អន្តរជាតិ
ចិន ស្នើឱ្យអាម៉េរិកធ្វើតាមច្បាប់ជុំវិញការចោទប្រកាន់ពលរដ្ឋចិនរឿងលួចការណ៍សម្ងាត់ពាណិជ្ជកម្ម អ្នកនាំពាក្យក្រសួងការបរទេសចិន Wang Wenbin ។
× តុលាការអាម៉េរិក កាលពីចុងសប្ដាហ៍មុន បានចោទប្រកាន់ជនជាតិចិនម្នាក់ពីបទលួចព័ត៌មាន សម្ងាត់ក្នុងពីបណ្ដាក្រុមហ៊ុនអាម៉េរិក។ ប៉ុន្តែអ្នកនាំពាក្យក្រសួងការបរទេសចិន Wang Wenbin នៅថ្ងៃទី៨ ខែវិច្ឆិកា ចាត់ទុកទង្វើរបស់អាម៉េរិកជារឿងប្រឌិតសុទ្ធសាធ ហើយស្នើឱ្យទីក្រុងវ៉ាស៊ីនតោនចាត់ការរឿងនេះតាមច្បាប់ឱ្យបានត្រឹមត្រូវ។
បើតាមក្រសួងយុត្តិធម៌អាម៉េរិកនៅថ្ងៃទី៥ ខែវិច្ឆិកា ជនជាតិចិនឈ្មោះ Xu Yanjun ដែលត្រូវបានចាត់ទុកជាមន្រ្តីចារកម្មផង ត្រូវបានចោទដោយតុលាការសហព័ន្ធអាម៉េរិកពីបទលួចបច្ចេកវិទ្យាសម្ងាត់ពីក្រុមហ៊ុនអាកាសចរណ៍អាម៉េរិក និងបារាំង។ អាម៉េរិកក៏អះអាងថា សកម្មភាពនេះត្រូវបានគាំទ្រដោយរដ្ឋនៅពីក្រោយផងដែរ។
យ៉ាងណាមិញ ភាគីចិនបានច្រានចោលចំពោះការលើកឡើងខាងលើនេះទាំងស្រុង។ អំឡុងសន្និសីទសារព័ត៌មាននៅថ្ងៃទី៨ ខែវិច្ឆិកា អ្នកនាំពាក្យក្រសួងការបរទេសចិនលោក Wang បានសង្កត់ធ្ងន់ថា ការចោទប្រកាន់នេះជាការប្រឌិតសុទ្ធ។ បន្ថែមពីនេះលោក Wang ក៏ទាមទារឲ្យអាមេរិកដោះស្រាយករណីនេះទៅតាមច្បាប់ និងដោយយុត្តិធម៌ ដើម្បីធានាសិទ្ធិ និងផលប្រយោជន៍របស់ពលរដ្ឋចិន។
គួរបញ្ជាក់ថាលោក Xu ជាមន្ត្រីចិនម្នាក់នៅក្នុងការិយាល័យចារកម្មបរទេសប្រចាំខេត្តជាំងស៊ូនៃក្រសួងសន្តិសុខរដ្ឋចិន។ លោក Xu ត្រូវបានកាត់ទោសពីបទសមគំនិត និងការប៉ុនប៉ង ធ្វើចារកម្មសេដ្ឋកិច្ច រួមទាំងលើការសមគំនិតក្នុងការលួចព័ត៌មានពាណិជ្ជកម្មសម្ងាត់ផងដែរ។
យោងតាមសេចក្ដីថ្លែងការណ៍របស់ក្រសួងយុត្តិធម៌អាម៉េរិក បច្ចុប្បន្ននេះ លោក Xu ប្រឈមមុខនឹងការជាប់ពន្ធនាគាររយៈពេលរហូតទៅដល់៦០ឆ្នាំ និងពិន័យជាប្រាក់សរុបជាង៥លានដុល្លារអាម៉េរិក។ លោកនឹងត្រូវកាត់ទោសដោយចៅក្រមតុលាការសហព័ន្ធអាម៉េរិកទៀតផង៕
© រក្សាសិទ្ធិដោយ thmeythmey.com