សមាជិកថ្មី Romelu Lukaku បានរួមចំណែកយ៉ាងខ្លាំង ក្នុងការជួយតោខៀវទទួលបាន៣ពិន្ទុ ក្នុងការបង្ហាញខ្លួនលើកដំបូងរបស់គេ។ ខ្សែប្រយុទ្ធសញ្ជាតិបែលហ្ស៊ិករូបនេះ ជាអ្នករកគ្រាប់នាំមុខ ឱ្យក្រុមលោក Thomas Tuchel នៅនាទី១៥ តាមរយៈការបញ្ជូនរបស់ខ្សែការពារ Reece James។ ២០ នាទីបន្ទាប់ James ដដែលនេះ បានបន្ថែមគ្រាប់ទី២ ដោយការបញ្ជូនពីសំណាក់ Mason Mount។ ចប់ការប្រកួត Chelsea ឈ្នះ Arsenal ២-០។
 

នេះជាជ័យជម្នះ២ប្រកួតជាប់គ្នា របស់ Chelsea បន្ទាប់ពីពួកគេឈ្នះ Crystal Palace នៅជំនួបបើកឆាក ៣-០។ ៦ពិន្ទុពេញនេះ បាននាំក្រោមតោខៀវ ឡើងទៅឈរកំពូលតារាងលីគកំពូលអង់គ្លេស ជំនួស Man Utd វិញ។
 

ដោយឡែក Arsenal នេះជាបរាជ័យលើកទី២ របស់ពួកគេហើយ សម្រាប់រដូវកាលថ្មី ២០២១-២២នេះ។ ក្រោមការដឹកនាំរបស់អ្នកចាត់ការ Mikel Arteta កាំភ្លើងធំ ប្រកួតចាញ់ Brentford នៅជំនួបបើកឆាក ២-០ និងបន្តចាញ់ Chelsea ២-០ នៅក្នុងផ្ទះខ្លួនឯង។
 

Arsenal ស្ថិតនៅតំបន់ត្រូវកាត់ចោល ជាមួយ Newcastle United និង Norwich City ដែលបរាជ័យទាំងពីរប្រកួតដូចគ្នា រួមជាមួយ Wolverhampton Wanderers និង Burnley។

Man Utd បានធ្លាក់ពីកំពូលតារាង ទៅចំណាត់ថ្នាក់ទី៥វិញ ក្រោយប្រកួតស្មើ Southampton ១-១។ ឆ្លងកាត់ការប្រកួត២លើក បិសាចក្រហមមាន៤ពិន្ទុ តាមពីក្រោយ Spurs, Brighton និង Liverpool ដែលរកបាន៦ពិន្ទុពេញ។
 

ហង្សក្រហមនៅចំណាត់ថ្នាក់ទី២ ក្រោយបន្តយកឈ្នះ Burnley ២-០។ Brighton ក៏មិនណយដែរ ដោយពួកគេបានយកឈ្នះ Watford ២-០ ខណៈជំនួបដំបូងពួកគេឈ្នះ Burnley ២-១ ក្រៅដី។
 

មាន់ខ្នាយមាស Spurs បន្ទាប់ពីឈ្នះម្ចាស់ការពារជើងឯក Man City នៅជំនួបបើកឆាក ១-០ រួចមក ពួកគេបានបន្តមានជ័យជម្នះលើកក្រុម Wolves ក្នុងលទ្ធផល ១-០ ជាថ្មី។ Man City រកបានជ័យជម្នះរបស់ខ្លួនហើយ តាមរយៈការយកឈ្នះ Norwich City ៥-០៕