អន្តរជាតិ
នយោបាយអន្តរជាតិ
លោក ពូទីន៖ អាម៉េរិកសម្រេចបានលទ្ធផលសូន្យ សម្រាប់សង្គ្រាមនៅអាហ្វហ្កានីស្ថាន លោកប្រធានាធិបតីរុស្ស៊ី_វ្លាឌីមៀ_ពូទីន។_រូបភាព៖_NBC_News
× ប្រធានាធិបតីរុស្ស៊ី លោកវ្ល៉ាឌីមៀ ពូទីន បានលើកឡើងថា យុទ្ធនាការអាម៉េរិករយៈពេល ២០ឆ្នាំ នៅអាហ្វហ្កានីស្ថាន បានបញ្ចប់ដោយសោកនាដកម្ម ហើយក្រុងវ៉ាស៊ីនតោន មិនសម្រេចបានអ្វីទាំងអស់។ លោកពូទីនថា នេះគឺជាលទ្ធផលសូន្យ ប្រសិនបើមិនអវិជ្ជមាន។
ក្នុងជំនួបជាមួយក្មេងជំទង់នៅទីក្រុង Vladivostok ក្នុងថ្ងៃទី១ ខែកញ្ញា លោកប្រធានាធិបតីរុស្ស៊ី វ្ល៉ាឌីមៀ ពូទីន បានលើកឡើងថា ទ័ពអាម៉េរិក មានវត្តមាននៅអាហ្វហ្កានីស្ថាន ២០ឆ្នាំ ហើយក្នុងរយៈពេលនោះ ក្រុងវ៉ាស៊ីនតោន បានព្យាយាមបណ្តុះអារ្យធម៌របស់ខ្លួន ជាមួយប្រជាជនក្នុងតំបន់។ លោកពូទីន បានបន្តថា ការពិត អាម៉េរិកបានបំពាក់បទដ្ឋាន និងបែបបទរស់នៅ ក្នុងន័យដ៏ទូលាយ ក្នុងនោះរួមទាំងអង្គការនយោបាយ នៅអាហ្វហ្កានីស្ថានផងដែរ។
«លទ្ធផល គឺមានតែសោកនាដកម្ម និងបាត់បង់អ្នកដែលដើរតាមប៉ុណ្ណោះ»។ មេដឹកនាំរុស្ស៊ី បានសង្កត់ធ្ងន់បែបនេះ ដោយបន្ថែមថា នេះគឺជាលទ្ធផលសូន្យ ប្រសិនបើមិនអវិជ្ជមាន។ បើតាមលោកពូទីន វាមិនអាចទៅរួចឡើយ ដើម្បីបណ្ដុះគុណតម្លៃអ្វីមួយមកពីខាងក្រៅ។
លោកពូទីន នៅសប្តាហ៍មុន ក៏បានបង្ហាញក្តីបារម្ភលើបណ្តាប្រទេសលោកខាងលិច ដែលព្យាយាមជម្លៀសជនភៀសខ្លួនអាហ្វហ្កានីស្ថាន ទៅប្រទេសនៅក្នុងតំបន់អាស៊ីកណ្តាលផងដែរ ដោយបារម្ភពីការរីកសាយនៃក្រុមឥស្លាមជ្រុលនិយមនៅក្នុងប្រទេសទាំងនោះ។ លោកពូទីន បានអះអាងថា រុស្ស៊ី នឹងមិនជ្រៀតជ្រែកកិច្ចការផ្ទៃក្នុងអាហ្វហ្កានីស្ថានឡើយ។
សូមបញ្ជាក់ថា មកទល់ពេលនេះ ក្រុមតាលីបង់ បានត្រៀមបញ្ចេញរដ្ឋាភិបាលថ្មីរបស់ខ្លួន បន្ទាប់ពីគ្រប់គ្រងប្រទេសឡើងវិញ ខណៈពេលសេដ្ឋកិច្ចរបស់ប្រទេស កំពុងរងការខូតខាត៕
Tag:
រុស្ស៊ី
អាម៉េរិក
អាហ្វហ្កានីស្ថាន
© រក្សាសិទ្ធិដោយ thmeythmey.com