កីឡាអន្តរជាតិ
អន្តរជាតិ
ទោះគ្មានជើង ប៉ុន្តែ Zion Clark អាចប្រើដៃរត់បានក្នុងល្បឿនយ៉ាងលឿន
×
ជាសហគ្រិន វាគ្មិនខាងលើកទឹកចិត្ត អ្នកសម្តែង អ្នកនិពន្ធ និងជាអត្តពលិក Zion Clark អាយុ២៤ឆ្នាំ ដែលគ្មានជើងទាំងពីរតាំងពីកំណើត ក៏ជាម្ចាស់កំណត់ត្រាមួយរូបក្នុងសៀវភៅ Guinness World Records 2022 ផងដែរ។
កាលពីថ្ងៃទី១៥ ខែកុម្ភៈ ឆ្នាំ២០២១ Zion បានក្លាយជាម្ចាស់កំណត់ត្រា ខាងរត់ដោយដៃចម្ងាយ២០ម៉ែត្រ លឿនជាងគេបំផុតជាមួយនឹងថិរវេលា ៤,៧៨វិនាទី។ «អ្នកទាំងអស់គ្នា បានរីករាយ ខ្ញុំរីករាយ មិត្តស្រីរបស់ខ្ញុំក៏រីករាយផងដែរ... វាជាវេលាដ៏អស្ចារ្យសម្រាប់ខ្ញុំ»។ នេះជាការលើកឡើងរបស់ Zion។
កើតនៅថ្ងៃទី២៩ ខែកញ្ញា ឆ្នាំ១៩៩៧ នៅក្រុង Columbus រដ្ឋអូហៃយ៉ូ Zion ត្រូវបានយកទៅដាក់កន្លែងស្មុំកូនតាំងពីពេលកើតភ្លាម ហើយស្ថិតក្រោមប្រព័ន្ធថែទាំជាពិសេសរហូតដល់អាយុ១៦ឆ្នាំ មុននឹងរកបានគ្រួសារជាអចិន្ត្រៃយ៍មួយដោយមានអ្នកស្រី Kimberli Hawkins ជាម្តាយចិញ្ចឹម។
VIDEO
ដំណើរជីវិតរបស់ Zion បានជួបរឿងរ៉ាវជាច្រើន ជាពិសេសការប្រមាថមាក់ងាយ ការរើសអើង និងទង្វើដែលប៉ះពាល់អារម្មណ៍ផ្សេងៗ ប៉ុន្តែគេបានព្យាយាមជម្នះបញ្ហានេះ ហើយបន្តរស់នៅពោរពេញទៅដោយក្តីសង្ឃឹម។
ក្រោមការបង្ហាត់របស់លោក Butch Reynolds ម្ចាស់មេដាយមាសអូឡាំពិក និងជាម្ចាស់កំណត់ត្រាពិភពលោក Zion មានលំនឹងផ្លូវចិត្តយ៉ាងខ្លាំង ហើយគេព្យាយាមតស៊ូឲ្យសម្រេចគោលដៅខ្លួន តាមរយៈការប្រើពាក្យដ៏សាមញ្ញថា «No Excuses» (គ្មានការអភ័យទោស)។
ក្នុងបទសម្ភាសជាមួយសៀវភៅកំណត់ត្រាពិភពលោក Zion បាននិយាយថា៖ «ខ្ញុំនឹងតែងតែប្រឹងប្រែងតាមអ្វីដែលខ្ញុំមាន។ ខ្ញុំគ្មានអ្វីផ្សេងទៀតឡើយ ខ្ញុំប្រើប្រាស់ថាមពលខ្លួនតាមវិធីត្រឹមត្រូវ ដូច្នេះខ្ញុំអាចជោគជ័យ និងឈ្នះការប្រកួតប្រជែង»។
Zion មានក្តីសុបិនចង់ក្លាយជាអត្តពលិកអាមេរិកដំបូងដែលអាចចូលរួមប្រកួតក្នុងព្រឹត្តិការណ៍អូឡាំពិក លើវិញ្ញាសាបោកចំបាប់ និងព្រឹត្តិការណ៍កីឡាប៉ារ៉ាឡាំពិកលើវិញ្ញាសាប្រណាំងរទេះ នាឆ្នាំ២០២៤ ខាងមុខ ហើយគេមានជំនឿថា ខ្លួននឹងអាចធ្វើបាន៕
Tag:
Guinness World Records
© រក្សាសិទ្ធិដោយ thmeythmey.com