COVID-19
ជាតិ
អ្នកព្យាបាលកូវីដ-១៩តាមផ្ទះ ជាង៤ពាន់នាក់ ដោយគ្មានអ្នកស្លាប់ និងសះស្បើយ១,៤ពាន់នាក់ ពីឆ្វេងទៅ៖ លោក ហេង សុទ្ធី អនុរដ្ឋលេខាធិការក្រសួងសុខាភិបាល, លោក ង៉ូវ កាន រដ្ឋលេខាធិការក្រសួងសុខាភិបាល, លោក កើត ឆែ អភិបាលរងរាជធានីភ្នំពេញ និងលោក ងី មានហេង ប្រធានមន្ទីរសុខាភិបាលរាជធានីភ្នំពេញ ថ្លែងនៅក្នុងសន្និសីទកន្លងមក។
× ភ្នំពេញ៖ អ្នកព្យាបាលកូវីដ-១៩តាមផ្ទះ មានជាង៤ពាន់នាក់ ក្នុងនោះជាសះស្បើយជាង១៤០០នាក់ និងគ្មានអ្នកស្លាប់ឡើយ។ លោក ង៉ូវ កាង រដ្ឋលេខាធិការក្រសួងសុខាភិបាល វាយតម្លៃវិជ្ជមានលើការព្យាបាលតាមផ្ទះនេះ។
ដ្បិតទទួលបានលទ្ធផលល្អ ក្នុងការព្យាបាលតាមផ្ទះក្តី ក៏នៅមានប្រឈមខ្លះដែរ។ រដ្ឋលេខាធិការក្រសួងសុខាភិបាល លោក ង៉ូវ កាង សង្កេតឃើញថា មានបញ្ហាខ្លះកើតឡើង ដោយសារអ្នកជំងឺនិងសមាជិកគ្រួសារមួយចំនួនតូច ពិបាករក្សាគម្លាត។ ក្រៅពីនេះ គឺមានអ្នកជំងឺខ្លះ បានលាក់បាំងព័ត៌មាន បន្ទាប់ពីពិនិត្យឃើញថា ខ្លួនបានឆ្លងកូវីដ-១៩។
ជុំវិញបញ្ហានេះ លោកស្នើឲ្យពលរដ្ឋរាយការណ៍ព័ត៌មានដល់ក្រសួងសុខាភិបាល បន្ទាប់ពិនិត្យឃើញកូវីដ-១៩ ។ លោកថ្លែងយ៉ាងដូច្នេះ៖ «សូមឲ្យពលរដ្ឋចុះឈរឈ្មោះរាយការណ៍ នូវពេលពិនិត្យឃើញវិជ្ជមានកូវីដ-១៩ មិនត្រូវសម្ងំលាក់ខ្លួនហើយមិនរាយការណ៍។ ពួកគាត់នឹងប្រឈមបញ្ហា ពិបាកស្វែងរកសេវាសង្គ្រោះភ្លាមៗ...និងប្រឈមមុខផ្លូវច្បាប់»។
សូមស្ដាប់ការបកស្រាយរបស់លោក ង៉ូវ កាង រដ្ឋលេខាធិការក្រសួងសុខាភិបាល ដែលសាកសួរកញ្ញា ឡាយ សុភាវតី អ្នកសារព័ត៌មានថ្មីៗ ៖
ជុំវិញការទុកដាក់សំរាមវិញ លោក ង៉ូវ កាង ក៏បានស្នើឲ្យអ្នកប្រមូលសំរាម កុំខ្លាចរអាលអី ព្រោះក្រុមគ្រូពេទ្យ និងអាជ្ញាធរបានណែនាំ អ្នកព្យាបាលតាមផ្ទះឲ្យវេចខ្ចប់បានត្រឹមត្រូវហើយ។ ម្យ៉ាងទៀតមេរោគក្នុងសំរាមទាំងនោះ មិនអាចរស់បានឡើយ រយៈពេល៧២ម៉ោង។ ត្រង់នេះ បានន័យថា អាជ្ញាធរបានឲ្យអ្នកព្យាបាលតាមផ្ទះ វេចខ្ចប់សំរាមទុក៧២ម៉ោងសិន សឹមយកមកបោះចោល។
បើតាមរដ្ឋលេខាធិការក្រសួងសុខាភិបាល ការដាក់អ្នកជំងឺកូវីដ-១៩ព្យាបាលតាមផ្ទះនេះ បានជួយកាត់បន្ថយការកកស្ទះនៅតាមមណ្ឌលព្យាបាលយ៉ាងច្រើន ពោលគឺអាចទុកបម្រុងកន្លែង សម្រាប់ជួយសង្គ្រោះអ្នកកើតកូវីដ-១៩ធ្ងន់ធ្ងរ បានច្រើនជាងមុន។
គិតត្រឹមថ្ងៃទី១៧សីហានេះ កម្ពុជាមានអ្នកឆ្លងកូវីដ-១៩ សរុប ៨៦.៥៩៧ នាក់ ក្នុងនោះ១៣.២៣៥នាក់ ជាករណីនាំចូល។ អ្នកជាសះស្បើយមាន ៨១.៩១៨នាក់ និងស្លាប់សរុប១.៧១៨នាក់៕
© រក្សាសិទ្ធិដោយ thmeythmey.com