្រាវពីការអភិវឌ្ឍសង្គម និងជាអ្នកអត្ថាធិប្បាយដ៏ល្បីល្បាញពីរឿងនយោបាយ ត្រូវបានឃាតក បាញ់សម្លាប់ ក្នុងស្តារម៉ាត់នៃស្ថានីយ៍ប្រេងឥទ្ទនៈកាល់តិចស្តុបបូកគោ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ខណៈលោក កំពុងអង្គុយពិសាអ្វីនៅក្នុងស្តារម៉ាត់នោះ។ បុរសឈ្មោះ អឿត អាង ហៅ ជួប សម្លាប់ ត្រូវបានចាប់ខ្លួន និងត្រូវចោទថា ជាឃាតក ដែលបាញ់សម្លាប់លោកបណ្ឌិត។
ជួប សម្លាប់ បានសារភាពថា រូបគេ ពិតជាបានបាញ់សម្លាប់លោកបណ្ឌិតមែន ហើយលើកមូលហេតុថា ព្រោះខឹងនឹងលោកបណ្ឌិត ដែលជំពាក់លុយ៣ពាន់ដុល្លារ ហើយមិនសងវិញ។ រូបគេ ត្រូវតុលាការកាត់ទោសឲ្យជាប់ពន្ធនាគារមួយជីវិត។
យ៉ាងណា មជ្ឈដ្ឋានមួយចំនួន ជាពិសេសអ្នកស្រី ប៊ូ រចនា ជាភរិយារបស់លោកបណ្ឌិត មិនជឿថា ជួប សម្លាប់ ជាឃាតកនោះទេ។ ពួកគេ រឹតតែមិនជឿថា លោកបណ្ឌិត ជំពាក់លុយជួប សម្លាប់។ មជ្ឈដ្ឋានទាំងនោះ រួមទាំងអ្នកស្រី ប៊ូ រចនា នៅតែចង់ឲ្យអាជ្ញាធរ ស្វែងរកឃាតកពិត ដែលបាញ់សម្លាប់លោកបណ្ឌិត យកទៅផ្តន្ទាទោស។ បច្ចុប្បន្ន អ្នកស្រី ប៊ូ រចនា និង កូនប្រុសទាំង៥នាក់ កំពុងរស់នៅប្រទេសអូស្ត្រាលី៕