ទោះការស្ទង់កន្លងមកបង្ហាញពីការគាំទ្រខ្លាំងបើឈរជាបេក្ខភាពប្រធានាធិបតី លោកស្រី Sara Duterte-Carpio កូនច្បងលោក រ៉ូឌ្រីហ្គោ ឌូទើតេ នៅតែមិនស្រវាឱកាសដើម្បីអង្គុយតំណែងប្រធានាធិបតីជំនួសឪពុក។ នៅថ្ងៃទី១៣ ខែវិច្ឆិកា តំណាងលោកស្រី បានចុះឈ្មោះលោកស្រីជាបេក្ខជនអនុប្រធានាធិបតីសម្រាប់ការបោះឆ្នោតខែឧសភា ឆ្នាំ២០២២ ។

 

លោក ឌូទើតេ គ្មានសិទ្ធិឈរឈ្មោះសម្រាប់អាណត្តិទីពីរឡើយ ដោយត្រូវរដ្ឋធម្មនុញ្ញហាមឃាត់។ ចំណែកការបោះឆ្នោតជ្រើសរើសប្រធានាធិបតីហ្វីលីពីន ក៏ធ្វើឡើងផ្សេងពីការបោះឆ្នោតអនុប្រធានាធិបតី។

 

ពីដំបូងលោកស្រី Sara ប្រកែកមិនឈរឈ្មោះសម្រាប់តំណែងកំពូលរបស់ប្រទេសទាំងឡើយ ហើយថែមទាំងឈរឈ្មោះដើម្បីការពារតំណែងអភិបាលក្រុង Davao ទៀតផង។ ឯលោក ឌូទើតេ វិញ ដោយសារមិនអាចឈរឈ្មោះប្រធានាធិបតីមួយអាណត្តិទៀត ក៏ងាកទៅរកតំណែងអនុប្រធានាធិបតី។ មិនយូរប៉ុន្មាន លោកក៏សម្រេចចិត្តលាឈប់ពីនយោបាយតែម្ដងនៅពេលចប់អាណត្តិប្រធានាធិបតីឆ្នាំក្រោយ។

 

ស្របពេលឪពុកមិនឈរឈ្មោះ លោកស្រី Sara ក៏ប្ដូរចិត្តហើយចុះឈ្មោះសម្រាប់តំណែងអនុប្រធានាធិបតីនៅពេលនេះតែម្ដង។ បន្ទាប់ពីចុះឈ្មោះរួច លោកស្រីក៏ត្រូវបានបក្សរបស់លោក Ferdinand "Bongbong" Marcos Jr. កូនប្រុសមេដឹកនាំផ្ដាច់ការ Ferdinand Marcos អនុម័តជាបេក្ខភាពអនុប្រធានាធិបតីរបស់បក្សតែម្ដង។ លោក Bongbong ខ្លួនឯង ជាបេក្ខជនប្រធានាធិបតីរបស់បក្សនេះ។