នៅទូទាំងពិភពលោកសព្វថ្ងៃ ភាសាជាង៧ពាន់ត្រូវបានប្រើប្រាស់ ខណៈភាសាមួយចំនួនត្រូវប្រើប្រាស់តែក្នុងតំបន់ប៉ុណ្ណោះ។ នេះបើយោងតាមឯកសារប្រចាំឆ្នាំរបស់គេហទំព័រ Ethnologue។ ប្រទេសមួយអាចប្រើប្រាស់ភាសាជាច្រើនតាមតំបន់នីមួយៗក្នុងប្រទេស។ លើសពីនេះទៀតប្រទេសខ្លះ បានបញ្ចូលភាសាលើសពីពីរជាភាសាផ្លូវការរបស់ប្រទេសផងដែរ។ ជាក់ស្តែងដូចជា ប្រទេសបូលីវីដែលមានភាសាផ្លូវការរហូតដល់ទៅ ៣៧ភាសា។ នេះបើយោងតាមរដ្ឋធម្មនុញ្ញឆ្នាំ២០០៩ របស់ប្រទេសនេះ។ 

តាមរបាយការណ៍ពីគេហទំព័រ Ethnologue ភាសាចំនួន ១០ ត្រូវបានប្រើប្រាស់ច្រើនជាងគេបំផុតក្នុងចំណោមភាសាជាង ៧ ពាន់ផ្សេងៗ។ 

ភាសាទាំង១០ នេះរួមមាន៖
 

១. ភាសាអង់គ្លេស 

ភាសាអង់គ្លេស ត្រូវបានប្រើប្រាស់ដោយមនុស្សច្រើន១,៣ពាន់លាននាក់​។ ភាសានេះ ជាភាសាពេញនិយមបំផុតមួយក្នុងទំនាក់ទំនងលើពិភពលោកមិនថាសេដ្ឋកិច្ច ពាណិជ្ជកម្ម ច្បាប់ ឬទំនាក់ទំនងការទូតឡើយ។​

 

២. ភាសាចិន

តាមប្រកៀកនឹងភាសាអង់គ្លេស គឺភាសាចិន ដោយមានមនុស្សជាង​ 

១,៣ពាន់លាននាក់ប្រើប្រាស់។

 

៣. ភាសាហិណ្ឌី 

ជាភាសាដែលត្រូវបានមនុស្សប្រមាណ ៦០០ លាននាក់លើពិភពលោកដូចជាផ្នែកជាច្រើននៅឥណ្ឌា និងប៉ាគីស្ថាន។

 

៤. ភាសាអេស្ប៉ាញ

ប្រជាជនលើពិភពលោកជាង៥៤៣លាននាក់ចេះនិយាយភាសានេះ។ អេស្ប៉ាញ និងប្រទេសអាម៉េរិកខាងត្បូង សុទ្ធតែប្រើប្រាស់ភាសានេះ។

 

៥.​ ភាសាស្តង់ដារអារ៉ាប់

ប្រជាជនជាង ២៧៤ លាននាក់អាចប្រើប្រាស់ភាសាអារ៉ាប់នេះបាន ពិសេសនៅមជ្ឈិមបូព៌ា។

 

៦. ភាសាបេងហ្កាលី (Bengali) 

បេងហ្កាលី ជាភាសាផ្លូវការរបស់បង់ក្លាដេសដែលមានមនុស្សប្រមាណ២៦៨លាននាក់ប្រើប្រាស់ ភាគច្រើនបំផុតនៅប្រទេសនេះផ្ទាល់។

 

៧. ភាសាបារាំង 

បារាំង ក៏ជាភាសាមានប្រើច្រើនដែរ ពិសេសក្នុងវិស័យច្បាប់។ មនុស្សជាង២៦៧ លាននាក់ប្រើប្រាស់ភាសានេះ។

 

៨. ភាសារុស្ស៊ី 

ភាសារុស្ស៊ីមានមនុស្សជាង ២៥៨ លាននាក់អាចប្រើប្រាស់ភាសានេះបាន ដោយក្នុងចំណោមនោះ មានប្រជាជនជាង ១៥៤ នាក់ជាជនជាតិដើមប្រើប្រាស់ភាសានេះស្រាប់។

 

៩.ភាសាព័រទុយហ្កាល់ 

ជាភាសាដែលមានមនុស្សជាង ២៥៨ លាននាក់ប្រើប្រាស់ ដែលជាចំនួនប្រហាក់ប្រហែលនឹងចំនួនអ្នកចេះភាសារុស្ស៊ីដែរ។ ប្រេស៊ីលជាប្រទេសនៅអាម៉េរិកខាងត្បូងមួយគត់ ប្រើភាសាព័រទុយហ្កាល់ជាផ្លូវការ។

 

១០. ភាសាអ៊ូឌូ (Urdu)

ភាសានេះជាភាសាផ្លូវការរបស់ប៉ាគីស្ថាន ជាភាសាដែលស្រដៀងនឹងភាសាហិណ្ឌីនិងមានពាក្យចម្ចីជាច្រើនពីភាសាអារ៉ាប់ មានមនុស្សជាង ២៣០ លាននាក់ប្រើប្រាស់នៅប៉ាគីស្ថាន និងតំបន់ខ្លះក្នុងប្រទេសឥណ្ឌាជាដើម។

 

ក្នុងចំណោមភាសាទាំង១០​ខាងលើ ភាសាអង់គ្លេស ចិន អេស្ប៉ាញ អារ៉ាប់ បារាំង និងរុស្ស៊ីត្រូវបានប្រើប្រាស់ជាភាសាផ្លូវការក្នុងអង្គការសហប្រជាជាតិ៕