យោងតាម​របាយការណ៍របស់ទីភ្នាក់ងារ​ព័ត៌មាន​វៀតណាម​ផ្លូវការ នៅថ្ងៃទី១៥​ ខែវិច្ឆិកា នៅឯតុលាការខេត្ត Khanh Hoa លោក Nguyen Tri Gioan អាយុ ៤២ ត្រូវបានកាត់ទោស ពីបទបង្កើត រក្សាទុកនិងផ្សព្វផ្សាយព័ត៌មានក្នុងគោលបំណងប្រឆាំងនឹងរដ្ឋ។ របាយការណ៍ ខាងលើបានបញ្ជាក់ថា លោក Gioan បានបង្ហោះកំណាព្យ និងរូបភាពនៅលើគណនី ហ្វេសប៊ុករបស់លោកដើម្បីមួលបង្កាច់ បង្ខូចកិត្តិយស និងការដឹកនាំរបស់បក្សកុម្មុយនីស្ត វៀតណាម រដ្ឋវៀតណាម ព្រមទាំងអតីតមេដឹកនាំលោកហូ ជីមិញផងដែរ។

 

លើសពីនេះរបាយការណ៍ដដែលបញ្ជាក់ថា បុរសជាប់ទោសខាងលើបានសារភាពកំហុស អំឡុងការកាត់ក្តី។ ក្រៅពីនេះបន្ទាប់ពី​ត្រូវជាប់​ពន្ធនាគារ​អស់រយៈពេល៧ឆ្នាំលោក​ Gioan នឹង​ត្រូវ​ឃុំ​ខ្លួន​ក្នុង​ផ្ទះ​រយៈពេល​បី​ឆ្នាំទៀត។

គួរបញ្ជាក់ថាទោះបីជាវៀតណាមបានកែទម្រង់សេដ្ឋកិច្ចយ៉ាងទូលំទូលាយ និងបង្កើនការ បើកចំហចំពោះការផ្លាស់ប្តូរសង្គមក៏ដោយ ក៏បក្សកុម្មុយនីស្តវៀតណាមដែលកំពុងកាន់ អំណាចនៅតែរក្សាការគ្រប់គ្រងប្រព័ន្ធផ្សព្វផ្សាយយ៉ាងតឹងរ៉ឹង និងចាត់វិធានការចំពោះការ រិះគន់ក្នុងន័យមិនល្អពីសាធារណជន៕