ក្នុងសុន្ទរកថាក្នុងកិច្ចប្រជុំ មហាសន្និបាតអង្គការសហប្រជាជាតិ លោក ស៊ី ជិនភីង បញ្ជាក់ថា ចិននឹងបង្កើនកិច្ចខិតខំប្រឹងប្រែងរបស់ខ្លួនក្នុងការប្រយុទ្ធប្រឆាំងបម្រែបម្រួលអាកាសធាតុ ហើយនឹងសម្រេចឱ្យបានគោលដៅអាព្យាក្រឹត្យកាបូនតាមការសន្យានៅឆ្នាំ២០៦០ ។

 

«គោលដៅនេះទាមទារឱ្យមានការខិតខំប្រឹងប្រែងយ៉ាងខ្លាំង ហើយយើងនឹងខិតខំប្រឹងប្រែងគ្រប់បែបយ៉ាងដើម្បីសម្រេចគោលដៅទាំងនេះ»។ លោក ស៊ី បញ្ជាក់បែបនេះ មុនប្រកាសថា ចិននឹងបង្កើនការគាំទ្រដល់ប្រទេសកំពុងអភិវឌ្ឍផ្សេងទៀតក្នុងការអភិវឌ្ឍថាមពលបៃតង និងការប្រើប្រាស់ថាមពលកាបូនទាប ហើយចិនមិនបង្កើតគម្រោងថាមពលថ្មីដើរដោយធ្យូងថ្មនៅក្រៅប្រទេសទៀតទេ។

 

សេចក្តីប្រកាសរបស់ប្រមុខរដ្ឋចិន គឺស្រដៀងទៅនឹងការប្ដេជ្ញារបស់កូរ៉េខាងត្បូង និងជប៉ុនដែលជាប្រទេសផ្តល់លុយដ៏ចម្បងសម្រាប់គម្រោងធ្យូងថ្មនៅបរទេស។ ការប្រកាសនេះ ក៏ទទួលបានការសាទរដែរ។ អង្គការបរិស្ថានអន្តរជាតិ 350.org ហៅសេចក្តីប្រកាសរបស់លោក ស៊ី ថាជាការប្តេជ្ញាដ៏ធំ និងអាចនាំឱ្យមានការប្រែប្រួលច្រើន។

 

ចំណែកឯអនុប្រធានផ្នែកអាកាសធាតុនិងសេដ្ឋកិច្ចនៃវិទ្យាស្ថានធនធានពិភពលោកលោកស្រី Helen Mountford អះអាងថា នេះជារបត់ប្រវត្តិសាស្រ្តដែលទាញពិភពលោកចេញពីការប្រើប្រាស់ឥន្ធនៈហ្វូស៊ីលដែលកង្វក់បំផុត។ ប៉ុន្តែលោកស្រីបន្ថែមថា អ្នកវិនិយោគឯកជនក៏ត្រូវចូលរួមក្នុងការប្ដេជ្ញាចិត្តនេះដែរ។ លោកស្រី ក៏កត់សម្គាល់ថា ចិននៅតែបន្តបង្កើនឧស្សាហកម្មធ្យូងថ្មដដែល។

 

ខណៈការប្រកាសរបស់លោក ស៊ី ជាការអនុវត្តនៅពេលខាងមុខ ចិននៅតែវិនិយោគទៅលើធ្យូងថ្មនិងជាអ្នកផ្តល់ជំនួយដ៏ធំបំផុតនៅក្នុងគម្រោងធ្យូងថ្មក្នុងប្រទេសកំពុងអភិវឌ្ឍដូចជាឥណ្ឌូណេស៊ី វៀតណាម និងបង់ក្លាដែស។ 

 

គួរបញ្ជាក់ថា ចិនបានប្រើប្រាស់ថាមពលដើរដោយធ្យូងថ្មថ្មីចំនួន៣៨,៤ជីហ្គាវ៉ាត់នៅឆ្នាំ២០២០ ដែលច្រើនជាងចំនួនបីដងធៀបទៅនឹងការប្រើប្រាស់ទូទាំងពិភពលោក៕