ក្នុងខួបលើកទី១១០ នៃបដិវត្តន៍ផ្តួលរម្លំអធិរាជចិន លោកប្រធានាធិបតី ស៊ី ជិនភីង បានប្តេជ្ញាបង្រួបបង្រួមជាតិ ប្រកបដោយសន្តិវិធី ដែលខុសពីពេលកន្លង ដែលមេដឹកនាំចិន តែងព្រមានប្រើកម្លាំងទ័ពលើតៃវ៉ាន់ ដើម្បីបង្រួបបង្រួមប្រទេស។ យ៉ាងណាមិញ មេដឹកនាំរូបនេះ ក៏បានព្រមានរដ្ឋាភិបាលក្រុងតៃប៉ិផងដែរថា ការប្រកាសឯករាជ្យភាព គឺជាទង្វើប្រឆាំងប្រវត្តិសាស្រ្ត និងមិនអាចទទួលជោគជ័យ។ 

 

ពីមហាវិមានប្រជាជនចិន មេដឹកនាំចិន បានទទួលស្គាល់ថា ការបំបែករដ្ឋ​ និងប្រកាសឯករាជ្យរបស់តៃវ៉ាន់ គឺជាឧបសគ្គធំបំផុត ដើម្បីសម្រេចបានការបង្រួបបង្រួមប្រទេស និងជាគ្រោះថ្នាក់ដ៏ធ្ងន់ធ្ងរបំផុត ចំពោះការស្តារប្រទេសឡើងវិញ។ បើតាមលោក ស៊ី គ្មាននរណាម្នាក់ អាចមើលស្រាលការប្តេជ្ញាចិត្ត, ឆន្ទៈដ៏ម៉ឺងម៉ាត់ និងសមត្ថភាពដ៏ខ្លាំងរបស់ប្រជាជនចិន ក្នុងការការពារអធិបតេយ្យភាពជាតិ និងបូរណភាពទឹកដីឡើយ។ 

 

ក្នុងន័យនេះ ប្រមុខរដ្ឋចិន បន្តលើកឡើងដដែលថា ការបង្រួបបង្រួម ដែនដីចិន និងតៃវ៉ាន់ គឺជាបេសកម្មប្រវត្តិសាស្រ្ត។ លោក ស៊ី ធ្លាប់អះអាងបែបនេះម្តងហើយនៅក្នុងខួប ១០០ឆ្នាំនៃបក្សកុម្មុយនីស្តចិន។ នៅក្នុងឆ្នាំ ២០១៩​ កន្លងទៅ ​ប្រធានាធិបតីចិន ធ្លាប់បានគំរាមប្រើកម្លាំងយោធា ដើម្បីគ្រប់គ្រងកោះតៃវ៉ាន់ដែរ។ 

 

ក្រោយការលើកឡើងរបស់ ប្រធានាធិបតីចិន តៃវ៉ាន់បានឆ្លើយតបភ្លាម​ៗ និងប្រាប់ឱ្យរដ្ឋាភិបាលទីក្រុងប៉េកាំង បោះបង់បំណងបង្ខិតបង្ខំតៃវ៉ាន់ឱ្យរួបរួមជាមួយចិន។ «អនាគតតៃវ៉ាន់នាពេលអនាគត នឹងស្ថិតក្នុងដៃរបស់ប្រជាជនតៃវ៉ាន់»។ ការិយាល័យប្រធានាធិបតីតៃវ៉ាន់ បានបញ្ជាក់បែបនេះ ដោយបន្ថែមថា តៃវ៉ាន់ ជាប្រទេសឯករាជ្យ និងមិនមែនជាផ្នែកមួយនៃសាធារណរដ្ឋប្រជាមានិតចិនទេ។ ក្រុងតៃប៉ិ ក៏បានបដិសេធការអនុវត្តគោលនយោបាយ «ប្រទេសមួយប្រព័ន្ធពីរ»របស់ចិនផងដែរ។

 

នាប៉ុន្មានថ្ងៃមុន កងទ័ពអាកាសចិន បានបញ្ជូនយន្តហោះចម្បាំងជិត ១៥០ គ្រឿង ក្នុងរយៈពេល ៤ ថ្ងៃជាប់ៗគ្នា ចូលទៅក្នុងតំបន់ការពារដែនអាកាសរបស់តៃវ៉ាន់។ ជាការឆ្លើយតប តៃវ៉ាន់បានបញ្ជូនយន្តហោះទៅឃ្លាំមើល និងពង្រាយប្រព័ន្ធការពារមីស៊ីល៕