អន្តរជាតិ
នយោបាយអន្តរជាតិ
ស្ថានទូតចិនរិះគន់អតីតនាយករដ្ឋមន្ត្រីអូស្ត្រាលី Abbott ដែលរិះគន់ចិនពេលទស្សនកិច្ចនៅតៃវ៉ាន់ អតីតនាយករដ្ឋមន្រ្តីអូស្ត្រាលី Tony Abbott ឈរក្បែរមេដឹកនាំតៃវ៉ាន់ Tsai Ing-wen ។ រូបថតពីវេបសាយការិយាល័យប្រធានាធិបតីតៃវ៉ាន់
× ស្ថានទូតចិនប្រចាំទីក្រុងកង់បេរ៉ា នៅថ្ងៃទី៩ ខែតុលា បានរិះគន់អតីតនាយករដ្ឋមន្ត្រីអូស្ត្រាលី Tony Abbott ដែលរិះគន់ទីក្រុងប៉េកាំងខ្លាំងអំឡុងដំណើរទស្សនកិច្ចនៅកោះតៃវ៉ាន់។ លោក Abbott ចោទចិនថា ធ្វើសកម្មភាពបំពានមិនត្រឹមតែតៃវ៉ាន់ឡើយ តែដាក់គោលដៅលើអូស្ត្រាលីថែមទៀត។ ស្ថានទូតចិនចាត់ទុកលោក Abbott ជាបុគ្គលប្រឆាំងចិន។
អតីតនាយករដ្ឋមន្ត្រីអូស្ត្រាលី Tony Abbott បានធ្វើឱ្យទីក្រុងប៉េកាំងឆេះដុំយ៉ាងខ្លាំងចំពោះការអធិប្បាយរបស់លោកអំឡុងទស្សនកិច្ចនៅកោះតៃវ៉ាន់នៅក្នុងសប្ដាហ៍នេះ។ ក្នុងដំណើរទស្សនកិច្ចលក្ខណៈឯកជនទៅកាន់ដែនកោះដែលចិនចាត់ទុកជាអាណាខេត្តមួយរបស់ខ្លួន លោក Abbott បានរិះគន់រដ្ឋាភិបាលចិនចំៗជុំវិញទង្វើដែលលោកចាត់ទុកជាការគំរាមគេឯង។
លោក Abbott ក៏ជួបប្រធានាធិបតីតៃវ៉ាន់ Tsai Ing-wen និងប្រើពាក្យសម្ដីធ្ងន់ៗដាក់ចិនទៀតផង។ អំឡុងវេទិកាសន្តិសុខមួយ នាយករដ្ឋមន្ត្រីអូស្ត្រាលីពីឆ្នាំ២០១៣ ដល់ឆ្នាំ២០១៥ រូបនេះ អះអាងថា អំណាចរបស់ចិនប្រហែលឈានដល់ចំណុចកំពូលដោយប្រជាជនកាន់តែចាស់ សេដ្ឋកិច្ចកាន់តែយឺត ហើយផ្នែកហិរញ្ញវត្ថុក៏យ៉ាប់យ៉ឺនដែរ។
ស្ថានទូតចិននៅអូស្ត្រាលី ក៏ឆ្លើយតបការលើកឡើងរបស់លោក Abbott វិញ ដោយហៅអតីតប្រមុខរដ្ឋាភិបាលអូស្ត្រាលីរូបនេះ ជាអ្នកនយោបាយគួរឱ្យអាណិត និងជាជនបរាជ័យ។ ក្នុងសេចក្ដីថ្លែងការណ៍លើវេបសាយរបស់ខ្លួន ស្ថានទូតចិនរិះគន់លោក Abbott ទៀតថា សកម្មភាពគួរឱ្យស្អប់ និងលីលានៅតៃវ៉ាន់ បង្ហាញពីឥរិយាបថប្រឆាំងចិនរបស់អតីតមេដឹកនាំអូស្ត្រាលី។
«វានឹងធ្វើឱ្យលោកកាន់តែអាប់យសថែមទៀត។» ស្ថានទូតចិនបញ្ជាក់បែបនេះ។
មិនត្រឹមរិះគន់ចិនឡើយ លោក Abbott ក៏និយាយដល់អាម៉េរិកផងដែរ។ មេដឹកនាំអូស្ត្រាលីរូបនេះ ជឿថា អាម៉េរិកមិននស្ងៀមឱ្យចិនក្រសោបយកតៃវ៉ាន់ដោយស្រួលឡើយ។
Tag:
ចិន
អូស្ត្រាលី
តៃវ៉ាន់
© រក្សាសិទ្ធិដោយ thmeythmey.com