អ្នកចំណាកស្រុករាប់ពាន់នាក់ដែលភៀសខ្លួនពីជម្លោះនៅក្បែរៗអឺរ៉ុប កំពុងជាប់គាំងនៅព្រំដែនបេឡារុស និងប៉ូឡូញ។ ប្រទេសសហភាពអឺរ៉ុបចោទបេឡារុសថា កំពុងលើកទឹកចិត្តមនុស្សរាប់ពាន់នាក់ភៀសខ្លួនចេញពីប្រទេសដែលហែកហួរដោយសង្រ្គាមឱ្យឆ្លងចូលទៅក្នុងប៉ូឡូញ និងប្រទេសជិតខាងផ្សេងទៀតដែលជាការសងសឹកចំពោះការដាក់ទណ្ឌកម្មរបស់សហភាពអឺរ៉ុបនាពេលកន្លងមក។

 

«យើងថ្កោលទោសទង្វើបេឡារុសដែលធ្វើដាក់លើមនុស្សដែលជីវិត និងសុខុមាលភាពរបស់ពួកគេធ្លាក់ក្នុងគ្រោះថ្នាក់ដោយសារតែគោលបំណងនយោបាយរបស់ខ្លួន។ បេឡារុសធ្វើបែបនេះក្នុងគោលបំណងឱ្យប្រទេសជិតខាងមានអស្ថិរភាព ហើយបង្វែរការចាប់អារម្មណ៍ពីការរំលោភសិទ្ធិមនុស្សរបស់ខ្លួនទៅវិញ»។ អេស្តូនី បារាំង អៀរឡង់ ន័រវេស អាម៉េរិក និងអង់គ្លេសលើកឡើងក្នុងសេចក្ដីថ្លែងការណ៍រួមក្នុងកិច្ចប្រជុំបិទទ្វារក្រុមប្រឹក្សាសន្តិសុខនៅថ្ងៃទី១១ ខែវិច្ឆិកា ជុំវិញវិបត្តិជនចំណាកស្រុក ។

 

ប្រទេសទាំងនេះពិពណ៌នាវិធីសាស្រ្តរបស់បេឡារុស្សថា ជារឿងមិនអាចទទួលយកបាន ហើយចោទប្រធានាធិបតីបេឡារុសលោក Alexander Lukashenko ថាក្លាយជាអ្នកគំរាមស្ថិរភាពក្នុងតំបន់។ លើសពីនេះ បណ្តាប្រទេសខាងលើក៏បានអំពាវនាវឱ្យអន្តរជាតិបញ្ចេញប្រតិកម្មដើម្បីឱ្យបេឡារុស្ទទួលខុសត្រូវ ហើយពួកគេសន្យាថា នឹងពិភាក្សាបន្ថែមទៀតអំពីវិធានការដែលអាចធ្វើទៅបាន។

 

រុស្ស៊ីដែលជាខ្នងបង្អែកទីក្រុងមីនស្ក៍តាំងពីដើមមក ចេញមុខរិះគន់ប្រទេសទាំងនោះ។ អគ្គរដ្ឋទូតរងរុស្ស៊ីប្រចាំ UN លោក Dmitry Polyanskiy ប្រាប់អ្នកយកព័ត៌មានថា លោកជឿថា ក្រុមលោកខាងលិចហាក់ដូចជាមានទំនោរទៅលើការសប្បាយចំពោះគំនរទុក្ខរបស់ជនចំណាកទាំងនេះ ហើយក្លាហានហ៊ានលើកប្រធានបទនេះនៅចំពោះមុខសមាជិកក្រុមប្រឹក្សាសន្តិសុខUN ដែលជា​រឿង​គួរឱ្យខ្មាស់​សម្រាប់ EU ទាំងស្រុង​។

 

តបទៅនឹងសំណួរថា តើរុស្ស៊ី ឬបេឡារុសកំពុងជួយផ្លាស់ទីជនចំណាកស្រុកទៅព្រំដែនប៉ូឡូញដែរឬទេ លោក Polyanskiy អះអាងថា ប្រាកដជាមិនមែនទេ ។ លើសពីនោះ លោក​បាន​បន្ថែម​ថា មិនមែន​រាល់​បញ្ហា​ទាំងអស់​ត្រូវ​ដោះស្រាយ​ដោយ​ក្រុមប្រឹក្សា​សន្តិសុខ​នោះទេ។

 

ជុំវិញបញ្ហានេះ បេឡារុសព្រមានថា វិបត្តិអាចកើនឡើងទៅជាការប្រឈមមុខដាក់គ្នាខាងយោធា ខណៈលីទុយអានី អេស្តូនី និងឡេតូនី អះអាងថា បេឡារុសបង្កការគំរាមកំហែងយ៉ាងធ្ងន់ធ្ងរដល់សន្តិសុខអឺរ៉ុប៕