រដ្ឋមន្ត្រីក្រសួងសុខាភិបាលថៃលោក Anutin Charnvirakul បានអះអាងថា វិធីសាស្ត្រចាក់វ៉ាក់សាំងក្រោមស្បែកដែលបានសិក្សាស្រាវជ្រាវកាលពីខែសីហា អាចចាប់ផ្ដើមប្រើប្រាស់ដោយគ្រូពេទ្យជំនាញបានហើយ។

 

ប្រធានមន្ទីរពេទ្យ Vachira នៅខេត្ត Phuket លោក Chalermpong Sukonthaphon បានបញ្ជាក់ថា មន្ទីរពេទ្យរបស់លោកបានទទួលភ្លើងបៃតងដែលអាចចាប់ផ្ដើមប្រើប្រាស់មធ្យោបាយចាក់វ៉ាក់សាំងក្រោមស្បែកនេះ។ លោកបានលើកឡើងថា តាមការសិក្សាស្រាវជ្រាវ និងសាកល្បងមធ្យោបាយនេះបង្កឱ្យប្រព័ន្ធភាពស៊ាំមានការឆ្លើយតបស្រដៀងគ្នាចំពោះវិធីសាស្ត្រធម្មតាដែលចាក់ថ្នាំបង្ការចូលសាច់ដុំដែរ។ 

 

«វ៉ាក់សាំងមួយដូសអាចត្រូវបានប្រើសម្រាប់ការចាក់បញ្ចូលក្រោមស្បែកចំនួន៥ដង»។ លោក Chalermpong ពន្យល់បែបនេះ មុនបន្តថា ការធ្វើបែបនេះ បង្កើតការឆ្លើយតបភាពស៊ាំស្រដៀងគ្នាវិធីសាស្រ្តធម្មតា។ ការណ៍នេះមានន័យថា ថៃអាចបង្កើនចំនួនវ៉ាក់សាំងកូវីដ-១៩ ដែលខ្លួនមានចំនួនប្រាំដងឯណោះ។ ការចាក់វ៉ាក់សាំងចូលក្រោមស្បែកប្រើប្រាស់ចំណុះវ៉ាក់សាំងតែ២៥ភាគរយនៃចំណុះវ៉ាក់សាំងដែលចាក់ចូលក្នុងសាច់ដុំ។ 

 

កន្លងមក ដោយសារការផ្ទុះឡើងវិញនៃជំងឺកូវីដ-១៩ ជាច្រើនលើក និងកង្វះខាតវ៉ាក់សាំងបណ្ដាលមកពីការពន្យាពេលដឹកជញ្ជូនវ៉ាក់សាំង និងសារធាតុផលិតវ៉ាក់សាំងថៃត្រូវងាកទៅរកវិធីសាស្ដ្រដែលមិនបានអនុញ្ញាតជាផ្លូវការពីអង្គការសុខភាពពិភពលោក។ តួយ៉ាង ថៃសម្រេចចាក់វ៉ាក់សាំងឆ្លាស់គ្នាដោយប្រើ Sinovac និង AstraZeneca ទៀតផង។

 

រហូតមកដល់ពេលនេះមានតែប្រជាជនជាង២១ភាគរយនៃប្រជាជនសរុប ៧២លាននាក់តែប៉ុណ្ណោះដែលទទួលបានថ្នាំបង្ការពេញលេញ៕