អន្តរជាតិ
ទូតចិនប្រចាំចក្រភពអង់គ្លេសថា ការប៉ុនប៉ងរបស់បរទេសដើម្បីរារាំងចិន នឹងបរាជ័យ
× អគ្គរដ្ឋទូតចិនប្រចាំទីក្រុងឡុងដ៍លោក Zheng Zeguang នៅថ្ងៃទី២៨ ខែកញ្ញាបានលើកឡើងថា ការប៉ុនប៉ងរបស់បរទេសដើម្បីរារាំង ឬឡោមព័ទ្ធចិននឹងបរាជ័យជាក់ជាមិនខាន។ ដូចច្នេះមហាអំណាចនានាគួរតែចៀសវាងគំនិតអាណានិគមដែលនឹងនាំឱ្យមានការប្រឈមមុខដាក់គ្នាជាមួយចិនដែលជាសេដ្ឋកិច្ចធំទី២របស់ពិភពលោក។
សម្ព័ន្ធភាពសន្តិសុខឥណ្ឌូ-ប៉ាស៊ីហ្វិករវាងអាម៉េរិក អង់គ្លេស និងអូស្ត្រាលីដែលនឹងផ្តល់ឱ្យទីក្រុងកង់បេរ៉ានាវាមុជទឹកដើរដោយថាមពលនុយក្លេអ៊ែរ ធ្វើឱ្យចិននៅមិនស្ងៀមឡើយ។ សម្ព័ន្ធភាពថ្មីនេះ ត្រូវគេជឿថា ដាក់គោលដៅប្រឆាំងចិនតែម្ដង។ ប៉ុន្តែអគ្គរដ្ឋទូតចិនប្រចាំអង់គ្លេស បានរំឭកមហាអំណាចទាំងអស់ឱ្យគិតគូរយុទ្ធសាស្រ្តរបស់ខ្លួន។
អំឡុងពិធីអបរខួបលើកទី៧២ នៃការបង្កើតសាធារណរដ្ឋប្រជាមានិតចិននៅថ្ងៃទី២៨ ខែកញ្ញា អគ្គរដ្ឋទូតចិនប្រចាំចក្រភពអង់គ្លេសលោក Zheng Zeguang បានថ្លែងថា បក្សកុម្មុយនីស្តចិនបាន កំចាត់ជនបរទេសដែលជិះជាន់ និងបានកសាងប្រទេសឡើងវិញដោយបានស្រោចស្រង់ប្រជាជនជាង ៧៧០ លាននាក់ចេញពីភាពក្រីក្រក្នុងរយៈពេលត្រឹមតែកន្លះសតវត្សរ៍។ ដូចនេះការព្យាយាមរបស់បរទេសទាំងឡាយ មិនអាចទប់ចិនបានឡើយ។
«ការប៉ុនប៉ងដើម្បីរារាំង ឬឡោមព័ទ្ធចិន មិនដែលទទួលបានជោគជ័យឡើយក្នុងប្រវត្តិសាស្ត្រ ហើយនេះក៏នឹងត្រឹមតែជាសុបិនដែលមិនអាចទៅរួចនាពេលអនាគត។ គ្មាននរណាម្នាក់អាចរារាំងប្រជាជនចិនមិនឱ្យមានការរីកចម្រើនបន្ថែមទៀតនោះទេ»។ លោក Zeng អះអាងបែបនេះ។ ទន្ទឹមនេះ លោកក៏បានបញ្ជាក់ថា មហាអំណាចទាំងនោះគួរតែបោះបង់ចោលចិត្តគំនិតអាណានិគម និងផែនការដែលអាចធ្វើឱ្យមានការបាក់បែកគ្នា ឬប្រឈមមុខដាក់គ្នា។
ក្នុងពិធីដដែល អគ្គរដ្ឋទូតចិនរូបនេះក៏បាននិយាយចំៗទៅកាន់ចក្រភពអង់គ្លេសថា ចក្រភពអង់គ្លេសគួរតែធ្វើការលើការកែលម្អទំនាក់ទំនងជាមួយទីក្រុងប៉េកាំងបន្ទាប់មានបញ្ហាល្អក់កករមួយចំនួនក្នុងរយៈពេលប៉ុន្មានខែចុងក្រោយនេះ។ ថ្មីៗនេះ លោក Zeng ត្រូវបានរារាំងពីការចូលរួមពិធីមួយនៅសភាអង់គ្លេសផងដែរ។
អ្នកការទូតចិនរូបនេះ ក៏ឆ្លៀតលើកគុណសម្បត្តិនៃការដឹកនាំរបស់បក្សកុម្មុយនីស្តចិន ដោយលោកអះអាងថាប្រព័ន្ធនយោបាយសង្គមនិយម និងបក្សកុម្មុយនីស្តចិន មានសារសំខាន់ណាស់សម្រាប់ការអភិវឌ្ឍរបស់ចិន។ លោកសង្កត់ធ្ងន់ថា មានតែ CPC និងប្រព័ន្ធនយោបាយសង្គមនិយមប៉ុណ្ណោះ ដែលអាចធ្វើឱ្យចិនអភិវឌ្ឍបានមកដល់ពេលនេះ៕
Tag:
ចិន
អង់គ្លេស
អាម៉េរិក
© រក្សាសិទ្ធិដោយ thmeythmey.com