ទីរួមខេត្តបីទៀតរបស់អាហ្វហ្កានីស្ថាន បានធ្លាក់ចូលក្រោមការត្រួតត្រារបស់ក្រុមតាលីបង់មានទីក្រុងFarah របស់ខេត្ត Farah និងទីក្រុង Pul-e-Khumri របស់ខេត្ត Baghlan នៅថ្ងៃទី១០ និងក្រុង Fayzabad របស់ខេត្ត Badakhshan នៅថ្ងៃទី១១ ខែសីហា។ ជាសរុបទីរួមខេត្តចំនួន៨ ត្រូវបានក្រុមតាលីបង់ដណ្ដើមបានក្នុងពេលមិនដល់មួយសប្ដាហ៍ផង ដោយភាគច្រើននៅប៉ែកខាងជើងប្រទេស ដែលធ្លាប់ជាតំបន់តស៊ូប្រឆាំងនឹងក្រុមតាលីបង់រហូតមក។ ក្រុមនេះ​ កំពុងសម្លឹងឃើញទីក្រុងធំជាងគេនៅភាគជើង Mazar-i-Sharif ផងដែរ។

 

ស្របពេលក្រុមតាលីបង់បង្កើនការប្រយុទ្ធរបស់ខ្លួន ប្រជាជនរាប់ពាន់នាក់ បានភៀសខ្លួនទៅកាន់កន្លែងសុវត្ថិភាពមានរដ្ឋធានីកាប៊ុល និងខេត្តនៅតំបន់ភាគកណ្ដាល ដើម្បីគេចពីការប្រយុទ្ធគ្នា។​ បើតាមទីភ្នាក់ងារព័ត៌មាន AFP សកម្មជនតាលីបង់បានបង្កហិង្សាលើប្រជាជន និងលួចឆក់ទ្រព្យសម្បត្តិជាដើម។

 

យុទ្ធនាការរបស់ក្រុមតាលីបង់មានល្បឿនលឿនចាប់តាំងពីអាមេរិកចាប់ផ្ដើមដកទ័ពពីអាហ្វហ្កានីស្ថានក្នុងខែសីហាមក។ តាមគម្រោង ការដកទ័ពនេះ នឹងបញ្ចប់នៅចុងខែសីហា។ នៅសេតវិមាន ប្រធានាធិបតី ចូ បៃឌិន និយាយថា លោកមិនសោកស្ដាយចំពោះការដកទ័ពនេះដែលការបញ្ចប់សង្រ្គាម២០ឆ្នាំរបស់អាមេរិក។ លោក បៃឌិន ក៏ប្រាប់ឱ្យកម្លាំងអាហ្វហ្កានីស្ថានរួមគ្នាប្រយុទ្ធនឹងក្រុមតាលីបង់ ដ្បិត២០ឆ្នាំមកនេះ អាមេរិកបង្វឹក និងបំពាក់ឧបករណ៍ឱ្យកម្លាំងរដ្ឋាភិបាល៣០ម៉ឺននាក់។

 

«ពួកគេត្រូវតែប្រយុទ្ធដោយខ្លួន និងដើម្បីជាតិ»។ ប្រធានាធិបតីអាមេរិកប្រាប់អ្នកសារព័ត៌មានបែបនេះ មុនបន្តថា អាមេរិកនឹងជួយផ្គត់ផ្គង់សម្ភារ ផ្ដល់ហិរញ្ញវត្ថុសម្រាប់បើកប្រាក់ខែ និងបន្តអន្តរាគមន៍តាមផ្លូវអាកាស។

 

ជាមួយគ្នានេះ អាមេរិកក៏ព្យាយាមដាក់សម្ពាធការទូតលើក្រុមតាលីបង់ឱ្យផ្អាកប្រតិបត្តិការរបស់ខ្លួន និងទទួលយកបទឈប់បាញ់។ ប្រេសិតពិសេសអាមេរិក  Zalmay Khalilzad ទៅដល់ទឹកដីកាតាដើម្បីចរចាជាមួយតំណាងក្រុមឧទ្ទាម។ អ្នកការទូតអង់គ្លេស ចិន ប៉ាគីស្ថាន អ៊ូសបេគីស្ថាន និងសហភាពអឺរ៉ុបក៏ទៅដល់កាតាដើម្បីជជែកពីបញ្ហានៅអាហ្វហ្កានីស្ថាន៕