គេហទំព័ររបស់ក្រសួងការពារជាតិកម្ពុជា បានស្រង់សម្តីរបស់លោកវរនាវីឯក អ៊ីវ៉ាន ស្ទេតចេនកូ ក្នុងជំនួបជាមួយសម្តេច ទៀ បាញ់ យ៉ាងដូច្នេះថា៖«លោកវរនាវីឯក អ៊ីវ៉ាន ស្ទេតចេនកូ បានសន្យាថា ពេលទៅបំពេញការងារនៅប្រទេសរុស្ស៊ីវិញ លោក នឹងជម្រាបពីការពិតនៅកម្ពុជា ដែលមានថ្នាក់ដឹកនាំប្រកបដោយភាពឈ្លាសវៃ ធ្វើឲ្យប្រទេសជាតិ មានការរីកចម្រើនលើគ្រប់វិស័យ»។
 

លោក អ៊ីវ៉ាន ស្ទេតចេនកូ ប្រាប់សម្តេច ទៀ បាញ់ ថា លោក នឹងស្នើដល់រដ្ឋាភិបាល រួមទាំងក្រសួងការពារជាតិរុស្ស៊ី ឲ្យបន្តជួយគាំទ្រ និងពង្រឹងកិច្ចសហប្រតិបត្តិការបន្ថែមទៀតរវាងកម្ពុជា-រុស្ស៊ី។ សម្តេច ទៀ បាញ់ បានកោតសរសើរលោក អ៊ីវ៉ាន ស្ទេតចេនកូ ចំពោះកិច្ចខិតខំប្រឹងប្រែងរបស់លោក ក្នុងការបំពេញបេសកកម្មនៅកម្ពុជារយៈពេល៤ឆ្នាំកន្លងមក និងបានជួយពង្រឹងទំនាក់ទំនងរវាងកងទ័ពកម្ពុជា-រុស្ស៊ី។ 
 

លោកវរនាវីឯក វីតាលី លុចសេវ (Vitaly Luchshev) ត្រូវបានតែងតាំងជានាយការិយាល័យអនុព័ន្ធយោធារុស្ស៊ីថ្មី ជំនួសលោក អ៊ីវ៉ាន ស្ទេតចេនកូ។ ក្នុងការចូលជួបសម្តេច ទៀ បាញ់ លោក វីតាលី លុចសេវ ក៏បានធ្វើដំណើរទៅជាមួយលោក អ៊ីវ៉ាន ស្ទេតចេនកូ ដែរ ដើម្បីបង្ហាញខ្លួន ក្នុងនាមជានាយការិយាល័យអនុព័ន្ធយោធារុស្ស៊ីថ្មីប្រចាំកម្ពុជា។   

 

សម្តេច ទៀ បាញ់ បានបង្ហាញក្តីស្វាគមន៍ និងអបអរសាទរចំពោះលោក វីតាលី លុចសេវ ដែលត្រូវបានតែងតាំងជានាយការិយាល័យអនុព័ន្ធយោធារុស្ស៊ីថ្មីប្រចាំកម្ពុជា។ សម្តេចរដ្ឋមន្រ្តី មានប្រសាសន៍ថា ក្រសួងការពារជាតិកម្ពុជា ត្រៀមផ្ដល់កិច្ចសហប្រតិបត្តិការពេញលេញជាមួយ លោក វីតាលី លុចសេវ ដើម្បីពង្រឹងទំនាក់ទំនងនៃប្រទេសទាំងពីរ៕