លោក Michael Spavor ត្រូវបានឃាត់ខ្លួនក្នុងឆ្នាំ ២០១៨ រួមជាមួយអតីតអ្នកការទូតកាណាដា Michael Kovrig ពីបទចោទចារកម្ម។ ការចាប់ខ្លួនអ្នកទាំងពីរ ធ្វើឡើងបន្ទាប់ពីលោកស្រី Meng Wanzhou នាយកហិរញ្ញវត្ថុក្រុមហ៊ុន Huawei ត្រូវបានចាប់ខ្លួននៅក្នុងប្រទេសកាណាដាតាមដីកាធ្វើបត្យាប័នរបស់អាមេរិកក្នុងឆ្នាំដដែល។ កាណាដា ចាត់ទុកករណីនេះជារឿងនយោបាយ និងការដាក់សម្ពាធពីចិន។
 

ក្នុងសេចក្តីថ្លែងការណ៍ចេញនៅថ្ងៃទី១១ ខែសីហា តុលាការប្រជាជនទីក្រុងDandong ប្រកាសថា លោក Spavor ដែលដំណើរការអាជីវកម្មទេសចរណ៍រវាង ចិននិងកូរ៉េខាងជើង ត្រូវបានផ្តន្ទាទោសឱ្យជាប់ពន្ធនាគាររយៈពេល១១ឆ្នាំ ពីបទចារកម្ម និងផ្តល់អាថ៌កំបាំងរដ្ឋដោយខុសច្បាប់ដល់ប្រទេសដទៃ និងត្រូវផាកពិន័យជាទឹកប្រាក់ចំនួន ៥ម៉ឺនយ័ន។
 

សាលក្រមកាត់ទោសលោក Spavor ត្រូវប្រកាសឡើងមួយថ្ងៃក្រោយតុលាការចិនរក្សាការកាត់ទោសប្រហារជីវិតលើជនជាតិកាណាដាម្នាក់ទៀតពីបទជួញដូរគ្រឿងញៀន។
 

ក្នុងការឃាត់ខ្លួនជាង២ឆ្នាំកន្លះនេះ លោក Spavor និងលោក Kovrig ស្ទើរតែគ្មានទំនាក់ទំនងជាមួយពិភពខាងក្រៅ។ ការចុះសួរសុខទុក្ខរបស់ស្ថានទូតកាណាដាក៏ត្រូវបានបញ្ឈប់ដោយសារតែការផ្ទុះជំងឺកូវីដ-១៩ ក្នុងខែតុលាកន្លងទៅ ហើយបុរសទាំងពីរក៏មិនបានអនុញ្ញាតឱ្យជួបមេធាវីឬក្រុមគ្រួសាររបស់ពួកគេបានទៀតផង។ 
 

ភ្លាមៗក្រោយសវនាការ នាយករដ្ឋមន្រ្តីកាណាដា ចាស្ទីន ទ្រូដូ បានប្រតិកម្មវិញ ដោយលោកបានលើកឡើងថា ការផ្តន្ទាទោសនេះពិតជាមិនអាចទទួលយកបាន និងមានភាពអយុត្តិធម៌ ។
 

កន្លងទៅ កាណាដាបានចោទប្រកាន់ចិនថា ការឃុំខ្លួនលោក Spavor និងលោក Kovrig មានជាប់ពាក់ព័ន្ធនឹងករណីរបស់លោកស្រី Meng ។ ក្រុងអូតាវ៉ា លើកឡើងដែរថា ការចាប់ខ្លួនបុរសអ្នកជំនួញទាំងពីរនេះជាយុទ្ធសាស្ត្រក្នុងការចរចានយោបាយរបស់ចិនដោយយកបុរសទាំងពីរជាចំណាប់ខ្មាំងនយោបាយ។
 

ខណៈដែលសាលក្រមនៃការផ្តន្ទាទោសរបស់ Spavor ត្រូវបានប្រកាសនៅព្រឹកថ្ងៃទី១១ខែសីហា អ្នកការទូតមកពី២៥ប្រទេសរួមទាំងជប៉ុន អាមេរិក អង់គ្លេស នូវែលសេឡង់និងអ្នកតំណាងមកពីសហភាពអឺរ៉ុបបានជួបជុំគ្នានៅស្ថានទូតកាណាដានៅទីក្រុងប៉េកាំងដើម្បីបង្ហាញការគាំទ្រចំពោះ Spavor និងដើម្បីតវ៉ាការផ្តន្ទាទោសនេះ៕