ការសិក្សាបានរកឃើញថា សុខភាពផ្លូវចិត្តពិតជាមានទំនាក់ទំនងទៅនឹងសុខភាពមនុស្សពិសេសសុខភាពសរសៃឈាម និងបេះដូង។ ប្រសិនបើអ្នកមានបញ្ហាសតិអារម្មណ៍មិនល្អ វាអាចនឹងបង្កហានិភ័យឡើងសម្ពាធឈាម ដាច់សរសៃឈាមខួរក្បាល ជំងឺគាំងបេះដូង និងជំងឺបេះដូង។ មួយវិញទៀត នេះជាហានិភ័យដែលវិវដ្ដក្នុងពេលយូរ។ ដូច្នេះបើទោះពេលនេះអ្នកមិនមានបញ្ហាទាំងនេះ តែ១០ឆ្នាំក្រោយការស្ត្រេសខ្លាំងនឹងធ្វើឱ្យអ្នកប្រឈមនឹងវា។ 

 

អំណះអំណាងខាងលើ បានធ្វើឡើងដោយផ្អែកលើការសិក្សាដែលមានអ្នកចូលរួម ៤១២នាក់ មានអាយុចន្លោះ៤៨ឆ្នាំ ដល់៨៧ឆ្នាំ ចាប់ពីឆ្នាំ២០០៥ ដល់ឆ្នាំ២០១៨។ ការសិក្សាបានធ្វើតេស្តអរម៉ូន ៣ប្រភេទដូចជា អរម៉ូនណូអេពីនេព្រីន អេពីនេព្រីន និងដូផាមីន ដែលមាននាទីតម្រូវប្រព័ន្ធសរសៃប្រសាទ និងគ្រប់គ្រងចង្វាក់បេះដូង សម្ពាធឈាម និងដង្ហើមផងដែរ។ អ្នកជំនាញក៏បានសិក្សាពីអរម៉ូនករទីសូល ដែលជាអរម៉ូនបញ្ចេញដោយរាងកាយដើម្បីឆ្លើយតបនឹងភាពស្ត្រេស ឬភាពតានតឹងផ្សេងៗ។

 

លោក Kosuke Inoue អ្នកនិពន្ធការសិក្សា និងជាជំនួយការសាស្ត្រាចារ្យផ្នែកជំងឺរាតត្បាតនៃសាកលវិទ្យាល័យ Kyoto របស់ជប៉ុន បានអះអាងថា៖ «អរម៉ូនណូអេពីនេព្រីន អេពីនេព្រីន ដូផាមីន និងអរម៉ូនករទីសូល អាចកើនឡើង ស្របតាមភាពស្ត្រេសរបស់មនុស្សដោយសារបញ្ហាជីវិត ការងារ ទំនាក់ទំនង ហិរញ្ញវត្ថុ និងបញ្ហាអ្វីៗផ្សេងជាច្រើនទៀត។» 

 

នៅពេលកម្រិតអរម៉ូនទាំង៤ រួមបញ្ចូលគ្នាកើនឡើងទ្វេដង ហានិភ័យនៃការឡើងសម្ពាធឈាមក៏កើនចន្លោះពី២១ ទៅ៣១ភាគរយ។ ប្រសិនបើកម្រិតអរម៉ូនករទីសូលកើនឡើង វាបានផ្សារភ្ជាប់នឹងហានិភ័យនៃការមានជំងឺសរសៃឈាមបេះដូងប្រមាណ ៩០ភាគរយឯណោះ។ លើសពីនេះ ការសិក្សាបានបង្ហាញថា ហានិភ័យនៃជំងឺទាំងនេះភាគច្រើន កើតឡើងលើអ្នកមានអាយុក្រោម ៦០ឆ្នាំ។

 

ប្រសិនបើអ្នកមានបញ្ហាតានតឹងអារម្មណ៍ និងស្ត្រេសខ្លាំង អ្នកគួររកពេលសម្រាកសម្រួលអារម្មណ៍ និងធ្វើលំហាត់ប្រាណ ដើម្បីចៀសវាងការប្រឈមនឹងហានិភ័យនៃជំងឺដាច់សរសៃឈាម ឡើងសម្ពាធឈាម និងជំងឺបេះដូងដែលអាចបណ្តាលឱ្យប៉ះពាល់ដល់អាយុជីវិត៕