កីឡាអន្តរជាតិ
អន្តរជាតិ
Emery នឹងមិនទៅដឹកនាំ Newcastle ព្រោះម្ចាស់ក្លិបគ្មានចក្ខុវិស័យច្បាស់លាស់
× លោក Unai Emery នឹងបដិសេធទៅដឹកនាំក្រុម Newcastle United ដែលទើបមានម្ចាស់ថ្មីសម្បូរទ្រព្យហូរហៀ ដើម្បីបន្តរួមរស់ជាមួយ Villarreal។ លោក Emery ថាម្ចាស់ថ្មី Newcastle គ្មានគម្រោងច្បាស់លាស់ និងធ្វើអ្វីតាមនឹកឃើញ។
អតីតអ្នកចាត់ការទូទៅ Arsenal រូបនេះបានបញ្ជាក់នៅថ្ងៃទី២ ខែវិច្ឆិកាថា លោកត្រូវបានក្លិបសារិកាព្រៃទាក់ទង ដើម្បីទៅជំនួសតំណែងលោក Steve Bruce ដែលទើបលាលែង។ យ៉ាងណាក៏ដោយលោក Emery មិនយល់ព្រមការផ្តល់ជូនឱកាសត្រឡប់ទៅដឹកនាំក្រុមនៅ Premier League នេះឡើយ។
ប្រភពជិតស្និទ្ធនឹងលោក Emery បានប្រាប់ទីភ្នាក់ងារព័ត៌មាន Reuters ថា អ្នកចាត់ការសញ្ជាតិអេស្ប៉ាញរូបនេះមានអារម្មណ៍ថាម្ចាស់ក្លិប Newcastle ថ្មីខ្វះចក្ខុវិស័យច្បាស់លាស់សម្រាប់ក្លិប ស្របពេលក្លិបដែលមានម្ចាស់ជារជ្ជទាយាទអារ៉ាប៊ីសាអូឌីតមួយនេះ សង្ឃឹមថានឹងមានអ្នកចាត់ការសញ្ជាតិអេស្ប៉ាញចូលទៅកាន់តំណែងចុងសប្តាហ៍នេះ។
«ពួកគេ [Newcastle] បានបង្ហាញពីការចង់បានខ្ញុំ... ប៉ុន្តែចំណាប់អារម្មណ៍ពួកគេ ខ្ញុំបានយកមកគិតពេញមួយថ្ងៃ ហើយជាក់ស្តែងមិនមានព័ត៌មានណាមួយបន្ថែមទៀតថាចំណាប់អារម្មណ៍នោះជាការផ្តល់ជូននោះទេ។ អ្វីៗដែល Newcastle បានធ្វើមិនមែនជាការផ្តល់ជូនទេ។ ខ្ញុំរីករាយ និងផ្តោតអារម្មណ៍ជាមួយ Villarreal បន្តទៀត ខ្ញុំនឹងចាកចេញទេ»។ Emery បានប្រាប់ទូរទស្សន៍អេស្ប៉ាញដូច្នេះ។
Emery គ្រូសញ្ជាតិអេស្ប៉ាញវ័យ៥០ឆ្នាំបន្ថែមថា ប្រសិនបើមានការផ្តល់ជូនពី Newcastle ជាក់លាក់មែន ក៏លោកមិនសម្រេចខ្លួនឯងថាទៅ ឬក៏អត់ដែរ គឺពឹងផ្អែកលើម្ចាស់ក្លិប Villarreal ប៉ុណ្ណោះ។
ប្រធានក្លិប Villarreal លោក Fernando Roig ក៏បានអះអាងដែលថា មិនបានដឹងព័ត៌មានអំពីការចង់បានលោក Emery ពីសំណាក់ក្លិបអង់គ្លេស Newcastle នោះទេ។ លោក Roig បានប្រាប់កម្មវិធីទូរទស្សន៍ក្នុងស្រុក A Punt ថាលោក Emery សប្បាយចិត្តជា Villarreal ហើយអតីតអ្នកចាត់ការ PSG ក៏ស្ថិតក្នុងកិច្ចសន្យានៅឡើយ។
Newcastle United ដែលមានអ្នកស្រី Amanda Staveley ជាម្ចាស់ក្លិបថ្មី តំណាងឱ្យរជ្ជទាយាទអារ៉ាប៊ីសាអូឌីត Mohammed Bin Salman បានក្រសោបយកក្លិបនេះពីលោក Mike Ashley ជាមួយការទិញដូរក្នុងតម្លៃ ៤១៥ លានដុល្លារអាមេរិក៕
Tag:
Newcastle United
Unai Emery
© រក្សាសិទ្ធិដោយ thmeythmey.com