កីឡដ្ឋាន២ក្នុងប្រទេសកាណាដា ជាគោលដៅចុងក្រោយដែលប្រតិភូ FIFA ចុះត្រួតពិនិត្យមុនការសម្រេចចិត្តចុងក្រោយសម្រាប់ព្រឹត្តិការណ៍ World Cup 2026 នៅអាម៉េរិក កាណាដា និងម៉ិកស៊ិក។ កីឡដ្ឋានរបស់មានទីតាំងស្ថិតក្នុងទីក្រុង Toronto និងទីក្រុង Edmonton ដែលប្រតិភូ FIFA បានទៅដល់ចុងក្រោយ។

ម៉ិកស៊ិក ត្រៀមកីឡដ្ឋានពីរនៅទីក្រុង Guadalajara និង Monterrey ឯអាមេរិកត្រៀម១៨កីឡដ្ឋានសម្រាប់ព្រឹត្តិការណ៍ World Cup 2026 នេះ។ ជាសរុប កីឡដ្ឋានចំនួន២៣ ត្រូវទទួលការត្រួតពិនិត្យ។
 

គណៈប្រតិភូ FIFA បានដាក់សំណើក្នុងការជ្រើសរើសកីឡដ្ឋាន១៦កន្លែងដើម្បីរៀបចំព្រឹត្តិការណ៍ World Cup 2026 ទៅកាន់ប្រធានផ្នែករៀបចំការប្រកួត FIFA លោក Collin Smith។

«ក្នុងគោលការណ៍ត្រូវជ្រើសរើស ១៦កីឡដ្ឋានតាមផែនការហើយ យើងបានចុះត្រួតពិនិត្យ និងជ្រើសរើសរួចរាល់ ប៉ុន្តែសេចក្តីសម្រេចចុងក្រោយគឺស្ថិតលើ FIFA ទាំងមូល។ យើងបានបញ្ចប់ការត្រួតពិនិត្យ ហើយរឿងបន្ទាប់យើងត្រូវសម្រេចចិត្តយកទីតាំងដែលនឹងអាចទាក់ទាញចំនួនមនុស្សបានច្រើនពេលប្រកួត។» លោក Smith បានលើកឡើងបែបនេះក្នុងកិច្ចសម្ភាសមួយនៅក្នុងទីក្រុង Toronto នាថ្ងៃទី ២២ ខែវិច្ឆិកា។
 

ព្រឹត្តិការណ៍ World Cup 2026 នឹងត្រូវបង្កើនចំនួនក្រុមចូលរួមប្រកួតដល់ទៅ៤៨ក្រុមឯណោះ។ កាណាដាក៏ដូចជាម៉ិកស៊ិក បានចូលរួមការដេញថ្លៃធ្វើជាម្ចាស់ផ្ទះចំនួន២០ប្រកួត ខណៈការប្រកួតផ្សេងទៀតត្រូវរៀបចំនៅអាមេរិកទាំងអស់៕