ទីក្រុង Ruili ដែលបានព្រំដែនជាប់ជាមួយមីយ៉ាន់ម៉ា បានប្រកាសបិទខ្ទប់ទីក្រុង និងធ្វើតេស្តរកជំងឺកូវីដ-១៩ ទ្រង់ទ្រាយធំលើប្រជាជន បន្ទាប់ពីរកឃើញជំងឺកូវីដ-១៩ ចំនួន ៣ករណី។

 

ប្រធានាធិបតីចិន ស៊ី ជិនភីង បានជួបប្រធានាធិបតីបារាំង អេម៉ានុយអែល ម៉ាក្រុង និងអធិការបតីអាល្លឺម៉ង់ អែនជែឡា មឺហ្គែល។ ក្នុងជំនួបនោះ លោក ស៊ី ប្រាប់មេដឹកនាំប្រទេសអឺរ៉ុបទាំងពីរថា ចិនចង់ពង្រីកកិច្ចសហប្រតិបត្តិការជាមួយអឺរ៉ុបដោយស្មើភាព និងផ្ដល់ឱ្យគ្នាទៅវិញទៅមក ហើយចិនមិនចង់ជំនួសតំណែងអ្នកណាឡើយ។

 

 

ប្រតិបត្តិការដកទ័ពពីអាហ្វហ្កានីស្ថានរបស់អាមេរិក សម្រេចបានជាង៩០ភាគរយហើយ។ ស្របពេលអាមេរិកដកទ័ព ក្រុមតាលីបង់ក៏បង្កើនប្រតិបត្តិការរបស់ខ្លួន និងបានដណ្ដើមស្រុកជាបន្តបន្ទាប់ ខណៈកម្លាំងរដ្ឋាភិបាលអាហ្វហ្កានីស្ថានដាក់គោលដៅការពារទីក្រុងធំៗ និងទីតាំងយុទ្ធសាស្រ្តប៉ុណ្ណោះ។

 

ប្រេសិតពិសេសរបស់អាមេរិកសម្រាប់កិច្ចការកូរ៉េខាងជើង លោក សុង គីម បានជជែកតាមទូរស័ព្ទជាមួយសមភាគីចិន ទាក់ទងបញ្ហាកូរ៉េខាងជើងដែលជាការងារស្នូល។ កិច្ចពិភាក្សាតាមទូរស័ព្ទនេះធ្វើឡើង ស្របពេលកូរ៉េខាងជើងបន្តបដិសេធការបោះដៃរកការចរចារបស់អាមេរិកជាច្រើនលើក។

 

 

លោក Jovenel Moise ប្រធានាធិបតីហៃទី ត្រូវបានគេធ្វើឃាតនៅគេហដ្ឋានរបស់ខ្លួនក្នុងក្រុង Port-au-Prince ដោយសមាជិកក្រុមប្រដាប់អាវុធម្នាក់។

 

ប៉ូលិសហៃទី បានសម្លាប់មនុស្សបួននាក់ដែលត្រូវជឿថា នៅពីក្រោយការធ្វើឃាតប្រធានាធិបតី Jovenel Moise។ ជនសង្ស័យពីរនាក់ទៀត ត្រូវបានប៉ូលិសចាប់ខ្លួនផងដែរ។

 

 

សារព័ត៌មានវៀតណាម បានចុះផ្សាយថា ក្រុងហូជីមិញ នឹងបញ្ជូនគ្រូពេទ្យចំនួន២ពាន់នាក់ ដើម្បីប្រមូលសំណាកប្រជាជនឱ្យបាន ១,៣លាននាក់ក្នុងមួយថ្ងៃ ដើម្បីរកជំងឺកូវីដ-១៩។

 

អគ្គរាជអាជ្ញាម៉ាឡេស៊ី បានលើកឡើងថា នាយករដ្ឋមន្រ្តី លោកមូហ៊ីឌីន យ៉ាស៊ីន និងគណៈរដ្ឋមន្រ្តី នៅតែអាចបន្តអនុវត្តអំណាចរបស់ស្ថាប័ននីតិប្រតិបត្តិ បើទោះមានការប្រកាសដកការគាំទ្រពីបក្សអង្គការបង្រួបបង្រួមជាតិម៉ាឡេ (UMNO)។

 

 

ភាពអត់ឃ្លាននៅលើពិភពលោក កើនឡើងខ្លាំងក្នុងឆ្នាំ២០២០ ដោយប្រជាជនរស់នៅក្នុងស្ថានភាពអត់ឃ្លានកើនឡើងរហូតដល់ ៦ដង បើធៀបនឹងឆ្នាំ២០១៩។ នេះបើតាមរបាយការណ៍មួយរបស់អង្គការ Oxfam។ 

 

ថៃ បានប្រកាសបិទខ្ទប់ និងបម្រាមគោចរក្នុងក្រុងបាងកក និងខេត្តចំនួន៩ ផ្សេងទៀត បន្ទាប់ពីករណីឆ្លងជំងឺកូវីដ-១៩ ហក់ឡើងខ្លាំង។ ការបិទខ្ទប់នេះ នឹងមានសុពលភាពចាប់ពីថ្ងៃទី១២ ខែកក្កដាតទៅ និងមានរយៈពេលយ៉ាងហោចណាស់ ១៤ថ្ងៃ។

 

 

វៀតណាម បានទទួលវ៉ាក់សាំង ២លានដូសលើកដំបូងពីការបរិច្ចាគរបស់អាមេរិក។ នេះបើតាមសេចក្តីប្រកាសរបស់ស្ថានទូតអាមេរិក នៅទីក្រុងហាណូយ នៅថ្ងៃទី១០ ខែកក្កដា។ ការមកដល់នៃវ៉ាក់សាំងទាំងនោះ ធ្វើឡើងស្របពេលវៀតណាម កំពុងប្រយុទ្ធប្រឆាំងជាមួយជំងឺឆ្លងកូវីដ-១៩ ។

 

គណៈកម្មការរៀបចំការបោះឆ្នោតមីយ៉ាន់ម៉ា ដែលត្រូវបានតែងតាំងដោយរបបសឹកមីយ៉ាន់ម៉ា បានព្រមានរំលាយបក្សលោកស្រីអ៊ុងសាន ស៊ូជី ជាថ្មី បន្ទាប់ពីរកឃើញករណីបន្លំ ក្នុងការបោះឆ្នោតកាលពីខែវិច្ឆិកា ឆ្នាំ២០២០ កន្លងទៅ មានរហូតដល់ ១១លានករណី៕