FIFA
កីឡាអន្តរជាតិ
អន្តរជាតិ
UEFA លែងប្ដឹង Barca, Real និង Juventus ទោះពួកគេរក្សាជំហរគាំទ្រ Super League
× សហព័ន្ធកីឡាបាល់ទាត់ទ្វីបអឺរ៉ុប (UEFA) បានបញ្ចប់ការប្តឹងប្ដល់ប្រឆាំងនឹងក្លិប Barcelona, Juventus និង Real Madrid ជុំវិញការចូលរួមរបស់ពួកគេក្នុងគម្រោងបង្កើតពានរង្វាន់អឺរ៉ុបថ្មី European Super League ។
Barcelona, Juventus និង Real Madrid ស្ថិតក្នុងចំណោមសមាជិកស្ថាបនិកទាំង១២ក្លិបដែលធ្លាប់គាំទ្ររួមគ្នាក្នុងការបង្កើត Super League។ យ៉ាងណាមកទល់ពេលនេះ មានក្លិប៩ហើយបានដកខ្លួនចេញវិញ។
៩ក្លិបផ្សេងទៀតបានដកខ្លួន ក៏ប៉ុន្តែក្លិបយក្សបី Barcelona, Juventus និង Real Madrid នៅតែរក្សាជំហរមិនបោះបង់ចោលគម្រោងនេះឡើយ បើទោះ UEFA មិនពេញចិត្ត និងគំរាមប្តឹងផ្តល់ថែមទៀតនោះ។ UEFA បានដាក់បណ្តឹងឱ្យមានការស៊ើបអង្កេតលើក្រុមទាំងបីពីបទ រំលោភបំពានសក្តានុពល នៃក្របខណ្ឌច្បាប់របស់ស្ថាប័នខ្លួនទៅតុលាការ។
យ៉ាងណាក៏ដោយ នៅជំហានចុងក្រោយ UEFA ប្រកាសថា ដំណើរការនីតិវិធីត្រូវបានចាត់ទុកជាមោឃៈ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
«បន្ទាប់ពីបន្តដំណើរការប្រឆាំងនឹងក្រុម Barcelona, Juventus និង Real Madrid នៅក្នុងបញ្ហាដែលទាក់នឹង Super League ស្ថាប័នបណ្តឹងឧទ្ធរណ៍របស់ UEFA បានប្រកាសនៅថ្ងៃនេះថាចាត់ទុកជាមោឃៈ»។ ស្ថាប័នបណ្តឹងឧទ្ធរណ៍របស់ UEFA និយាយដូច្នេះក្នុងសេចក្តីថ្លែងការណ៍មួយរបស់ខ្លួន។
ការសម្រេចបញ្ចប់ពាក្យបណ្តឹងរបស់ UEFA ធ្វើឡើងបន្ទាប់ពីតុលាការនៅទីក្រុងម៉ាឌ្រីតប្រទេសអេស្ប៉ាញបានសម្រេចថា UEFA មិនគួរដាក់ទណ្ឌកម្មលើក្លិបទាំងបីឡើយ បើទោះពួគេរក្សាជំហរគាំទ្រ Super League។
UEFA បានអះអាងថា ដំណើរការនីតិវិធីពាក្យបណ្តឹងរបស់ខ្លួនទៅលើក្លិប Barcelona, Juventus និង Real Madrid មិនដែលត្រូវបានបើកនោះទេ ដូច្នេះស្ថាប័នខ្លួនសម្រេចបញ្ចប់តែម្តង៕
Tag:
European Super League
UEFA
© រក្សាសិទ្ធិដោយ thmeythmey.com