ប្រធានាធិបតីអាម៉េរិក ចូ បៃឌិន និងសមភាគីចិន ស៊ី ជិនភីង មិនទាន់បានជួបមុខគ្នាដោយផ្ទាល់ឡើយ តាំងពីលោក បៃឌិន ឡើងកាន់តំណែងមុខ។ មេដឹកនាំទាំងពីរ បានជជែកគ្នាតាមទូរស័ព្ទពីរដងដែរ។ មន្រ្តីអាម៉េរិក និងចិន កំពុងត្រៀមខ្លួនដើម្បីរៀបចំជំនួបបៃឌិន-ស៊ី ដែលគ្រោងធ្វើតាមប្រព័ន្ធវីដេអូនៅមុនដំណាច់ឆ្នាំ២០២១ នេះ។
 

ដំណឹងនៃការឯកភាពគ្នាខាងលើ ត្រូវបានបញ្ចេញដោយមន្រ្តីសេតវិមានក្រោយកិច្ចប្រជុំថ្ងៃទី៦ ខែតុលា ក្នុងទីក្រុង Zurich ស្វ៊ីស រវាងទីប្រឹក្សាសន្តិសុខជាតិអាម៉េរិកលោក Jake Sullivan បានជួបជាមួយ សមាជិកគណៈមជ្ឈិមបក្សកុម្មុយនីស្តចិន លោក Yang Jiechi ។ កិច្ចប្រជុំខាងលើនេះ ជាជំនួបបន្តពីការជជែកតាមទូរស័ព្ទរបស់លោក បៃដិន នៅថ្ងៃទី ៩ ខែកញ្ញាជាមួយលោក ស៊ី ។ ភាគីទាំងពីរបានបញ្ជាក់ថា កិច្ចពិភាក្សា៦ម៉ោងនេះ មានលក្ខណៈស្ថាបនា និងស្មោះត្រង់។
 

«ពួកយើងពិតជាមានកិច្ចសន្ទនាដែលបានព្រមព្រៀងគ្នាជាគោលការណ៍ដើម្បីរៀបចំកិច្ចប្រជុំទ្វេភាគីតាមប្រព័ន្ធអនឡាញមុនដំណាច់ឆ្នាំនេះ»។ មន្ត្រីអាម៉េរិកប្រាប់អ្នកសារព័ត៌មានបែបនេះនៅថ្ងៃទី៦ ខែតុលា។
 

យោងតាមសេចក្តីថ្លែងការណ៍របស់សេតវិមាន លោក Sullivan បានបញ្ជាក់ក្នុងជំនួបជាមួយលោក Yang ថា ខណៈពេលអាម៉េរិកនឹងបន្តពង្រឹងទំនាក់ទំនងនិងធ្វើការយ៉ាងជិតស្និទ្ធជាមួយសម្ព័ន្ធមិត្តនិងដៃគូ អាម៉េរិកក៏នឹងបន្តចូលរួមជាមួយចិនដើម្បីធានាការប្រកួតប្រជែងប្រកបដោយការទទួលខុសត្រូវ។ យ៉ាងណាមិញ លោក Sullivan ក៏បារម្ភអំពីសកម្មភាព របស់ចិននៅសមុទ្រចិនខាងត្បូងក៏ដូចជាសិទ្ធិមនុស្សនៅស៊ីនជាំង និងជំហររបស់ទីក្រុងប៉េកាំងចំពោះហុងកុង និងតៃវ៉ាន់។
 

ចំណែកសេចក្ដីថ្លែងការណ៍មួយរបស់ក្រសួងការបរទេសចិនបានប្រកាសថា លោក Yang បានប្រាប់លោក Sullivan អំពីផលវិបាកនៃការប្រឈមមុខដាក់គ្នាដែលនឹងធ្វើឱ្យប៉ះពាល់ផលប្រយោជន៍ប្រទេសទាំងពីរ និងពិភពលោក។ បន្ថែមពីនេះក្រសួងការបរទេសចិនលើកឡើងថា ភាគីទាំងពីរបានយល់ព្រមចាត់វិធានការដើម្បីពង្រឹងទំនាក់ទំនងជាយុទ្ធសាស្ត្រ គ្រប់គ្រងភាពខុសគ្នា ហើយចៀសវាងជម្លោះនិងការប្រឈមមុខដាក់គ្នា៕