ជាតិ
សង្គមជាតិ
ពលរដ្ឋកម្ពុជា ជាង២.៨លាននាក់ កំពុងរស់នៅក្រោមបន្ទាត់ភាពក្រីក្រ លោក ឆាយ ថន ទេសរដ្ឋមន្ត្រី និងរដ្ឋមន្ត្រីក្រសួងផែនការ ក្នុងសន្និសីទកាសែតស្តីពី««វិធីសាស្រ្តថ្មីសម្រាប់គណនាអត្រាភាពក្រីក្រនៅកម្ពុជា និងអត្រាភាពក្រីក្រឆ្នាំ២០២០» នៅថ្ងៃទី១៧ ខែវិច្ឆិកានេះ។
× ពលរដ្ឋកម្ពុជា ចំនួន១៧.៨ភាគរយ ឬស្មើជាង ២.៨លាននាក់ នៃប្រជាសរុប បានរស់នៅក្រោមខ្សែបន្ទាត់នៃភាពក្រីក្រ នៅក្នុងឆ្នាំ២០១៩-២០២០។ រដ្ឋាភិបាល បានកំណត់ខ្សែបន្ទាត់ភាពក្រីក្រថ្នាក់ជាតិថ្មី មានចំនួន ១០ ៩៥១រៀល ក្នុងមនុស្សម្នាក់ក្នុងមួយថ្ងៃ ហើយខ្សែបន្ទាត់ភាពក្រីក្រនេះ ត្រូវបានប្រកាសនៅថ្ងៃទី១៧ ខែវិច្ឆិកានេះ។ បើតាមរដ្ឋមន្ត្រីក្រសួងផែនការ ក្នុងចំណោមពលរដ្ឋដែលរស់នៅក្រោមខ្សែបន្ទាត់ភាពក្រីក្រនៅកម្ពុជា មាន៤.២ភាគរយរស់នៅរាជធានីភ្នំពេញ ១២.៦ភាគរយ នៅតំបន់ទីប្រជុំជនផ្សេងទៀត និងអត្រាភាពក្រីក្រនៅតំបន់ជនបទមាន២២.៨ភាគរយ។
ពលរដ្ឋកម្ពុជា ចំនួន១៧.៨ភាគរយ ឬជាង២.៨លាននាក់ នៃប្រជាជនសរុប ១៦លាននាក់ បានរស់នៅក្រោមខ្សែបន្ទាត់នៃភាពក្រីក្រ នៅក្នុងឆ្នាំ២០១៩-២០២០។ លោក ឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ បញ្ជាក់ដូច្នេះ នៅក្នុងសន្និសីទសារព័ត៌មាន ស្ដីពី«វិធីសាស្រ្តថ្មីសម្រាប់គណនាអត្រាភាពក្រីក្រនៅកម្ពុជា និងអត្រាភាពក្រីក្រឆ្នាំ២០២០» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅរសៀលថ្ងៃទី១៧ ខែវិច្ឆិកា ឆ្នាំ២០២១។
បើតាមរដ្ឋមន្ត្រីក្រសួងផែនការ ខ្សែបន្ទាត់ភាពក្រីក្រថ្នាក់ជាតិសម្រាប់កម្ពុជា មានចំនួន ១០ ៩៥១រៀល ក្នុងចំណោមពលរដ្ឋម្នាក់ ក្នុងមួយថ្ងៃ ហើយខ្សែបន្ទាត់នៃភាពក្រីក្រថ្មីនេះ ត្រូវបានកំណត់ឡើងដោយប្រើប្រាស់ទិន្នន័យ ពីការអង្កេតសេដ្ឋកិច្ច សង្គមកិច្ចកម្ពុជាឆ្នាំ២០១៩-២០២០។ ក្នុងចំណោមពលរដ្ឋដែលរស់នៅក្រោមបន្ទាត់ក្រីក្រទាំងជាង១៧.៨ភាគរយនោះអត្រាភាពក្រីក្រនៅរាជធានីភ្នំពេញមាន៤.២ភាគរយ ដោយពលរដ្ឋរកចំណូល១០ ៩៥១រៀល ក្នុងមនុស្សម្នាក់ក្នុងមួយថ្ងៃ។ អត្រាភាពក្រីក្រនៅតំបន់ទីប្រជុំជនផ្សេងទៀត ១២.៦ភាគរយ ដែលពលរដ្ឋមានចំណូល៩ ៥៧១រៀល ក្នុងមនុស្សម្នាក់ក្នុងមួយថ្ងៃ។ អត្រាភាពក្រីក្រ នៅតំបន់ជនបទ មាន២២.៨ភាគរយ ដោយពលរដ្ឋរកចំណូលបានចំនួន ៨ ៩០៨រៀល ក្នុងមនុស្សម្នាក់ក្នុងមួយថ្ងៃ។
បើតាមរដ្ឋមន្ត្រីក្រសួងផែនការ អត្រាភាពក្រីក្រនៅកម្ពុជាសម្រាប់ឆ្នាំ២០១៩-២០២០ បានរងផលប៉ះពាល់ខ្លះ ពីការរីករាលដាលនៃជំងឺកូវីដ-១៩ ដែលបានចាប់ផ្តើមពីដើមឆ្នាំ២០២០មក មកលើសេដ្ឋកិច្ចកម្ពុជា។ លោក ឆាយ ថន ពន្យល់បន្ថែមដូច្នេះ៖ «ការរីករាលដាលនៃកូវីដ-១៩ ដែលបានប៉ះពាល់ដល់ខ្សែច្រវ៉ាក់ផ្គត់ផ្គង់លើវត្ថុធាតុដើម សម្រាប់ការផលិតផលិតផលនាំចេញ ការថយចុះការបញ្ជាទិញពីក្រៅប្រទេស និងការធ្លាក់ចុះនៃចំនួនភ្ញៀវទេសចរ»។
យ៉ាងណាក៏ដោយ លោក ឆាយ ថន ផលប៉ះពាល់លើកម្រិតជីវភាពរស់នៅរបស់គ្រួសារប្រជាជនកម្ពុជា អាចចាប់ផ្តើមពីខែមេសា ឆ្នាំ២០២០ នៅពេលដែលវិធានការរឹតបន្តឹង ត្រូវបានអនុវត្ត។
បើតាមរដ្ឋមន្ត្រីក្រសួងផែនការ រាជរដ្ឋាភិបាល បានកែលម្អកម្រងសំណួរការអង្កេតសេដ្ឋកិច្ច សង្គមកិច្ចកម្ពុជាឆ្នាំ ២០១៩-២០២០ ដើម្បីទទួលបានព័ត៌មានប្រសើរជាងមុន ស្តីពីការប្រើប្រាស់ម្ហូបអាហារ ដោយប្រើបញ្ជីលម្អិត និងកត់ត្រាពីបរិមាណប្រើប្រាស់នៃមុខទំនិញនីមួយៗ ដើម្បីឆ្លុះបញ្ចាំងពីភាពប្រែប្រួលនៃការចំណាយលើការប្រើប្រាស់ក្រុមជនក្រីក្រ និងធ្វើឱ្យប្រសើរឡើងវិធីសាស្ត្រសម្រាប់វាស់វែងភាពក្រីក្រ។ វិធីសាស្ត្រដែលកែសម្រួលនេះ បានផ្តោតលើ២ចំណុចសំខាន់ គឺទី១ បង្កើតការចំណាយលើការប្រើប្រាស់សរុបថ្មីមួយ ដែលដាក់បញ្ចូលតម្លៃប៉ាន់ស្មានថ្លៃជួលផ្ទះ និងតម្លៃប៉ាន់ស្មានលើការប្រើប្រាស់សម្ភារប្រើប្រាស់បានយូរ និងទី២ គឺការអនុវត្តវិធីសាស្ត្រចំណាយលើតម្រូវការមូលដ្ឋាន និងកន្ត្រករួម ដើម្បីកំណត់ខ្សែបន្ទាត់ភាពក្រីក្រ។
សូមជម្រាបថា ខ្សែបន្ទាត់ភាពក្រីក្រសម្រាប់កម្ពុជា ត្រូវបានកំណត់ដំបូងនៅឆ្នាំ១៩៩៧ ដោយប្រើប្រាស់ទិន្នន័យពីសង្កេតសេដ្ឋកិច្ច សង្គមកិច្ចកម្ពុជា ឆ្នាំ១៩៩៣-១៩៩៤ ហើយខ្សែបន្ទាត់ភាពក្រីក្រនេះ ត្រូវបានប្រើប្រាស់សម្រាប់វាសវែងកម្រិតនៃភាពក្រីក្រនៅកម្ពុជា រហូតដល់ឆ្នាំ២០០៨។ រាជរដ្ឋាភិបាល បានសម្រេចកំណត់ខ្សែបន្ទាត់ក្រីក្រកម្ពុជាឡើងវិញ ក្នុងឆ្នាំ២០១៣ ដោយប្រើប្រាស់ទិន្ន័យសង្កេតសេដ្ឋកិច្ច សង្គមកិច្ចកម្ពុជាឆ្នាំ២០០៩ បន្ទាប់ពីសង្កេតឃើញថា សេដ្ឋកិច្ចកម្ពុជា មានការអភិវឌ្ឍន៍យ៉ាងឆាប់រហ័សរបស់កម្ពុជា ក្នុពីឆ្នាំ១៩៩៣ ដល់ឆ្នាំ២០០៨។ ខ្សែបន្ទាត់ភាពក្រីក្រនេះ ត្រូវបានប្រើប្រាស់សម្រាប់វាស់វែងភាពក្រីក្រនៅកម្ពុជា រហូតមកដល់បច្ចុប្បន្ន ដោយកែសម្រួលតាមកម្រិតអតិផរណានៃថ្លៃទំនិញក្នុងឆ្នាំនីមួយៗ។
នៅថ្ងៃទី១៧ ខែវិច្ឆិកានេះ រដ្ឋាភិបាល ទើបកំណត់ខ្សែបន្ទាត់ភាពក្រីក្រថ្មី និងអត្រាភាពក្រីក្រឆ្នាំ២០១៩-២០២០។ ការកំណត់ខ្សែបន្ទាត់ភាពក្រីក្រថ្មីនេះ ក៏នឹងត្រូវប្រើប្រាស់ដើម្បីតាមដានត្រួតពិនិត្យលទ្ធផល នៃការអនុវត្តផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ និងលទ្ធផលនៃការសម្រេចបាន គោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០៕
Tag:
ភាពក្រីក្រ
អត្រាភាពក្រីក្រ
ឆាយ ថន
© រក្សាសិទ្ធិដោយ thmeythmey.com