ជាតិ
កម្ពុជាបន្តធ្លាក់ភ្លៀងរយៈពេលមួយសប្ដាហ៍ទៀត ផ្លូវមួយចំនួននៅម្តុំវត្តដំបូកខ្ពស់ សង្កាត់បឹងទំពុន ខណ្ឌមានជ័យ ក្រោយភ្លៀងធ្លាក់កាលពីថ្ងៃទី២២ ខែវិច្ឆិកា។ រូបថត អ៊ូ សុខមាន
× ភ្នំពេញ៖ ក្រសួងធនធានទឹក និងឧតុនិយម បានឱ្យដឹងថា កម្ពុជានឹងទទួលឥទ្ធិពលពីទ្រនុងសម្ពាធខ្ពស់ពីជើងនៃប្រទេសចិនរំកិលចុះមកក្រោម និងខ្យល់មូសុងឦសានក្នុងកម្រិតមធ្យម។ ស្ថានភាពបែបនេះ អាចនឹងបណ្ដាលឱ្យ តំបន់មួយចំនួនមានភ្លៀងកម្រិតខ្សោយទៅបង្គួរ លាយឡំផ្គរ និងរន្ទះ។
បើតាមការព្យាកររបស់ក្រសួងធនធានទឹក និងឧតុនិយម ចាប់ពីថ្ងៃទី២៤-៣០ វិច្ឆិកា កម្ពុជានឹងទទួលឥទ្ធិពលពីទ្រនុងសម្ពោធខ្ពស់ពីជើងប្រទេសចិន និងខ្យល់មូសុងឦសានក្នុងកម្រិកមធ្យម។ ស្ថានភាពបែបនេះ អាចធ្វើឱ្យបណ្ដាខេត្តនៅតំបន់វាលទំនាបកណ្ដាលមានភ្លៀងក្នុងកម្រិតខ្សោយទៅបង្គួរ លាយឡំផ្គរ រន្ទះ នៅបណ្ដាខេត្តភាគខាងក្រោម។
ចំណែកឯ បណ្ដាខេត្តជាប់ភ្នំដងរែក និងខ្ពង់រាបឦសាន នៅថ្ងៃទី២៩-៣០ ខែវិច្ឆិកា អាចនឹងមានភ្លៀងក្នុងកម្រិតខ្សោយទៅបង្គួរ លាយឡំផ្គរ រន្ទះ នៅបណ្ដាខេត្តខ្ពង់រាបភាគខាងកើត។ ជាមួយគ្នានេះដែរ តំបន់ជាប់មាត់សមុទ្រ អាចនឹងមានភ្លៀងក្នុងកម្រិតខ្សោយ លាយឡំនិងខ្យល់ខុសពីធម្មតា។ នៅថ្ងៃទី២៩ ខែវិច្ឆិកា នឹងអាចមានភ្លៀងក្នុងកម្រិតពីខ្សោយទៅបង្គួរ លាយឡំដោយផ្គរ រន្ទះផងដែរ។
ក្រសួងធនធានទឹក និងឧតុនិយម បានបញ្ជាក់ថា ចាប់ពីខែធ្នូ ឆ្នាំ២០២១ ដល់ខែកុម្ភៈ ឆ្នាំ២០២២ ក្នុងមហាសមុទ្រប៉ាស៊ីហ្វិក មានបាតុភូតឡានីណា (La Nina) ចុះត្រជាក់ប្រមាណ៩០ភាគរយ និងបន្តថយចុះបន្តិចម្ដងៗ នៅត្រឹម៦០ភាគ ត្រឹមនៅខែកុម្ភៈ។ ស្ថានភាពបែបនេះ អាចធ្វើឱ្យធាតុអាកាសចុះត្រជាក់នៅតំបន់ស៊ីបេរី រុញច្រានទ្រនុងសម្ពាធខ្ពស់ពីប្រទេសចិនចុះមកក្រោម និងគ្រប់ដណ្ដប់មកលើកម្ពុជា។ ក្រសួងបាន អំពាវនាវដល់ពលរដ្ឋឱ្យប្រុងប្រយ័ត្នទៅលើបាតុភូតធម្មជាតិ ដែលបណ្ដាលឱ្យធាតុអាកាសប្រែប្រួល បូករួមជាមួយនឹងផ្គរ រន្ទះ អាចបង្កគ្រោះថ្នាក់កើតមានជាយថាហេតុ៕
Tag:
ធាតុអាកាសធាតុ
ភ្លៀង
ផ្គរ
រន្ទះ
© រក្សាសិទ្ធិដោយ thmeythmey.com