សម្ដេច ស ខេង មើលឃើញការដឹកនាំរបស់មន្ត្រីមូលដ្ឋាននេះ គឺសំខាន់ណាស់ ដូច្នេះបើពួកគេធ្វើការមិនល្អនោះ វានឹងនាំគ្រោះឱ្យគណបក្សផងដែរ។ ក្រៅពីតួអង្គទាំង៤នោះ ក៏មានកត្តាថ្នាក់លើដែរ។
 

«ការពិតហើយមូលហេតុដែលនាំឱ្យជោគជ័យ ឬមិនជោគជ័យ គឺអាចថាមានកត្តាខាងលើ(ថ្នាក់លើ)ដែរ មិនមែនអត់ទេ អាហ្នឹងក៏យើងខិតខំប្រឹងប្រែង តាំងពីខាងលើ ពីស្រុក ពីខេត្ត ពីថ្នាក់កណ្ដាលស្អីខ្លះ ។ ក៏ប៉ុន្តែការបោះឆ្នោតឃុំ-សង្កាត់ គឺ(ពលរដ្ឋ)គាត់មើលហ្នឹងណា គាត់មើលមេភូមិធ្វើការបម្រើឱ្យគាត់បានល្អទេ? គាត់ត្រូវការអត្តសញ្ញាណបណ្ណ គាត់ត្រូវការលិខិតកំណើត ឬសេវាផ្សេងៗ តើមានការយឺតយ៉ាវ ឬមានការលំបាក។ ប៉ុស្តិ៍បូលិសនៅក្នុងឃុំហ្នឹងមានចោរលួច ចោរប្លន់ (ប៉ូលិស) មិនបានគិតគូ មិនបានយកចិត្តទុកដាក់ ឬក៏បញ្ហាផ្សេងៗទៀត កៀបសង្កត់យកលុយយកកាក់ពីប្រជាពលរដ្ឋ។ មេឃុំក៏ដូចគ្នាដែរ»។ នេះបើតាមប្រមុខក្រសួងមហាផ្ទៃ ដែលបានសង្កត់ធ្ងន់ថា សម្ដេចបានរកឃើញបញ្ហាបម្រើផលប្រយោជន៍ពលរដ្ឋ ដែលកើតចេញពីតួអង្គទាំង៤នាក់នេះ នៅតាមមូលដ្ឋានជាច្រើនកន្លែងមកហើយ។
 

«ប្រជាពលរដ្ឋ គាត់ថា ខ្ញុំមានស្អប់ឯណាថ្នាក់ដឹកនាំកំពូល សម្ដេច ហ៊ុន សែន សម្ដេច ហេង សំរិន សម្ដេច សាយ ឈុំ អីជាដើម។ ប៉ុន្តែបើបោះឆ្នោតឱ្យពួកហ្នឹងទៅ (មេឃុំ-សង្កាត់) ពួកហ្នឹង ដឹកនាំដដែល ធ្វើបាបខ្ញុំដដែល។ ប្រយ័ត្នណា ប្រយ័ត្នកន្លែងហ្នឹង»។ នេះជាការបន្ថែមរបស់សម្ដេច ស ខេង។
 

ដើម្បីទទួលបានការគាំទ្រពីប្រជាពលរដ្ឋវិញ សម្ដេច ស ខេង បានបញ្ជាឱ្យក្រុមការងារគណបក្ស និងក្រុមការងាររដ្ឋាភិបាល ចុះប្រមូលបញ្ហាប្រឈម អសកម្ម ដូចជាបញ្ហាទំនាស់ដីធ្លីជាដើម យកមកដោះស្រាយជូនពលរដ្ឋ ដោយមិនត្រូវទុកករណីទាំងនោះចោលឡើយ។ ជាពិសេសស្ដាប់មតិ និងដោះស្រាយបញ្ហាពលរដ្ឋគ្រប់ទីកន្លែង៕