ជាតិ
កំពង់ស្ពឺ និងពោធិ៍សាត់ មានទេសចរទៅលេងច្រើន នាចុងសប្តាហ៍ រូបថត៖ ហ្វេសប៊ុកក្រសួងទេសចរណ៍
× ទេសចរប្រមាណ ១៣,៨ម៉ឺននាក់ បានដើរលេងកម្សាន្តនៅតំបន់ទេសចរណ៍នានា នៅក្នុងប្រទេសកម្ពុជា កាលពីថ្ងៃទី១៥-១៧ តុលា ចុងសប្តាហ៍កន្លងទៅ។ ក្នុងចំណោមទេសចរផ្ទៃក្នុងទាំងនោះ មានទេសចរបរទេសជាង៣ពាន់នាក់។ នេះបើយោងរបាយការណ៍ស្ថិតិភ្ញៀវទេសចរ របស់ក្រសួងទេសចរណ៍។ ខេត្តព្រះសីហនុ រាជធានីភ្នំពេញ កំពត កំពង់ស្ពឺ សៀមរាប ពោធិ៍សាត់ និងខេត្តកែប ជាខេត្តដែលទទួលបានទេសចរច្រើនជាងគេ គឺសរុបជាង១០ម៉ឺននាក់ ឬស្មើជាង៧៥ភាគរយ នៃទេសចរសរុប ដែលចេញដើរកម្សាន្ត។
ព្រះសីហនុ ជាខេត្តដែលមានទេសចរទៅកម្សាន្តច្រើនជាងគេ គឺជាង២,៨ម៉ឺននាក់ ខណៈរាជធានីភ្នំពេញ ស្ថិតនៅលេខរៀងទី២ ដោយមានទេសចរដើរកម្សាន្តជាង ២,៥ម៉ឺននាក់។ ចំណែកឯខេត្តកំពត ដែលធ្លាប់ទទួលបានប្រជាប្រិយភាពជាងគេ កាលពីអំឡុងបុណ្យភ្ជុំបិណ្ឌ បានធ្លាក់មកនៅលេខរៀងទី៣ ដោយទទួលបានទេសចរជាង១,៨ម៉ឺននាក់។
កំពង់ស្ពឺ ដែលធ្លាប់ជាខេត្តឆ្លងកាត់របស់អ្នកទេសចរ ក៏បានស្វាគមន៍ភ្ញៀវទេសចរជាង ៨,៥ពាន់នាក់ផងដែរ ខណៈខេត្តសៀមរាប ដែលទើបស្រាកស្រាន្តពីជំងឺឆ្លងជំងឺកូវីដ-១៩នោះ បានទទួលបានលំហូរទេសចរផ្ទៃក្នុងសរុប ៧,៦ពាន់នាក់ផងដែរ កាលពីចុងសប្តាហ៍កន្លងទៅនេះ។ ចំណែកឯខេត្តពោធិ៍សាត់ ក៏មិនអន់ដែរ ដោយខេត្តនេះ ទទួលបានទេសចរជាង៧,៤ពាន់នាក់ ខណៈខេត្តកែប បានទទួលស្វាគមន៍ទេសចរជាង ៧,១ពាន់នាក់។
បើយោងតាមក្រសួងទេសចរណ៍ចំនួនទេសចរផ្ទៃក្នុងដែលបានដើរកម្សាន្តនាចុងសប្តាហ៍កន្លងទៅនេះ ថយចុះប្រមាណ ៤៣,៤៦ភាគរយ ធៀបនឹងថ្ងៃសម្រាកចុងសប្តាហ៍ក្រោយពិធីបុណ្យភ្ជុំបិណ្ឌ។ ប៉ុន្តែបើធៀបនឹងតួលេខចុងសប្តាហ៍មុនបុណ្យភ្ជុំវិញ ចំនួននៃទេសចរដើរកម្សាន្តនេះ កើនឡើងជាង១៨ភាគរយ។
ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ក្រសួងទេសចរណ៍ អះអាងថា មន្ទីរទេសចរណ៍រាជធានី-ខេត្ត នៅតែបន្តខិតខំផ្សព្វផ្សាយ និងចុះវាយតម្លៃមូលដ្ឋានអាជីវកម្មស្របតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) សម្រាប់សេវានានា ដែលក្រសួងទេសចរណ៍បានដាក់ចេញ។ ទន្ទឹមនឹង ការយល់ដឹងពីការទប់ស្កាត់ការឆ្លងរាលដាលនៃជំងឺកូវីដ-១៩ របស់ភ្ញៀវទេសចរក៏មានភាពប្រសើរ ជាពិសេសតាមរយៈការបង្ហាញកាតចាក់វ៉ាក់សាំង នៅពេលចូលរមណីយដ្ឋានទេសចរណ៍នានាជាដើម៕
Tag:
ទេសចរ
ព្រះសីហនុ
កំពត
កំពង់ស្ពឺ
ពោធិ៍សាត់
© រក្សាសិទ្ធិដោយ thmeythmey.com