កន្លងមក រដ្ឋាភិបាល តាមរយៈក្រសួង និងអាជ្ញាធរពាក់ព័ន្ធ បានចុះអនុវត្តវិធានការទប់ស្កាត់កូវីដ-១៩ ដោយចុះរករក និងប្រមូលអ្នកជំងឺ និងជាប់ពាក់ព័ន្ធមកធ្វើតេស្តសំណាក ហើយតម្រូវឱ្យធ្វើចត្តាឡីស័ក១៤ថ្ងៃ រួមទាំងបិទទីតាំងនោះ ទាំងមូលតែម្ដង ។ បើតាមសម្ដេច ហ៊ុន សែន មូលហេតុដែលរដ្ឋាភិបាល ចេញវិធានការបែបនេះ ដោយសារតែគ្រានោះ មិនទាន់មានវ៉ាក់សាំងចាក់បង្ការកូវីដ-១៩ ឱ្យពលរដ្ឋគ្រប់គ្រាន់។ ប៉ុន្តែបច្ចុប្បន្នកម្ពុជា មានវ៉ាក់សាំងច្រើន ចាក់ឱ្យពលរដ្ឋហើយ ទើបសម្ដេច សម្រេចលែងឱ្យបិទទីតាំងឆ្លងទាំងមូលនេះ។
 

មិនតែប៉ុណ្ណោះ ប្រមុខរដ្ឋាភិបាល ក៏កំពុងរៀបចំបើកប្រទេសឡើងវិញ ក្រោយឃើញស្ថានភាពឆ្លងកូវីដ-១៩ ស្រាកស្រាន្តនេះ។ បើស្ដាប់តាមប្រសាសន៍របស់ប្រមុខរដ្ឋាភិបាល នៅកិច្ចប្រជុំពេញអង្គនោះ ឱកាសខ្ពស់នៃការបើកដំណើការជាប្រក្រតីឡើងវិញ នូវអាជីវកម្ម សាលារៀន និងកន្លែងកម្សាន្តជាដើម នឹងអាចធ្វើទៅបាននាចុងឆ្នាំនេះ។
 

បច្ចុប្បន្នកម្ពុជា មានប្រជាពលរដ្ឋ ជិត១៣លាននាក់ ដែលបានចាក់វ៉ាក់សាំង២ដូស។ កម្ពុជា មានអ្នកជំងឺកូវីដ-១៩ សរុប ១១៧,៥០០នាក់ ខណៈអ្នកជាសះស្បើយ១១២ ,៣៨៣នាក់ និងអ្នកស្លាប់២ ,៧១៥នាក់៕