នៅក្នុងការបង្ហោះជាបន្តបន្ទាប់នៅលើបណ្តាញ Twitter នៅថ្ងៃទី១១ ខែតុលា គណៈកម្មាធិការវ៉ាក់សាំងម៉ាឡេស៊ី អះអាងថា វ៉ាក់សាំងបង្ការជំងឺកូវីដ-១៩ សរុបជាង៤៥លានដូស ត្រូវបានប្រើប្រាស់ចាប់តាំងការចាប់ផ្តើមកម្មវិធីចាក់ថ្នាំវ៉ាក់សាំងថ្នាក់ជាតិរហូតមកដល់ពេលនេះ។ គណៈកម្មាធិការដដែល ក៏បានរាយការណ៍ផងដែរថា៩៤,៨ភាគរយនៃប្រជាជនពេញវ័យទាំងអស់ បានទទួលវ៉ាក់សាំងបង្ការជំងឺកូវីដ-១៩ យ៉ាងតិចមួយដូសរួចហើយ។
 

ទន្ទឹមកនឹងចំនួនពលរដ្ឋចាក់វ៉ាក់សាំងរួចមានចំនួនលើស៩០ភាគរយបែបនេះ នាយករដ្ឋមន្រ្តីម៉ាឡេស៊ីលោក អ៊ីស្មាអ៊ីល សាប៊្រី យ៉ាកុប ប្រកាសនៅថ្ងៃទី១០ ខែ តុលាថា នឹងបើកដំណើរការទេសចរណ៍ក្នុងស្រុកចាប់ពីថ្ងៃទី ១១ ខែតុលា។ ប៉ុន្តែប្រជាជនទាំងនោះត្រូវចាក់វ៉ាក់សាំងឱ្យបានពេលលេញជាមុនទើបអាចធ្វើដំណើរបាន។ 
 

«ប្រជាជនម៉ាឡេស៊ីមានសេរីភាពជួបជុំជាមួយពុកម្តាយរបស់ពួកគេ ហើយថែមទាំងធ្វើដំណើរកំសាន្តផងដែរ» ។ លោក អ៊ីស្មាអ៊ីល លើកឡើងបែបនេះស្របពេល ៩០ ភាគរយនៃប្រជាជនពេញវ័យបានចាក់វ៉ាក់សាំងពេលលេញហើយ។
 

យោងតាមក្រសួងសុខាភិបាលម៉ាឡេស៊ី ចំនួនករណីឆ្លងសរុបនៅទូទាំងប្រទេស កើនឡើងដល់ជាង២លាន៣សែននាក់ ខណៈអ្នកស្លាប់សរុបកើនឡើងដល់ជាង២ម៉ឺន៧ពាន់នាក់។

ម៉ាឡេស៊ីបានប្រើប្រាស់ វ៉ាក់សាំង AstraZeneca, CanSino Biologic, វ៉ាក់សាំង Janssen របស់ក្រុមហ៊ុន Johnson & Johnson និងវ៉ាក់សាំង Sinovac ផងដែរ៕