ស្ទើរតែគ្រប់ករណីរំលោភបំពាន តែងសង្កេតឃើញមានមតិរបស់មហាជនមួយចំនួន ដាក់បន្ទុកលើជនរងគ្រោះដោយភាគច្រើនជាស្ត្រី ដូចជាពួកគេទៅកន្លែងស្ងាត់, ដើរលេងពេលរាត្រី, ការស្លៀកពាក់ និងមូលហេតុជាច្រើនទៀតរាប់មិនអស់​។ មនុស្សមួយចំនួនក្នុងសង្គម បានរកហេតុផលរាប់ម៉ឺន រាប់លាន ដើម្បីការពារអ្នកប្រព្រឹត្ត ហើយថាជនរងគ្រោះ មិនបានការពារនោះឡើយ​។ ផ្នត់គំនិតទាំងនេះ បានដក់ក្នុងខ្លួនមនុស្សចំនួន រាប់ជំនាន់មកហើយ។ តើនរណាជាអ្នកទទួលខុសត្រូវ លើករណី រំលោភបំពាន?

 

ពាក់ព័ន្ធនឹងការបៀតបៀន អង្គការសហប្រជាជាតិប្រចាំប្រទេសកម្ពុជា (UN) បានចូលរួមអំពាវនាវឱ្យសាធារណជន បញ្ឈប់ការមាក់ងាយលើស្ត្រី និងសកម្មភាពយាយីផ្លូវភេទគ្រប់ទម្រង់រូបភាព។ លើសពីនេះ ត្រូវបញ្ឈប់ការប្រើភាសាស្ដីបន្ទោស លើជនរងគ្រោះ។  «កុំឱ្យគេរំលោភ » ហើយប្ដូរ មកប្រើពាក្យ «កុំរំលោភ »។ នេះជាសារខ្លីរបស់ UN Cambodia ដែលបានបង្ហោះ លើបណ្ដាញសង្គមរបស់ខ្លួន កាលពី​ថ្ងៃទី២២វិច្ឆិកានេះ។

 

កញ្ញា បុណ្យ​ រចនា សហស្ថាបនិក និងជានាយិកាអង្គការក្លាហាន ក្នុងបទសម្ភាសជាមួយសារព័ត៌មាន ThmeyThmey លើកឡើងថា នៅក្នុងសង្គមគេ​ឱ្យតម្លៃទៅបុរសជាធំ ហើយអ្នកប្រព្រឹត្តការបៀតបៀនស្ត្រី ភាគច្រើនជាបុរសហេតុនេះហើយទើបធ្វើឱ្យមនុស្សក្នុងសង្គមដាក់បន្ទុកលើជនរងគ្រោះ។ 

 

កញ្ញាបន្តដូច្នេះ៖ « ការស្ដីបន្ទោសជនរងគ្រោះនេះហើយ ដែលធ្វើឱ្យសង្គមរបស់យើងមានអំពើរហឹង្សា ផ្ដោតលើយេនឌ័រ និងការរំលោភបំពានលើផ្លូវភេទនៅបន្តកើតមានពីមួយជំនាន់ ទៅមួយជំនាន់។​ ហើយជនប្រព្រឹត្តដែលភាគច្រើនជាបុរសនោះ មិនខ្លាចរអាថាមានការស្ដីបន្ទោសពីសង្គមឡើយ »។​  

 

 

សហស្ថាបនិកអង្គការក្លាហាន ដែលធ្វើការលើការការពារ និងលើកកម្ពស់ស្ត្រីបន្តថា ការបញ្ឈប់ ការ រំលោភបំពានលើស្ត្រី គឺផ្ដើមពីការបញ្ឈប់ការស្ដីបន្ទោសដល់ជនរងគ្រោះ និងបង្រៀនឱ្យមនុស្ស បុរសគោរពមនុស្សស្រី ជៀសជាងការដាក់សំពាធលើស្ត្រីឱ្យការពារខ្លួនរាល់ពេលចេញទៅខាងក្រៅ ឬកាលៈទេសណាមួយ។ ការបញ្ឈប់ការរំលោភបំពាន មិនមែនជាទំនួលខុសត្រូវរបស់ស្រ្តី តែជាការទទួលខុសត្រូវរួម ដោយរាប់ទាំងការអប់រំនៅសាលារៀន ក្នុងគ្រួសារ សង្គម និងការការពារសន្តិសុខរបស់អាជ្ញាធរ។ 
 

ជុំវិញបញ្ហានេះដែរ លោក ហុង រស្មី នាយកប្រចាំប្រទេសនៃអង្គការអាក់សិនអេតកម្ពុជា លើកឡើងថា ស្រ្តីប្រឈមនឹងការបៀតបៀនខ្លាំងនៅកន្លែងងងឹត និងកន្លែងស្ងាត់​។ លោកជំរុញឱ្យស្ត្រីរាយការណ៍ទៅកាន់អាជ្ញាធរមូលដ្ឋានភ្លាមៗ រាល់ពេលមានការបៀតបៀនគ្រប់រូបភាពកើតឡើង។ បើសិន អាជ្ញាធរមិនអន្តរាគមន៍ភ្លាម ស្ត្រីត្រូវបន្តរាយការណ៍ដល់ថ្នាក់លើបន្តទៀត។ ចំណែកអាជ្ញាធរ ត្រូវអន្តរាគមន៍ឱ្យទាន់ពេល និងរាល់ពេលមានការរាយការណ៍របស់ជនរងគ្រោះ ដែលត្រូវបានគេបៀតបៀន។

 

លោក ហុង រស្មី បញ្ជាក់ថា៖«បើសិនស្ត្រីម្នាក់ឯងរាយការណ៍ មិនមានភូមិឃុំ ចាត់វិធានការអន្តរាគមន៍ ត្រូវនាំគ្នាទៅរាយការណ៍រហូត។ យន្តការការពារស្ត្រីមានច្រើន តែការតាំងចិត្ត អនុវត្ត មានតិចនៅឡើយ…។ ហើយការរាយការណ៍របស់ស្ត្រី នៅកម្រិតណាក៏ដោយ ព័ត៌មានទាំងនោះ គួរតែទទួលបានការអន្តរាគមន៍មកវិញ»។ 

 

 

នាយកប្រចាំប្រទេសនៃអង្គការអាក់សិនអេតកម្ពុជា ក៏បានអំពាវនាវឱ្យអាជ្ញាធរមូលដ្ឋាន ដាក់ភ្លើងបំភ្លឺផ្លូវនៅកន្លែងងងឹត និងដាក់ប្រជាការពារភូមិ ឬនគរបាលល្បាតនៅតាមទីស្ងាត់ ដើម្បីការពារស្ត្រី ពីការបៀតបៀនគ្រប់ទម្រង់រូបភាព។
 

ចំណែកកញ្ញា បុណ្យ រចនា បានអំពាវនាវឱ្យមហាជន សង្គម ឈប់ដាក់បន្ទុកលើស្ត្រីឱ្យការពារខ្លួន រាល់ពេលចេញទៅក្រៅ ឬកាលៈទេសណាមួយ តែត្រូវឱ្យមនុស្សប្រុស ឬសង្គម ចូលរួមគោរពស្ត្រី និងការពារស្ត្រី ដើម្បីបញ្ឈប់ការបៀតបៀន ការរំលោភបំពាន និងបញ្ឈប់ការស្ដីបន្ទោសលើជនរងគ្រោះ។

 

គួរបញ្ជាក់ផងដែរថ្មីៗ នេះមានករណីរំលោភ និងសម្លាប់ ​លើ​សិស្សថ្នាក់ទី១២ ​នៅស្រុកចំការលើ ខេត្តកំពង់ចាម។ ករណីនេះ អ្នកប្រើប្រាស់បណ្តាញសង្គម បង្ហាញក្តីអាណិតចំពោះនាងយ៉ាងខ្លាំង និងស្នើឲ្យកម្លាំងសមត្ថកិច្ច តាមចាប់ជនល្មើសឲ្យបានទាំងអស់ ដើម្បីយកទៅផ្តន្ទាទោសតាមច្បាប់៕
​