អន្តរជាតិ
តុលាការមីយ៉ាន់ម៉ាកាត់ទោសអ្នកកាសែតអាម៉េរិក Fenster ឱ្យពន្ធនាគារ១១ឆ្នាំ
× លោក Danny Fenster អ្នកកាសែតជនជាតិអាម៉រិក ដែលរងបទចោទ និងត្រូវបានឃុំខ្លួនអស់ជាច្រើនខែនៅ នៅថ្ងៃទី១២ ខែវិច្ឆិកា ត្រូវបានតុលាការមីយ៉ាន់ម៉ាដែលគ្រប់គ្រងដោយយោធា កាត់ទោសឱ្យជាប់ពន្ធនាគារ ១១ឆ្នាំ។ នេះបើយោងតាមបញ្ជាក់ពីមេធាវី របស់លោក Fenster។
អ្នកកាសែតជនជាតិអាម៉រិក លោក Fenster អាយុ ៣៧ ឆ្នាំ ដែលជានិពន្ធនាយកនៃទស្សនាវដ្ដីព័ត៌មាននិ ងជំនួញ Frontier Myanmar ត្រូវបានយោធាចាប់ខ្លួនក្នុងខែឧសភា នៅពេលដែលលោក ព្យាយាមចាកចេញពីមីយ៉ាន់ម៉ា។ លោកត្រូវបានយោធា ចាប់ឃុំខ្លួននៅក្នុងពន្ធនាគារ Insein នៅទីក្រុង Yangon។
បើតាមការចុះផ្សាយរបស់ទូរទស្សន៍ BBC លោក Fenster ត្រូវបានផ្ដន្ទាទោសឱ្យជាប់ពន្ធនាគាររយៈពេល១១ឆ្នាំ ក្រោយតុលាការរកឃើញថាលោកមាន ពិរុទ្ធពីបទបំពានច្បាប់អន្តោប្រវេសន៍ ការបង្កើតសមាគម មិនស្របច្បាប់ និងការលើកទឹកចិត្តឱ្យមានការប្រឆាំងនឹងក្រុមយោធាមីយ៉ាន់ម៉ា។
លើសពីនេះទៀត អ្នកកាសែតជនជាតិអាម៉េរិករូបនេះ ត្រូវប្រឈមមុខនឹងបទចោទប្រកាន់ថ្មីបន្ថែមផងដែរ។ លោករងបទចោទពីករណីបះបោរ និងរំលោភច្បាប់ភេរវកម្ម ហើយនឹងត្រូវឡើងសវនាការនៅថ្ងៃទី ១៦ ខែវិច្ឆិកាខាងមុខ។ បទចោទប្រកាន់ថ្មីនេះ អាចធ្វើឱ្យលោកជាប់ពន្ធនាគារអតិបរមាអស់មួយជីវិត។
«វាគ្មានមូលដ្ឋានពិតប្រាកដក្នុងការកាត់ទោស Danny ពីការចោទប្រកាន់ទាំងនេះទេ។ គ្រប់គ្នានៅ Frontier មានការខកចិត្ត ចំពោះការសម្រេចចិត្តនេះ។ យើងគ្រាន់តែចង់ឃើញ Danny ត្រូវបានដោះលែងឱ្យបានឆាប់តាមដែលអាចធ្វើទៅបាន ដើម្បីឱ្យគាត់អាចត្រលប់ទៅផ្ទះជួបជុំគ្រួសារ »។ លោក Thomas Kean និពន្ធនាយកនៃទស្សនាវដ្ដី Frontier Myanmar បាននិយាយប្រាប់ទីភា្នក់ងារព័ត៌មាន Reuters។
កន្លងមក អាម៉េរិកក៏បានកំពុងជំរុញឱ្យមានការដោះលែងលោក Fenster។
គួររំលឹកថា មីយ៉ាន់ម៉ាបានស្ថិតក្នុងភាពវឹកវរចាប់តាំងពីមានរដ្ឋប្រហារដោយយោធា ទម្លាក់រដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី។ មេដឹកនាំជាប់ឆ្នោតជាច្រើនរូប រូមទាំងលោកស្រី ស៊ូជី ផងត្រូវបានយោធាមីយ៉ាន់ម៉ាឃុំខ្លួន។ ប្រជាជនស៊ីវិលជាង១២០០នាក់ត្រូវបានសម្លាប់ ហើយអ្នកកាសែតជាច្រើននាក់ត្រូវបានឃុំខ្លួន ខណៈការប្រឆាំងនឹងរបបយោធាធ្វើឡើងស្ទើរតែរាល់ថ្ងៃ។ ក្រៅពីនេះ យោធាមីយ៉ាន់ម៉ា ក៏បានរឹតត្បិតការផ្សព្វផ្សាយព័ត៌មាន និងបិទការប្រើប្រាស់អ៊ីនធឺណិតជាដើម៕
© រក្សាសិទ្ធិដោយ thmeythmey.com