ជាតិ
សេដ្ឋកិច្ច
អគ្គនាយកគយ សម្រេចបញ្ចុះតម្លៃគិតពន្ធដល់២០ភាគរយ លើរថយន្តដែលគ្មានពន្ធ និងអាករនាំចូល លោក គុណ ញឹម អគ្គនាយកគយនិងរដ្ឋាករកម្ពុជា។ រូបថត៖ GDC
× ភ្នំពេញ៖ លោក គុណ ញឹម ដែលជាអគ្គនាយកគយនិងរដ្ឋាករកម្ពុជា បានសម្រេចបញ្ចុះអត្រាពន្ធ ចំពោះរថយន្តគ្មានពន្ធ និងអាករនាំចូល ដែលមានស្រាប់នៅកម្ពុជា ចាប់ពី១០ទៅ២០ភាគរយ។ លោក បានបញ្ជាក់ថា ការកែសម្រួលតារាងតម្លៃគិតពន្ធគយនេះ គឺផ្តល់ជូនចំពោះរថយន្ត ដែលមាន«ម៉ូដែល» នៅត្រឹមឆ្នាំ ២០២០ ប៉ុណ្ណោះ។
លោក គុណ ញឹម សម្រេចកែសម្រួលតារាងតម្លៃគិតពន្ធលើរថយន្តគ្មានពន្ធនិងអាករនាំចូល ដែលមានស្រាប់នៅក្នុងប្រទេស។ បើតាមលិខិតរបស់អគ្គនាយកគយនិងរដ្ឋាករកម្ពុជា កាលពីថ្ងៃទី១២ តុលា គ្រប់ប្រភេទរថយន្តចាប់ពីម៉ូដែលនៅក្រោមឆ្នាំ២០១៥ ដល់ឆ្នាំ២០២០ ដែលគ្មានពន្ធនិងអាករនាំចូល គឺត្រូវបានបន្ថយតម្លៃគិតពន្ធពី១០ទៅ២០ភាគរយ ទៅតាមរថយន្តប្រភេទឆ្នាំនីមួយៗ។
រថយន្តម៉ូដែល ចាប់ពីឆ្នាំ២០១៥ ចុះ ត្រូវបានលោក គុណ ញឹម បន្ថយតម្លៃគិតពន្ធគយចំនួន២០ភាគរយ, ឆ្នាំម៉ូដែល ពីឆ្នាំ២០១៦-២០១៨ បន្ថយ១៥ភាគរយ និង រថយន្ត ឆ្នាំម៉ូដែលពីឆ្នាំ២០១៩-២០២០ បន្ថយ១០ភាគរយ។ ប៉ុន្តែ ចំពោះរថយន្តស្ទួចធុនធ្ងន់ ដែលមានទម្ងន់លើសពី២០តោន គឺត្រូវបានលើកលែងការកែតម្រូវឱ្យកែចង្កូតពីសាំទៅឆ្វេង។ នេះជាការលើកឡើងរបស់លោក គុណ ញឹម។
លោកបានបញ្ជាក់ ថា ការបន្ថយតម្លៃគិតពន្ធនេះ គឺដើម្បី សម្រួលផលលំបាកផ្នែកហិរញ្ញវត្ថុរបស់ម្ចាស់រថយន្ត ក្នុងការបំពេញកាតព្វកិច្ចពន្ធនិងអាករ។ ជាពិសេស គឺដើម្បីជំរុញឲ្យដំណើរការបង់ពន្ធអាករលើរថយន្តមានស្រាប់ ក្នុងប្រទេសកាន់តែមានភាពរលូន និងប្រកបដោយសមធម៌៕
© រក្សាសិទ្ធិដោយ thmeythmey.com