លោក គង់ សោភ័ណ្ឌ អភិបាលខេត្តកណ្ដាល បានប្រាប់សារព័ត៌មានថ្មីៗ២៥ តាមទូរស័ព្ទ ថា ក្រោយករណីបាក់ច្រាំងទន្លេនេះ អាជ្ញាធរសម្រេចផ្អាកចរាចរណ៍រថយន្តគ្រប់ប្រភេទ នៅលើកំណាត់ផ្លូវលេខ៧០អា ដោយសារការបាក់នេះមានសភាពធ្ងន់ធ្ងរ រហូតដល់ទ្រូងផ្លូវ។ លោកបន្ថែមទៀតថា ការបិទចរាចរណ៍នេះ គឺបិទចាប់ពីថ្ងៃទី២៤ រហូតដល់ការជួសជុលកំណាត់ផ្លូវ និងស្ថាបនាច្រាំងទន្លេឡើងវិញ។ 

 

ពាក់ព័ន្ធនឹងការផ្អាកចរាចរណ៍ លោក គង់ សោភ័ណ្ឌ បន្ថែមដូច្នេះ៖ «ឥឡូវអាជ្ញាធររៀបចំហើយ។ រៀបចំផ្លូវបញ្ចៀស ដើម្បីឱ្យបងប្អូនចរាចរណ៍បាន គឺយើងស្ថាបនាផ្លូវអែបមួយ ដាក់ថ្មគ្រួសក្រហម ដើម្បីឱ្យពលរដ្ឋយើងធ្វើដំណើរទៅស្រួល កុំឱ្យរអិល»។ 
 

លោកបន្ថែមថា ការបាក់ច្រាំងទន្លេនេះ ខាងមន្ត្រីជំនាញធនធានទឹក និងឧតុនិយម នឹងចុះសិក្សារៀបចំបាតទន្លេ និងជួសជុលកំណាត់ផ្លូវឡើងវិញ ខណៈការបាក់ច្រាំងទន្លេខាងលើនេះ មិនបានបង្កផលប៉ះពាល់ផ្ទះពលរដ្ឋ និងទ្រព្យសម្បត្តិពលរដ្ឋឡើយ។ ប៉ុន្តែលោកអំពាវនាវដល់ពលរដ្ឋរស់នៅ និងចរាចរណ៍ តាមផ្លូវជាតិ៧០អានេះ បង្កើនការប្រុងប្រយ័ត្នខ្ពស់ ដើម្បីជៀសវាង កុំឱ្យមានគ្រោះថ្នាក់ជាយថាហេតុ៕