ព្រះ​ករុណា ព្រះបាទ​សម្ដេច ​ព្រះបរមនាថ នរោត្ដម សីហមុនី ព្រះមហាក្សត្រកម្ពុជា ទ្រង់បានប្រទានព្រះរាជសារជូនទៅលោក ស៊ី ជិនភីង ប្រធានធិបតីចិន ដើម្បីអបអរសាទរខួប៧២ឆ្នាំ នៃការបង្កើតសាធារណរដ្ឋប្រជាមានិតចិន។ នៅថ្ងៃទី១ ខែតុលា ឆ្នាំ១៩៤៩ ចិន បានប្រកាសជាផ្លូវការការបង្កើតសាធារណរដ្ឋប្រជាមានិតចិន។

 

តាមរយៈព្រះរាជសារ ដែលឡាយព្រះហស្ថលេខានៅថ្ងៃទី២៣ ខែកញ្ញា ឆ្នាំ២០២១ ព្រះករុណាជាម្ចាស់ជីវិតលើត្បួង ទ្រង់មានព្រះបន្ទូលទៅកាន់លោក ស៊ី ជិនភីង ថា កម្ពុជា ប្តេជ្ញារក្សាចំណងមិត្តភាព និងកិច្ចសហប្រតិបត្តិការជាមួយចិន។ ព្រះករុណា មានព្រះរាជឱង្ការថា៖«ព្រះរាជាណាចក្រកម្ពុជា នឹងឈរនៅជាមួយចិន និងគាំទ្រគោលនយោបាយតែមួយរបស់ចិនជានិច្ច»។ 
 

ជាមួយគ្នានេះ ព្រះនរបតី ទ្រង់កោតសរសើរចំពោះជោគជ័យរបស់ចិន ក្នុងការកសាងសង្គមចិនឲ្យថ្កុំថ្កើង។ ព្រះអង្គ ក៏បានកោតសរសើរពីទស្សនវិស័យរបស់លោក ស៊ី ជិនភីង ផងដែរ ចំពោះការកសាងសហគមន៍សុខភាពពិភពលោក ហើយជាក់ស្តែង ចិន បានផ្តល់វ៉ាក់សាំងបង្ការជំងឺកូវីដ-១៩ ដល់ទៅ២ពាន់លានដូសហើយ នៅទូទាំងពិភពលោក៕