យោងតាមរបាយការណ៍វឌ្ឍនភាពនៃការងារបង្កបង្កើនផលដំណាំកសិកម្មរដូវវស្សា និងផលប៉ះពាល់ដោយគ្រោះធម្មជាតិ គិតត្រឹមថ្ងៃទី២៥ ខែតុលា ឆ្នាំ២០២១ មាន​ផ្ទៃដី​ជាង ៣៤ម៉ឺន​ហិកតា រង​ផល​ប៉ះពាល់។ ក្នុងចំណោមផ្ទៃដីប៉ះពាល់សរុបជាង ៣៤ម៉ឺនហិកតា ដែលរងការប៉ះពាល់ដោយគ្រោះធម្មជាតិ ក្នុងនោះដំណាំលើផ្ទៃដី ២៣ ៨៤២ហិកតា ត្រូវបានស្ដារ ខណៈ ៣ ០៧៤ហិកតា រងការខូចខាតទាំងស្រុង។ ជាមួយគ្នានេះ ដំណាំស្រូវ ៣៤ ៣៧៩ហិកតា រងការខូចខាតដោយសារគ្រោះរាំងស្ងួត ខណៈស្ដារវិញបាន ២៣ ៦២៣ហិកតា និងដំណាំស្រូវ ៤០ ៩៧៩ហិកតា រងគ្រោះដោយទឹកជំនន់ខូចខាតចំនួន និងស្ដារបាន ២០៤ហិកតា។
 

ចំពោះដំណាំសាកវប្បកម្មវិញ រងគ្រោះទឹកជំនន់ខូចខាតចំនួន ២០៣ហិកតា។ រីឯដំណាំឧស្សាហកម្មវិញ រងគ្រោះដោយគ្រោះរាំងស្ងួតខូចខាត ២៧៩ហិកតា, ខូចខាតដោយទឹកជំនន់ ៤ ២៤៩ហិកតា និងខូចខាតដោយសត្វចង្រៃ និងជំងឺ ចំនួន​ ១៧ហិកតា ខណៈស្ដារបាន ១៥ហិកតា។
 

គួររម្លឹកផងដែរថាក្នុងឆ្នាំ២០២១នេះ ក្រសួងកសិកម្មបានត្រៀមពូជស្រូវប្រមាណ ២ពាន់តោន ព្រមទាំងពូជបន្លែ និងពូជដំណាំរួមផ្សំ ១២មុខ ចំនួន២៥តោន សម្រាប់ចែកជូនដល់ពលរដ្ឋក្រីក្រ ដែលរងផលប៉ះពាល់ដោយគ្រោះធម្មជាតិ ក្នុងប្រទេស៕