«ក្រុមតាលីបង់ត្រូវបានចាត់ទុលក្រុមភេវរករក្រោមច្បាប់អាមេរិក ហើយយើងបានហាមឃាត់គណនី របស់ពួកគេពីកម្មវិធីរបស់ពួកយើងក្រោមគោលការណ៍ប្រឆាំងស្ថាប័ន ឬក្រុមគ្រោះថ្នាក់ណាមួយ»។ អ្នកនាំពាក្យក្រុមហ៊ុន Facebook ប្រាប់បែបនេះទៅកាន់ទីភ្នាក់ងារព័ត៌មាន AFP នៅថ្ងៃទី១៧ ខែសីហា។ 

 

ជាមួយគ្នានេះដែរ អ្នកនាំពាក្យក្រុមហ៊ុនខាងលើនិយាយថា ខ្លួនបានធ្វើការងារជាមួយក្រុមអ្នកជំនាញ ជនជាតិអាហ្វហ្កានីស្ថានដែលប្រើប្រាស់ភាសាដើម Dari និង Pashto និងព្រមទាំងមានចំណេះដឹង មូលដ្ឋានអំពីបញ្ហានេះដើម្បីជួយណែនាំគោលការណ៍របស់ខ្លួនផងដែរ។ បើតាមអ្នកនាំពាក្យដដែល Facebook មិនសម្រេចចិត្តដោយខ្លួនឯងឡើយអំពីការទទួលស្គាល់រដ្ឋាភិបាលក្នុងប្រទេសណាមួយ ប៉ុន្តែក្រុមហ៊ុនគោរពសិទ្ធិរបស់អង្គការអន្តរជាតិក្នុងការសម្រេចចិត្តទាំងនេះ។

 

ចំណែកអ្នកនាំពាក្យក្រុមហ៊ុន WhatsApp ប្រាប់ទីភ្នាក់ងារព័ត៌មាន AFP តាមសារអ៊ីម៉ែល ថា ក្រុមហ៊ុន របស់ខ្លួនត្រូវអនុវត្តតាមការកំណត់របស់អាមេរិក។ អ្នកនាំពាក្យដដែលបន្តថា ការហាមឃាត់គណនី នេះរួមមានគណនីដែលប្រើដោយក្រុមតាលីបង់ផ្ទាល់ គណនីផ្លូវការតំណាងឱ្យតាលីបង់ និងហាមឃាត់ការបញ្ចេញមតិគាំទ្រដល់ក្រុមនេះ។ ក្រុមហ៊ុន ក៏កំពុងតែស្វែងរកព័ត៌មានបន្ថែមពីអាជ្ញាធរ អាមេរិកដែលពាក់ព័ន្ធនៅអាហ្វហ្គានីស្ថានពីគណនីផ្សេងទៀតដែលអាចទាក់ទងក្រុមតាលីបង់។

 

ជុំវិញរឿងរ៉ាវខាងលើ ក្នុងសន្និសីទកាសែតនៅថ្ងៃទី១៧ ខែសីហា អ្នកនាំពាក្យតាលីបង់បានរិះគន់ ក្រុមហ៊ុន Facebook ថា ក្រុមហ៊ុននេះអះអាងខ្លួនជាអ្នកលើកកម្ពស់សេរីភាពនៃការបញ្ចេញមតិ ផ្ទុយទៅវិញការពិតនោះពួកគេបានបិទសិទ្ធិមិន អនុញ្ញាតឱ្យបង្ហោះផ្សាយព័ត៌មាន៕