សម្រាប់ភ្ញៀវទេសចរ ដែលមកក្នុងកម្មវិធីទេសចរវ៉ាក់សាំង តម្រូវឱ្យធ្វើតែតេស្តរកកូវីដ-១៩ នៅពេលមកដល់អាកាសយានដ្ឋានអន្តរជាតិ-ភ្នំពេញ ប៉ុណ្ណោះ។ ក្នុងករណីទទួលបានលទ្ធផលអវិជ្ជមាន ភ្ញៀវទេសចរអាចដើរកម្សាន្តដោយសេរី នៅក្នុងតំបន់ ឬគោលដៅទេសចរដោយសុវត្ថិភាព ដោយមូលដ្ឋានអាជីវកម្មទេសចរណ៍ទាំងអស់ សុទ្ធតែត្រូវបានពិនិត្យការអនុវត្តតាមនីតិវិធីប្រតិបត្តិស្ដង់ដា និងវិធានសុវត្ថិភាពទេសចរជាមុន។ នេះបើតាមក្រសួងទេសចរណ៍។
 

បន្ថែមពីនេះក្រសួងទេសចរណ៍ បានសង្កត់ធ្ងន់ថា ភ្ញៀវទេសចរ ត្រូវអនុវត្តតាមលក្ខខណ្ឌនៃកម្មវិធីបើកទទួលទេសចរវ៉ាក់សាំង ដោយត្រូវស្នើសុំលិខិតអនុញ្ញាតចូលមកកម្ពុជា ដោយផ្សារភ្ជាប់ជាមួយនីតិវិធី នៃការស្នើសុំទិដ្ឋាការដែលមានស្រាប់ ។ ក្នុងនោះ តម្រូវឱ្យមាន វិញ្ញាបនបត្របញ្ជាក់ការចាក់វ៉ាក់សាំងបង្ការចំងឺកូវីដ-១៩ គ្រប់ដូស, កន្លែងស្នាក់នៅ ដែលបានកក់ទុក និងបង់ប្រាក់នៅក្នុងតំបន់ទេសចរណ៍សុវត្ថិភាព ,លិខិតធានារ៉ាប់រងសុខភាព សម្រាប់ការធ្វើដំណើរមកកម្ពុជា រួមបញ្ចូលទាំងការធានារ៉ាប់រង សម្រាប់ការព្យាបាលជំងឺកូវីដ-១៩ ជាយថាហេតុ និងសំណងលើការលុបចោលការកក់សេវាកម្មទេសចរណ៍នានា នៅកម្ពុជាជាយថាហេតុ, សំបុត្រយន្តហោះ ,វិញ្ញាបនបត្របញ្ជាក់ថា គ្មានជំងឺកូវីដ-១៩ ចេញក្នុងរយៈពេល៧២ម៉ោងនៃជើងហោះ និង ព័ត៌មានអំពីប្រវត្តិធ្វើដំណើរ១៤ថ្ងៃ មុនពេលចេញមកកម្ពុជា។


 

ក្រសួងទេសចរណ៍ បានបញ្ជាក់ដូច្នេះថា៖«ភ្ញៀវទេសចរអន្តរជាតិ ត្រូវធ្វើតេស្ត PCR នៅមុន១ថ្ងៃ នៃការចាកចេញពីតំបន់ ឬគោលដៅទេសចរណ៍សុវត្ថិភាព ដើម្បីបញ្ជាក់លទ្ធផលអវិជ្ជមាន មុននឹងអនុញ្ញាតឱ្យចេញទៅតំបន់ផ្សេងៗ ឬចាកចេញពីកម្ពុជា»។
 

ចំពោះភ្ញៀវទេសចរ ដែលមកក្នុងកម្មវិធីទេសចរវ៉ាក់សាំង ក៏អាចស្នើសុំប្រភេទទិដ្ឋាការទេសចរណ៍(ប្រទេសT) នៅតាមស្ថានទូត / កុងស៊ុលកម្ពុជាប្រចាំប្រទេសសាមី ឬអាចស្នើទិដ្ឋាការអេឡិចត្រូនិក (E-Visa) ហើយត្រូវមកតាមកញ្ចប់ទស្សនកិច្ចទេសចរណ៍វ៉ាក់សាំងកូវីដ-១៩ ឬជាទេសចរមកជាលក្ខណៈគ្រួសារ ឬក្រុមតូចៗ ជាទេសចរកម្រិតខ្ពស់ ដែលបានចាក់វ៉ាក់សាំងគ្រប់ដូស។ នេះបើតាក្រសួងទេសចរណ៍៕