អន្តរជាតិ
ការបំផ្ទុះមួយ បានកើតឡើងនៅក្បែរអាកាសយានដ្ឋានក្នុងក្រុងកាប៊ុល សម្លាប់មនុស្ស១១នាក់
រូបភាព៖ CNN
×![]()
ដោយ: ធៀន ភារិន្ទ
ការបំផ្ទុះមួយ បានកើតឡើងនៅខាងក្រៅអាកាសយានដ្ឋានក្នុងក្រុងកាប៊ុល ស្របពេលអាមេរិក និងបណ្តាប្រទេសជាច្រើនទៀត កំពុងជម្លៀសប្រជាជនចេញ។ នេះបើតាមការបញ្ជាក់របស់មន្ទីរបញ្ចកោណអាមេរិក នៅថ្ងៃទី២៦ ខែសីហា។ 
សរសេរលើបណ្តាញសង្គម Twitter អ្នកនាំពាក្យក្រសួងការពារជាតិអាមេរិក លោក John Kirby បានអះអាងថា វាមានការបំផ្ទុះមួយនៅខាងក្រៅអាកាសយានដ្ឋាន Hamid Karzai ក្នុងក្រុងកាប៊ុល។ ការបំផ្ទុះនេះ កើតនៅច្រកចូលមួយនៃអាកាសយានដ្ឋាន។
តាមការចុះផ្សាយរបស់ Al Jazeera មនុស្សយ៉ាងហោចណាស់ ១១នាក់ បានបាត់បង់ជីវិត នៅក្នុងការបំផ្ទុះមួយនេះ។
មុនមានការបំផ្ទុះ ទូតអាមេរិកនៅក្រុងកាប៊ុល បានជូនដំណឹងបន្ទាន់ទៅប្រជាជនខ្លួន នៅអាហ្វហ្កានីស្ថាន ឱ្យចៀសពីអាកាសយានដ្ឋាន។ «ប្រជាជនអាមេរិក ដែលមានវត្តមាននៅច្រក Abbey ច្រកខាងកើត និងច្រកខាងជើង ត្រូវចាកចេញអាកាសយានដ្ឋានភ្លាម»។ ស្ថានទូតអាមេរិកនៅអាហ្វហ្កានីស្ថាន បានបញ្ជាក់បែបនេះ។
ក្នុងរយៈពេល ២៤ម៉ោង កម្លាំងប្រទេសលោកខាងលិច បានជម្លៀសប្រជាជនបានប្រមាណ ១៣,៤០០នាក់។ លើសពីនេះ មនុស្សប្រមាណ ៩៥,៧០០នាក់ ត្រូវបានជម្លៀសចេញពីអាហ្វហ្កានីស្ថាន បើគិតចាប់ពីថ្ងៃទី១៤ ខែសីហា៕
Tag:
អាហ្វហ្កានីស្ថាន
អាម៉េរិក
© រក្សាសិទ្ធិដោយ thmeythmey.com
