អន្តរជាតិ
ថ្នាក់ដឹកនាំយោធា និងពន្ធនាគារអេក្វាឌ័រលាលែងជាបន្តបន្ទាប់ ក្រោយករណីកុបកម្មនៅក្នុងពន្ធនាគារ រូបថត៖ លោក Guillermo Lasso (កណ្តាល) ដឹកនាំកិច្ចប្រជុំ ក្រោយមន្ត្រីលាលែងជាបន្តបន្ទាប់ ដោយសារកុបកម្មនៅពន្ធនាគារនៅ Guayaquil ដែលសម្លាប់មនុស្ស៦៨នាក់។ រូបថត AFP
× អេក្វាឌ័រកំពុងស្ថិតក្រោមការគំរាមកំហែងដ៏ធ្ងន់ធ្ងរមួយ ពីសំណាក់ក្រុមម៉ាហ្វីយ៉ាជួញដូរគ្រឿងញៀន ដែលចង់គ្រប់គ្រងពន្ធនាគារទាំងមូលទូទាំងប្រទេស។ នេះបើតាមការផ្សាយរបស់ AFP ដោយដកស្រង់សម្តីលោកប្រធានាធិបតី Guillermo Lasso បន្ទាប់ពីមេដឹកនាំយោធា និងពន្ធនាគារ បានលាលែងពីដំណែងជាបន្តបន្ទាប់ ក្រោយករណីកុបកម្មក្នុងពន្ធនាគារ ដែលបានសម្លាប់មនុស្ស៦៨នាក់។
លោក Lasso បាននិយាយថា ប្រតិបត្តិការទ្រង់ទាយធំ ត្រូវបានដឹកនាំដោយកងកម្លាំងប៉ូលិស និងយោធា ដើម្បីបង្ក្រាបចលនាកុបកម្មក្នុងពន្ធនាគារនៅក្រុង Guayaquil។ នៅទីនោះ ក្រុមអ្នកទោសដែលប្រដាប់ដោយកាំភ្លើង កាំបិទ និងគ្រឿងផ្ទុះ បានតទល់ជាមួយសមត្ថកិច្ច ហើយបានឲ្យបាត់បង់ជីវិតមនុស្សជាច្រើននាក់។
លោកប្រធានាធិបតីអេក្វាឌ័រ បានទទួលស្គាល់ថា ប្រទេសរបស់ខ្លួនស្ថិតក្នុងវិបត្តិដ៏ធំមួយ ដែលបង្កដោយក្រុមម៉ាហ្វីយ៉ាជួញដូរគ្រឿងញៀន ជាពិសេសការបង្កភាពចលាចល និងអសន្តិសុខ នៅតាមផ្លូវថ្នល់។ លោកបានសន្យានឹងប្រទេសវិលទៅរកស្ថានភាពដើម និងមិនឲ្យមានករណីកុបកម្មបន្ថែមទៀតនៅក្នុងពន្ធនាគារ។
តាមសេចក្តីរាយការណ៍របស់ AFP ប៉ូលិស និងយោធា ប្រមាណ១០០០នាក់ បានចូលទៅពន្ធនាគារ Guayas 1 ដើម្បីគ្រប់គ្រងច្រកចេញចូល។ ក្រោយហេតុការណ៍ដ៏អាក្រក់ លោក Lasso ទទួលបានលិខិតលាលែងជាបន្តបន្ទាប់ពីថ្នាក់ដឹកនាំយោធា និងពន្ធនាគារ ក្នុងនោះមានលោក Jorge Cabrera និងលោក Bolivar Garzon ជាដើម៕
© រក្សាសិទ្ធិដោយ thmeythmey.com