គិតត្រឹមថ្ងៃទី២០ ខែតុលានេះ ស្ថានភាពគ្រោះទឹកជំនន់ក្នុងខេត្តរតនគិរី ចាប់ផ្ដើមប្រសើរវិញ ដោយទន្លេសេសាន និងទន្លេស្រែពក ចាប់ផ្ដើមស្រកចុះវិញ។ «ស្ថានភាពទឹក គឺទន្លេសេសានស្រកហើយ គឺស្រកបានជាងកន្លះម៉ែត្រ អ៊ីចឹងវាក្រោមប្រកាសអាសន្ន។ ចំណែកទន្លេស្រែពក ក៏ស្រកដែរ ប៉ុន្តែស្រកតិច»។ នេះជាការអះអាងរបស់លោក ញ៉ែម សំអឿន អភិបាលខេត្តរតនគិរី។
 

ទាក់ទងនឹងគ្រោះទឹកជំនន់ក្នុងខេត្តរតនគិរីនេះ អភិបាលខេត្តរូបនេះ លើកឡើងថា​ មិនបានបង្កគ្រោះថ្នាក់ធ្ងន់ធ្ងរ ឬបណ្ដាលឱ្យបាត់បង់អាយុជីវិតពលរដ្ឋនោះឡើយ។ ដ្បិតបច្ចុប្បន្នស្ថានភាពទឹកក្នុងខេត្តរតនគិរី ចាប់ផ្ដើមធូរស្បើយ ប៉ុន្តែអាជ្ញាធរ នៅតែបន្តតាមដាន និងត្រួតពិនិត្យស្ថានភាពបន្តទៀតផងដែរ។
 

បើតាមរបាយការណ៍រដ្ឋបាលរតនគិរី នៅថ្ងៃទី១៩ ខែតុលា ជំនន់ទឹកភ្លៀងក្នុងខេត្តរតនគិរីបណ្ដាលមកពីឥទ្ធិពលព្យុះ និងមូសុងនិរតីខ្លាំង ធ្វើ​ឱ្យមានភ្លៀងធ្លាក់ជាបន្តបន្ទាប់ ប៉ះពាល់ដល់ស្រុកលំផាត់ តាវែង អណ្ដូងមាស កូនមុំ និងស្រុកអូរយ៉ាដាវ។ ទន្ទឹមនឹង​នេះ គ្រោះធម្មជាតិនេះ បានប៉ះពាល់ពលរដ្ឋជាង២ពាន់គ្រួសារ ដោយជម្លៀសពលរដ្ឋ​ចំនួន ៧៧គ្រួសារទៅទីទួលសុវត្ថិភាព។
 

របាយការណ៍ដដែល បន្តថា​ ជំនន់ទឹកភ្លៀងនេះ បានធ្វើឱ្យជន់លិចលំនៅដ្ឋានពលរដ្ឋ ៩៨២ខ្នង, សាលារៀន៥ខ្នង, វត្តអារាម៣កន្លែង, តូបលក់អីវ៉ាន់៧៥តូប និងរោងជាងសិប្បកម្មផ្សេងៗ ១៣កន្លែង។ ក្រៅពីនេះផ្ទៃដីស្រែចំនួន ១ ០៧៧ហិកតា បានលិចលង់ ខណៈគោ ២៤៨ក្បាល, ជ្រូក ១១៦ក្បាល, មាន់ទា ១ ០៦៥ក្បាល ត្រូវបានជម្លៀសទៅទីទួលសុវត្ថិភាព។ បន្ថែម​លើ​នេះ​ បានជន់លិចផ្លូវគ្រួសក្រហមប្រវែង ១៥ ៦០០ម៉ែត្រ, ស្ពានបេតុង ១១កន្លែង, លូកាត់ផ្លូវ ១១កន្លែង, អណ្ដូងស្នប់ ៩៣កន្លែង, អណ្ដូងលូ ៣៦៨ និងបង្គន់អនាម័យ ៤៨១៕