តាក់ស៊ីហោះ ដែលជាប្រភេទឧទ្ធម្ភាគចក្រ ផលិតដោយក្រុមហ៊ុនអាល្លឺម៉ង់ Volocopter ជាមួយនឹងបច្ចេកវិទ្យាហោះឡើង និងចុះដោយប្រព័ន្ធអគ្គិសនី (eVTOL)។ នាការសាកល្បង តាក់ស៊ីនេះ ហោះចេញពីអាកាសយានដ្ឋាន Gimpo ឡើងបានកម្ពស់៥០ម៉ែត្រ ជាមួយនឹងល្បឿន៤៥គីឡូម៉ែត្រក្នុង១ម៉ោង។

 

តាមការផ្សាយរបស់ NHK World រដ្ឋមន្ត្រីក្រសួងដឹកជញ្ជូនកូរ៉េខាងត្បូង បានបញ្ជាក់ថា រាល់ការសាកល្បងគឺចេញពីអាកាសយានដ្ឋាន ហើយហោះហើរទៅកាន់តំបន់នៅក្បែរនោះ។ នាពេលខាងមុខ ការសាកល្បងនឹងប្រព្រឹត្តទៅនៅអាកាសយានដ្ឋាន Incheon Airport ទៅក្បែរទីប្រជុំជនក្រុងសេអ៊ូល។

 

លោករដ្ឋមន្ត្រី Noh Hyeong-ouk ជឿជាក់ថា ការសាកល្បងដំណើរការតាក់ស៊ីហោះនេះ ជាផ្នែកដ៏សំខាន់មួយក្នុងការស្វែងរកគន្លឹះអភិវឌ្ឍន៍បន្ថែមលើប្រព័ន្ធគ្រប់គ្រង មុនដំណើរការសេវាកម្មផ្លូវការចាប់ពីឆ្នាំ២០២៥តទៅ។

 

សេអ៊ូលជាក្រុងទីពីរនៅតំបន់អាស៊ី ដែលក្រុមហ៊ុន Volocopter ដំណើរការសាកល្បងតាក់ស៊ីហោះ ក្រោយទទួលបានជោគជ័យនៅតំបន់ Marina Bay ប្រទេសសិង្ហបុរី កាលពីឆ្នាំ២០១៩កន្លងមក៕