ហេតុការណ៍វាយប្រហារដោយបាញ់ព្រួញកើតឡើងនៅតំបន់ដ៏ធំមួយនៃក្រុង Kongsberg ស្ថិតនៅ​ភាគអាគ្នេយ៍ និងមានចម្ងាយ៦៨គីឡូម៉ែត្រពីរាជធានីអូស្លូ។ ក្នុងចំណោមជនរងគ្រោះ ក៏មាន​មន្ត្រី​ប៉ូលិសម្នាក់ដែលស្ថិតនៅហាងមួយនៃកន្លែងកើតហេតុនោះ។

 

«បុរសនោះបានប្រើធ្នូនិងព្រួញ... សម្រាប់ការវាយប្រហារមួយចំនួន»។ មេប៉ូលិសក្រុងលោក Oeyvind Aas បានប្រាប់អ្នកយកព័ត៌មានបែបនេះ មុនបន្តថា ប៉ូលិសកំពុងស៊ើបអង្កេតថា តើ អាវុធផ្សេង​ទៀត​ត្រូវបានជនសង្ស័យនោះប្រើដែរឬយ៉ាងណា។ បើតាមលោក Aas ចំពោះព័ត៌មា​ន​ដែល​ប៉ូលិស​មានក្នុងដៃឥឡូវនេះ បង្ហាញថាជនសង្ស័យខាងលើបានធ្វើសកម្មភាពតែម្នាក់ឯង ហើយប៉ូលិសនឹង​ស៊ើប​អង្កេត​ថា ការវាយប្រហារនេះជាអំពើភេរវកម្មដែរឬទេ។

 

ជុំវិញរឿងនេះ នៅក្នុងសន្និសីទសារព័ត៌មានមួយ នាយករដ្ឋមន្ត្រីន័រវែស លោកស្រី Erna Solberg បានថ្លែងថា ពេលនេះប៉ូលិសកំពុងគ្រប់គ្រងស្ថានភាពបានហើយ។

 

ទន្ទឹមនេះបន្ទាប់ពីការវាយប្រហារខាងលើ នាយកដ្ឋានប៉ូលិសបានបានបញ្ជាឱ្យមន្រ្តីប៉ូលិស​ទូទាំង​ប្រទេសកាន់អាវុធតាមខ្លួន ខណៈជាធម្មតាប៉ូលិសន័រវេសគ្មានអាវុធទេប៉ុន្តែពួកគេអាចប្រដាប់អាវុធ ឬ​កាន់កាំភ្លើងបាននៅពេលចាំបាច់ណាមួយប៉ុណ្ណោះ។ ប៉ូលិសន័រវែសបញ្ជាក់ថា នេះគ្រាន់តែជា​ការ​ប្រុង​ប្រយ័ត្នបន្ថែម។ រហូតមកដល់ពេលនេះ ប៉ូលិសមិនទាន់បានរក ឃើញព័ត៌មានដែលបង្ហាញថា សន្តិសុខជាតិទាំងមូលត្រូវគំរាមឡើយ។

 

គួរបញ្ជាក់ថា តួលេខអ្នកស្លាប់ខាងលើជាចំនួនដ៏អាក្រក់បំផុតនៅន័រវេសចាប់តាំងពីឆ្នាំ២០១១ ពេល​ដែលជនល្មើសជ្រុលនិយម Anders Behring Breivik បានសម្លាប់មនុស្ស៧៧នាក់ដែល​ភាគច្រើន​ជា​ក្មេងជំទង់នៅជំរំយុវជន៕