រដ្ឋមន្ត្រីពាណិជ្ជកម្មអាម៉េរិក លោកស្រី Gina Raimondo កំពុង​ដំណើរទស្សនកិច្ចជា​ផ្លូវ​ការជាលើក​ដំបូងនៅ​អាស៊ី​ចាប់​ពី​ថ្ងៃ​ទី១៥ ដល់ទី១៨ ខែ​វិច្ឆិកា។ លោកស្រី ត្រូវធ្វើទស្សនកិច្ចនៅជប៉ុន សិង្ហបុរី និងម៉ាឡេស៊ី។ នៅសិង្ហបុរី លោកស្រី Raimondo បញ្ជាក់ជាថ្មីពីជំហររបស់អាម៉េរិកសម្រាប់អាស៊ីអាគ្នេយ៍។

 

«នេះមិនមែនជាការជ្រើសរើសអាម៉េរិក ឬក៏ចិននោះទេ»។ លោកស្រី Raimondo សង្កត់​ធ្ងន់​បែប​នេះ​នៅក្នុងកិច្ចសម្ភាសថ្ងៃទី១៦ ខែវិច្ឆិកា មុនបន្តថា ដំណើរទស្សនកិច្ចរបស់លោកស្រីនៅតំបន់នេះ និង​ការ​ប្តេជ្ញាចិត្តរបស់អាម៉េរិក មិនទាក់ទងបញ្ហាជាមួយចិនឡើយ។

 

ទោះជាយ៉ាងណា វត្តមានអាម៉េរិកនៅក្នុងតំបន់ ត្រូវមើលឃើញថា ជាការទប់ស្កាត់ការងើបឡើងរបស់ចិន។ សម្ព័ន្ធភាពទើបបង្កើតថ្មី AUKUS រវាងអាម៉េរិក ចក្រភពអង់គ្លេស និងអូស្ត្រាលី ក៏ជា​វិធានការ​មួយ​ដែលអាម៉េរិកព្យាយាមពង្រឹងវត្តមានខ្លួនដែរ។

 

ក្នុងកិច្ចសម្ភាសខាងលើនោះ លោកស្រី  Raimondo លើកឡើងថា ការទូត​អាម៉េរិក​ក្នុង​តំបន់​នេះ​ផ្អែក​លើ​កេរដំណែល​ជាជាង​ការប្រកួតប្រជែង​ភូមិសាស្ត្រ​នយោបាយ​បច្ចុប្បន្ន។ រដ្ឋមន្ត្រីរូបនេះបញ្ជាក់​ថា៖ « អាម៉េរិក​មាន​វត្តមាន​ទាំងផ្នែក សេដ្ឋកិច្ច និង​​យោធា​ជាច្រើន​ទសវត្សរ៍​មកហើយក្នុង​តំបន់នេះ។ ខណៈ​ដែលការរីកចម្រើនរឹតតែមានខ្លាំងឡើង ព្រមទាំងការច្នៃប្រឌិតបច្ចេកវិទ្យាជាច្រើននៅក្នុងតំបន់ អាម៉េរិក រឹតតែចង់មានវត្តមានច្រើនជាងមុននៅក្នុងតំបន់ឥណ្ឌូ-ប៉ាស៊ីហ្វិកដើម្បីបន្តភាព​ជា​ដៃគូទាំង​នោះ»។ 

 

រដ្ឋមន្ត្រីពាណិជ្ជកម្មអាម៉េរិក ទទួលស្គាល់ថា វត្តមានរបស់អាម៉េរិកនៅក្នុងតំបន់នេះបានធ្លាក់ចុះក្នុង​រយៈពេលប៉ុន្មានឆ្នាំចុងក្រោយនេះក្រោមរដ្ឋបាលលោក ដូណាល់​ ត្រាំ ។ ឯរដ្ឋាបាល​បច្ចុប្បន្នវិញ កំពុង​តែព្យាយាមស្ដារសហប្រតិបត្តិការជាមួយតំបន់នេះឡើងវិញ។

 

គួរបញ្ជាក់ថា កាលពីខែតុលា លោក ចូ បៃឌិន បានសន្យាវិនិយោគប្រាក់រហូតដល់ ១០២ លានដុល្លារ​អាម៉េរិកនៅក្នុងគំនិតផ្តួចផ្តើមថ្មីដើម្បីពង្រីកភាពជាដៃគូយុទ្ធសាស្ត្រអាម៉េរិក-អាស៊ាន។ ប្រធានាធិបតី​អាម៉េរិករូបនេះ ក៏បានប្រកាសពីការអភិវឌ្ឍក្របខ័ណ្ឌសេដ្ឋកិច្ចឥណ្ឌូ-ប៉ាស៊ីហ្វិក​ដោយ​សំដៅ​លើ​ពាណិជ្ជកម្ម និងការវិនិយោគដោយយុត្តិធម៌ និងបើកចំហ៕