ក្នុងលិខិតផ្ញើទៅស៊ុលតង់ព្រុយណេនៅថ្ងៃទី១៩ ខែកក្កដា លោក លី ខឺឈាំង នាយករដ្ឋមន្រ្តីចិន បានរំលឹកថា ក្នុងរយៈពេល ៣០ឆ្នាំចុងក្រោយ ចិន និងអាស៊ាន បានរួមគ្នាកសាងស្ថិរភាព ការអភិវឌ្ឍ វិបុលភាពនៅក្នុងតំបន់ជាច្រើន។ មិនតែប៉ុណ្ណោះ ចិន និងអាស៊ាន ចាប់តាំងពីឆ្នាំ២០២០ មក បានរួមគ្នាប្រយុទ្ធប្រឆាំងជំងឺកូវីដ-១៩ និងជួយគ្នាក្នុងស្ថានភាពលំបាកទៀតផង។ 

 

តាមលិខិតដែលបានចុះផ្សាយលើវេបសាយក្រសួងការបរទេសចិន លោក លី បានបន្តថា ទំនាក់ទំនងចិន-អាស៊ាន បានឈានចូលដំណាក់កាលថ្មីនៃការអភិវឌ្ឍគ្រប់ជ្រុងជ្រោយ។ «ចិន បានត្រៀមខ្លួនធ្វើការជាមួយអាស៊ានរួចហើយ ដើម្បីកសាងដៃគូយុទ្ធសាស្រ្តក្នុងកម្រិតខ្ពស់ជាងមុន»។ នាយករដ្ឋមន្រ្តីចិន បានសង្កត់ធ្ងន់បែបនេះ ដោយបន្ថែមថា ភាគីទាំងពីរនឹងពង្រឹងសហគមន៍កាន់តែជិតស្និទ្ធសម្រាប់អនាគតរួមគ្នា និងការឆ្លើយតបកាន់តែប្រសើរលើបញ្ហាប្រឈមសកលសម្រាប់ប្រជាជនជិត ២ពាន់នាក់របស់ខ្លួន។ 

 

ជាការឆ្លើយតប មហាក្សត្រព្រុយណេ ដែលជាប្រធានអាស៊ានផ្លាស់វេន បានសង្កត់ធ្ងន់ថា ដៃគូយុទ្ធសាស្រ្តចិន-អាស៊ាន នឹងបង្កើតអនាគតកាន់តែប្រសើរសម្រាប់ប្រជាជនរបស់ខ្លួន។ ទន្ទឹមនេះ មេដឹកនាំព្រុយណេរូបនេះ ក៏បានសាទរខួប ៣០ឆ្នាំនៃការបង្កើតទំនាក់ទំនងដៃគូសន្ទនារវាងភាគីទាំងពីរផងដែរ។ 

 

បើតាមស៊ុលតង់ព្រុយណេ ទំនាក់ទំនងរវាងភាគីទាំងពីរនាពេលកន្លងមក បានសម្រេចលទ្ធផលប្រកបដោយផ្លែផ្កា និងក្លាយជាដៃគូយុទ្ធសាស្រ្ត និងគ្រប់ជ្រុងជ្រោយដ៏សំខាន់មួយ។ មិនតែប៉ុណ្ណោះ អាស៊ានចិន ក៏បានសហការគ្នាប្រយុទ្ធជាមួយជំងឺឆ្លងសកលថែមទៀត។ 

 

សូមបញ្ជាក់ថា ចិនស្នើអាស៊ានធ្វើជាដៃគូសន្ទនានៅក្នុងឆ្នាំ១៩៩១។ ៥ឆ្នាំបន្ទាប់ ចិនបានក្លាយជាដៃគូសន្ទនាអាស៊ានពេញលេញ។ នៅក្នុងឆ្នាំ២០១៩ ពាណិជ្ជកម្មរវាងភាគីទាំងពីរ បានឈានដល់ ៦៤១ពាន់លានដុល្លារ និងជាដៃគូពាណិជ្ជកម្មដ៏សំខាន់មួយ៕