ជាតិ
៤ឃុំ នៃស្រុកលំផាត់ និងស្រុកកូនមុំ ជន់លិច ខណៈទឹកទន្លេស្រែពក លើសកម្រិតប្រកាសអាសន្ន ទន្លេស្រែពក ស្ថិតក្នុងស្រុកលំផាត់ ខេត្តរតនគិរី។ រូបភាពពីរដ្ឋបាលខេត្តរតនគិរី
× ភ្នំពេញ៖ ភ្លៀងធ្លាក់ជាបន្តបន្ទាប់ បានធ្វើឱ្យជំនន់ទឹកភ្លៀងជន់លិចឃុំចំនួន ៤ នៃស្រុកលំផាត់ និងស្រុកកូនមុំ ខេត្តរតនគិរី។ បើតាមគណៈកម្មាធិការជាតិគ្រប់គ្រងគ្រោះមហន្តរាយ នៅព្រឹកថ្ងៃទី១៨ តុលានេះ កម្ពស់ទឹកទន្លេស្រែពក កើនដល់១២.៧៤ម៉ែត្រ ខណៈកម្រិតប្រកាសអាសន្នត្រឹម ១២.៥០ម៉ែត្រ។
ក្រោយកម្ពុជា រងឥទ្ធិពលព្យុះ និងឥទ្ធិពលមូសុងនិរតីខ្លាំង បានធ្វើឱ្យបណ្ដាខេត្តមួយចំនួន មានភ្លៀងធ្លាក់ជាបន្តបន្ទាប់។ ទន្ទឹមនឹងនេះ ខេត្តរតនគិរី ដែលស្ថិតនៅភាគឦសាននៃប្រទេសកម្ពុជា ក៏ទទួលរងឥទ្ធិពលខាងលើ ដែលធ្វើឱ្យឃុំចំនួន ៤ នៃស្រុកលំផាត់ និងស្រុកកូនមុំ ជន់លិច និងធ្វើឱ្យទន្លេស្រែពក ហក់ឡើងលើសកម្រិតប្រកាសអាសន្ន ១២.៧៤ម៉ែត្រ។
រដ្ឋបាលខេត្តរតនគិរី លើកឡើងថា៖«ស្ថានភាពនៃជំនន់ទឹកភ្លៀង និងការហក់ឡើងនៃទឹកទន្លេស្រែពកនេះ បណ្តាលមកពីឥទ្ធិពលនៃព្យុះទី១៨ បង្កជាវិសម្ពាធទាបនាំឱ្យមានភ្លៀងធ្លាក់ជាប់ៗគ្នា និងការបើកធាទឹកពីអាងស្តុកទឹកស្រែពក៤ ផ្នែកខាងលើទន្លេស្រែពក បង្កជាជំនន់ទឹកទន្លេ និងជំនន់ទឹកភ្លៀងបានលិចភូមិ ឃុំ មួយចំនួន ដែលស្ថិតនៅតំបន់ទំនាបងាយប្រឈម ស្ថិតនៅក្នុងស្រុកលំផាត់ និងស្រុកកូនមុំ»។
រូបភាពពីរដ្ឋបាលខេត្តរតនគិរី
បន្ទាប់ពីរងផលប៉ះពាល់ដោយសារជំនន់ទឹកភ្លៀង លោក ញ៉ែម សំអឿន អភិបាលខេត្តរតនគិរី បានដឹកនាំកម្លាំងពាក់ព័ន្ធចុះពិនិត្យស្ថានភាពទឹកទន្លេស្រែពកនៅចំណុចភូមិលំផាត់ ឃុំជ័យឧត្តម ស្រុកលំផាត់ ដើម្បីអន្តរាគមន៍ និងឆ្លើយតបបានទាន់ពេលវេលាទៅចំពោះសភាពការណ៍ជាក់ស្តែង។ ជាមួយគ្នានេះ អាជ្ញាធរបានជួយអន្តរាគមន៍ ដើម្បីជម្លៀសពលរដ្ឋដែលប្រឈមខ្ពស់មករកទីទួលសុវត្ថិភាពផងដែរ។
អភិបាលខេត្តរតនគិរី លោក ញ៉ែម សំអឿន បានអំពាវនាវដល់អាជ្ញាធរពាក់ព័ន្ធគ្រប់លំដាប់ថ្នាក់ ត្រូវត្រៀមឆ្លើយតបជាបន្ទាន់ចំពោះហេតុការណ៍ដែលបានកើតឡើង និងអំពាវនាវដល់ពលរដ្ឋដែលរស់នៅតំបន់ងាយរងគ្រោះបង្កើនស្មារតីប្រុងប្រយ័ត្នខ្ពស់បំផុត៕
© រក្សាសិទ្ធិដោយ thmeythmey.com