អ្នកជំងឺកូ​វីដ-១៩ ដែលបញ្ចប់ការព្យាបាលនៅតាមមន្ទីរពេទ្យ និងនៅតាមផ្ទះ ពុំតម្រូវឲ្យធ្វើចត្តាឡីស័ករយៈពេល ១៤ថ្ងៃទៀតឡើយ។ ប៉ុន្តែសម្រាប់អ្នកជំងឺដែលសម្រាកព្យាបាលនៅតាមផ្ទះ ដែលមិនទាន់បានទទួលការចាក់វ៉ាក់សាំងកូវីដ-១៩ ត្រូវតាមដានមើលអាការខ្លួនអំឡុងពេលព្យាបាល ១៤។

 

លិខិត​ដែល​ចុះហត្ថលេខា​ដោយ​លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល និងប្រធានគណៈកម្មការអន្តរ ក្រសួង​ដើម្បី​ប្រយុទ្ធនឹងជំងឺកូវីដ-១៩ បាន​បញ្ជាក់ថា​ បើអ្នកជំងឺមិនមានរោគសញ្ញាជំងឺកូវីដ នៅរយៈពេល៣ថ្ងៃ ចុងក្រោយ គឺថ្ងៃទី១១ ១២ និង១៣ នោះមិនតម្រូវឲ្យធ្វើចត្តាឡីស័កឡើយ។

 

ចំណែក អ្នកជំងឺកូវីដ-១៩ ដែលបានទទួលការចាក់វ៉ាក់សាំង ត្រូវតាមដានមើលអាការខ្លួនរយៈពេល៣ថ្ងៃ នៅទី៦ ៧ និង៨ និងត្រូវធ្វើតេស្តរហ័សរកអង់ទីហ្សែន ដោយខ្លួនឯងនៅថ្ងៃទី៩។ ចំពោះការធ្វើតេស្តចេញលទ្ធ Ag(-) នឹងអនុញ្ញាតឲ្យបញ្ចប់ការធ្វើចត្តាឡីស័ក ​ប៉ុន្តែបើទទួលបានលទ្ធផល Ag(+) អ្នកជំងឺត្រូវធ្វើតេស្តម្តងទៀត ២ថ្ងៃបន្ទាប់ គឺនៅទី១០ និង១១ រហូតចេញលទ្ធ Ag(-) ។

 

ក្នុងករណីមិនមានលទ្ធភាពធ្វើតេស្តរកអង់ទីហ្សែន អ្នកជាសះស្បើយ ដែលគ្មានរោគសញ្ញាជំងឺកូវីដរយៈពេល៣ថ្ងៃ នៅថ្ងៃទី៩​ ១០ និង ១១ នឹងអនុញ្ញាតឲ្យបញ្ចប់ការធ្វើចត្តាឡីស័ក។ ទោះត្រូវបានលើកលែងកាត្វកិច្ចធ្វើចត្តាឡីស័ករយៈ១៤ថ្ងៃ តែអ្នកជាសះស្បើយ ត្រូវអនុវត្តវិធានការ ៣កុំ ៣ការពារ ឲ្យបានខ្ជាប់ខ្លួន៕